കണ്ണൂർ: പയ്യന്നൂർ നഗരസഭയിലെ 46-ാം വാർഡിലെ തിരഞ്ഞെടുപ്പ് ഫലം റദ്ദാക്കണമെന്ന് ആവശ്യപ്പെട്ട് കോൺഗ്രസ് തിരഞ്ഞെടുപ്പ് കമ്മീഷനെ സമീപിച്ചു. പോലീസ് സ്റ്റേഷന് നേരെ ബോംബെറിഞ്ഞ കേസിൽ ശിക്ഷിക്കപ്പെട്ട് ജയിലിൽ കഴിയുന്ന സിപിഎം നേതാവ് വി.കെ. നിഷാദ് വിജയിച്ച വാർഡിലെ ഫലത്തിനെതിരെയാണ് കോൺഗ്രസ് നീക്കം. പയ്യന്നൂരിലെ കോൺഗ്രസ് നേതാവാണ് പരാതിക്കാരൻ.(Congress’ complaint against CPM in Payyanur, Demand to cancel election results in ward 46)
പോലീസ് സ്റ്റേഷന് നേരെ ബോംബെറിഞ്ഞ കേസിലെ പ്രതിയായ നിഷാദ്, തിരഞ്ഞെടുപ്പിന് മുൻപ് തന്നെ ശിക്ഷിക്കപ്പെട്ട് ജയിലിലായിരുന്നു. ഒരു കുറ്റവാളി തിരഞ്ഞെടുക്കപ്പെട്ടത് നിയമപരമായി ചോദ്യം ചെയ്യപ്പെടണമെന്നാണ് കോൺഗ്രസിന്റെ നിലപാട്.
തിരഞ്ഞെടുപ്പിൽ മികച്ച ഭൂരിപക്ഷത്തിൽ വിജയിച്ചെങ്കിലും, ജയിലിലായതിനാൽ നിഷാദിന് ഇതുവരെ കൗൺസിലറായി സത്യപ്രതിജ്ഞ ചെയ്യാൻ സാധിച്ചിട്ടില്ല. ശിക്ഷിക്കപ്പെട്ട നിഷാദിന് തുടർച്ചയായി പരോൾ അനുവദിക്കുന്നത് നേരത്തെ തന്നെ വലിയ രാഷ്ട്രീയ വിവാദങ്ങൾക്ക് വഴിവെച്ചിരുന്നു. കോൺഗ്രസിന്റെ ഈ നീക്കം പയ്യന്നൂരിലെ സിപിഎം നേതൃത്വത്തിന് വലിയ തലവേദനയാണ് സൃഷ്ടിച്ചിരിക്കുന്നത്.
