തിരുവനന്തപുരം: തെരഞ്ഞെടുപ്പിലെ കനത്ത പരാജയത്തിന് പിന്നാലെ, സിപിഎം സംസ്ഥാന സമിതിയിൽ നേതൃത്വത്തിനെതിരെ അതിരൂക്ഷമായ വിമർശനം. സംഘടനാപരമായ ഗുരുതരമായ വീഴ്ചകളാണ് പാർട്ടിക്ക് തിരിച്ചടിയായതെന്ന് വിലയിരുത്തിയ സമിതി, പാർട്ടിയുടെ അടിത്തറയിൽ വലിയ ചോർച്ച സംഭവിച്ചതായും ചൂണ്ടിക്കാട്ടി.(CPM Faces Internal Criticism After Election Defeat)
ഇടതുപക്ഷത്തിന്റെ ഉറച്ച വോട്ട് ബാങ്കായിരുന്ന ന്യൂനപക്ഷങ്ങൾ പാർട്ടിയിൽ നിന്ന് അകന്നത് തിരിച്ചറിയുന്നതിൽ നേതൃത്വം പരാജയപ്പെട്ടു. വെള്ളാപ്പള്ളി നടേശനോടുള്ള മുഖ്യമന്ത്രി പിണറായി വിജയന്റെ മൃദുസമീപനം ന്യൂനപക്ഷങ്ങൾക്കിടയിൽ വലിയ അതൃപ്തിയുണ്ടാക്കിയെന്ന് വിമർശനം ഉയർന്നു. അദ്ദേഹത്തെ തള്ളിപ്പറയാതിരുന്നത് വോട്ടെടുപ്പിൽ ദോഷകരമായി ബാധിച്ചതായും സമിതി അഭിപ്രായപ്പെട്ടു.
പാർട്ടിയുടെ ശക്തികേന്ദ്രങ്ങളായ പയ്യന്നൂരിലും തളിപ്പറമ്പിലുമുണ്ടായ പരാജയം അവിശ്വസനീയമാണെന്ന് നേതാക്കൾ പറഞ്ഞു. പികെ ശ്യാമളയുടെ സ്ഥാനാർത്ഥിത്വം തെറ്റായ തീരുമാനമായിരുന്നുവെന്നും, ടിഐ മധുസൂദനനെതിരായ ആക്ഷേപങ്ങൾ ഗൗരവത്തോടെ കാണണമെന്നും ആവശ്യം ഉയർന്നു. കേവലം അണികൾ മാത്രമല്ല, പാർട്ടി അംഗങ്ങൾ പോലും പാർട്ടിയെ കൈവിട്ട സാഹചര്യം ഗൗരവകരമാണെന്ന് സമിതി വിലയിരുത്തി.
എൽഡിഎഫിന് വെറും 35 സീറ്റുകളിൽ മാത്രമാണ് വിജയിക്കാനായത്. സമീപകാല ചരിത്രത്തിലെ ഏറ്റവും വലിയ തിരിച്ചടിയാണിത്. കോഴിക്കോട് ഉൾപ്പെടെയുള്ള ശക്തികേന്ദ്രങ്ങളിൽ പാർട്ടി തകർന്നടിഞ്ഞു. ഈ സാഹചര്യത്തിൽ, പാർട്ടിയെ അടിമുടി തിരുത്തണമെന്നും അടിയന്തരമായി പ്ലീനം വിളിച്ചുചേർക്കണമെന്നും സംസ്ഥാന സമിതിയിൽ ആവശ്യമുയർന്നു.
Story Summary
Following a crushing defeat in the recent elections where the LDF secured only 35 seats, the CPM state committee has faced severe criticism regarding its leadership and organizational failures. Key issues discussed included the alienation of minority voters due to the party’s stance on Vellappally Natesan, controversial candidate selections in Kannur, and a significant loss of support from party workers, leading to urgent demands for a plenary session to initiate a structural overhaul.
