തിരുവനന്തപുരം: നിയമസഭാ തിരഞ്ഞെടുപ്പ് ഫലം വരുന്നതിന് മുൻപേ കോൺഗ്രസിൽ ആരംഭിച്ച മുഖ്യമന്ത്രി ചർച്ചകളിൽ കടുത്ത അതൃപ്തിയുമായി രാഹുൽ ഗാന്ധി. അനാവശ്യമായ ഇത്തരം വിവാദങ്ങൾ ഉടൻ അവസാനിപ്പിക്കണമെന്ന് അദ്ദേഹം സംസ്ഥാന നേതാക്കൾക്ക് കർശന നിർദ്ദേശം നൽകിയെന്നാണ് വിവരം. അനുകൂല സാഹചര്യം പ്രതീക്ഷിച്ചുള്ള ഈ അവകാശവാദങ്ങൾ പാർട്ടിയുടെ പ്രതിച്ഛായയ്ക്ക് മങ്ങലേൽപ്പിക്കുന്നുവെന്നാണ് ഹൈക്കമാൻഡിന്റെ വിലയിരുത്തൽ.(CM dispute in Congress, Rahul Gandhi is deeply dissatisfied, strict instructions given)
തിരഞ്ഞെടുപ്പ് ഫലം വരും മുൻപേയുള്ള മുഖ്യമന്ത്രി ചർച്ചകൾ അനാവശ്യമാണെന്ന് ദീപ ദാസ്മുൻഷിയെ അറിയിച്ചു. പരസ്യപ്രസ്താവനകൾ വിലക്കിയെങ്കിലും മുതിർന്ന നേതാക്കൾ ഇത് ലംഘിക്കുന്നത് ഗൗരവകരമായിട്ടാണ് കേന്ദ്ര നേതൃത്വം കാണുന്നത്. ഇത്തരം ചർച്ചകൾക്ക് വളം വെച്ചുകൊടുക്കുന്നവർക്കെതിരെ കർശന നടപടിയുണ്ടാകുമെന്ന് ഹൈക്കമാൻഡ് മുന്നറിയിപ്പ് നൽകി.
എറണാകുളത്ത് വി.ഡി. സതീശനെ ഉന്നമിട്ട് രമേശ് ചെന്നിത്തലയെ അനുകൂലിച്ച് ഫ്ലക്സുകൾ ഉയർന്നതും ഹൈക്കമാൻഡിനെ ചൊടിപ്പിച്ചിട്ടുണ്ട്. ഇത് മുന്നണിയിലെ മറ്റു കക്ഷികളെയും അസ്വസ്ഥരാക്കുന്നു. കെപിസിസി യോഗത്തിൽ ദേശീയ നേതൃത്വത്തിന്റെ വികാരം ദീപ ദാസ്മുൻഷി അറിയിച്ചിരുന്നു.
