തിരുവനന്തപുരം: കഴിഞ്ഞ ഇടതുപക്ഷ സർക്കാരിന്റെ സ്വപ്ന പദ്ധതിയായിരുന്ന സിൽവർലൈൻ (കെ-റെയിൽ) പദ്ധതി നടപ്പാക്കിയിരുന്നെങ്കിൽ കേരളം കണ്ട ഏറ്റവും വലിയ പാരിസ്ഥിതിക ദുരന്തമായി അത് മാറുമായിരുന്നുവെന്ന് മുഖ്യമന്ത്രി വി.ഡി. സതീശൻ. മൺസൂൺ കാലം തുടങ്ങിയാൽ കെ-റെയിൽ പാതയിലൂടെ ട്രെയിൻ മാത്രമല്ല, ബോട്ടുകൂടി ഓടിക്കേണ്ട അവസ്ഥ വരുമായിരുന്നുവെന്നും അദ്ദേഹം മാധ്യമങ്ങളോട് പരിഹാസരൂപേണ പറഞ്ഞു. പദ്ധതി റദ്ദാക്കിയതുമായി ബന്ധപ്പെട്ട വിശദാംശങ്ങൾ വാർത്താസമ്മേളനത്തിൽ പങ്കുവെക്കുകയായിരുന്നു അദ്ദേഹം.(CM V D Satheesan Criticizes K Rail Embankments Environmental Issues Kerala Reopening)
കൃത്യമായ ഒരു വിശദമായ പദ്ധതി രേഖ പോലും ഇല്ലാതെയാണ് മുൻ സർക്കാർ കെ-റെയിലുമായി മുന്നോട്ട് പോയത്. കേരളത്തിന്റെ ഭൂമിശാസ്ത്രപരമായ കിടപ്പ് കിഴക്ക് നിന്ന് പടിഞ്ഞാറോട്ട്, അതായത് മുകളിൽ നിന്ന് താഴേക്കാണ്. നദികളെല്ലാം മുകളിൽ നിന്ന് താഴേക്ക് പതിക്കുന്നു. ഈ സാഹചര്യത്തിൽ 300 കിലോമീറ്റർ ദൂരം 30 അടി ഉയരത്തിൽ വലിയ മൺതിട്ടകൾ നിർമ്മിക്കുന്നത് പ്രകൃതിക്ക് താങ്ങാൻ കഴിയുന്നതല്ല. ഇത് സുസ്ഥിരമല്ലെന്ന് മാത്രമല്ല, കടുത്ത പ്രകൃതിദുരന്തങ്ങൾക്ക് കാരണമാവുകയും ചെയ്യുമായിരുന്നു.
യു.ഡി.എഫിന്റെ സബ് കമ്മിറ്റി വിവിധ മേഖലകളിലുള്ള വിദഗ്ദ്ധരുമായി വിപുലമായ ചർച്ചകൾ നടത്തി തയ്യാറാക്കിയ ശാസ്ത്രീയ റിപ്പോർട്ടിന്റെ അടിസ്ഥാനത്തിലാണ് പദ്ധതി വേണ്ടെന്ന് വെക്കാൻ സർക്കാർ തീരുമാനിച്ചതെന്ന് മുഖ്യമന്ത്രി വ്യക്തമാക്കി. പദ്ധതി വേണ്ടെന്ന് വെച്ചാൽ അത് ഡീനോട്ടിഫൈ ചെയ്യാനുള്ള ഒരു ചെറിയ ഉത്തരവ് ഇറക്കിയാൽ മതിയായിരുന്നു. എന്നാൽ അവരത് ചെയ്തില്ല. പദ്ധതിക്കായി ഭൂമി അടയാളപ്പെടുത്തിയതിനാൽ മകളുടെ കല്യാണത്തിന് സ്വന്തം സ്ഥലം പണയം വെയ്ക്കാൻ പോലും കഴിയാതെ നിരവധി പാവങ്ങൾ ദുരിതത്തിലായിരുന്നു. ‘പുതുയുഗ യാത്ര’യ്ക്കിടയിൽ ജനങ്ങളിൽ നിന്ന് നേരിട്ട് ലഭിച്ച പരാതികളുടെ അടിസ്ഥാനത്തിലാണ് അടിയന്തര തീരുമാനമെടുത്തത് എന്നും
മുഖ്യമന്ത്രി വി.ഡി. സതീശൻ കൂട്ടിച്ചേർത്തു.
Story Summary
Chief Minister V D Satheesan mocked the previous LDF government’s K-Rail project, stating that if implemented, people would have to run boats alongside trains during the monsoon due to natural blockades. He explained that building 300 km of embankments and 200 km of walls would have caused an ecological disaster in Kerala. Satheesan added that the previous government kept land notifications active as a punishment for protestors, leaving poor families unable to even mortgage their lands, which prompted the new UDF cabinet to completely cancel the project.
