തിരുവനന്തപുരം: കേരളത്തിൽ ഭരണത്തുടർച്ചയുണ്ടായാൽ പിണറായി വിജയൻ തന്നെ മുഖ്യമന്ത്രിയാകണമെന്ന് ഭൂരിപക്ഷം വോട്ടർമാരും ആഗ്രഹിക്കുന്നതായി ‘ആക്സിസ് മൈ ഇന്ത്യ’യുടെ പുതിയ സർവേ റിപ്പോർട്ട് (Axis My India Survey Kerala). യുഡിഎഫ് ഭരണത്തിലെത്തുന്ന സാഹചര്യത്തിൽ പ്രതിപക്ഷ നേതാവ് വി.ഡി. സതീശൻ മുഖ്യമന്ത്രിയാകണമെന്നാണ് സർവേയിൽ പങ്കെടുത്തവർ അഭിപ്രായപ്പെട്ടത്.
എൽഡിഎഫ്: പിണറായിക്ക് വ്യക്തമായ മുൻതൂക്കം
എൽഡിഎഫ് വീണ്ടും അധികാരത്തിലെത്തിയാൽ മുഖ്യമന്ത്രി സ്ഥാനത്തേക്ക് 33 ശതമാനം പേരുടെ പിന്തുണയോടെ പിണറായി വിജയൻ ബഹുദൂരം മുന്നിലാണ്. മുൻ ആരോഗ്യ മന്ത്രി കെ.കെ. ശൈലജയ്ക്ക് രണ്ട് ശതമാനം പേരുടെ പിന്തുണ മാത്രമാണുള്ളത്. ഇടതുമുന്നണിയിൽ നിന്ന് മറ്റാരെങ്കിലും മുഖ്യമന്ത്രി സ്ഥാനത്തേക്ക് വരണമെന്ന് അഞ്ച് ശതമാനം പേർ അഭിപ്രായപ്പെട്ടു.
യുഡിഎഫ്: വി.ഡി. സതീശൻ ഒന്നാമത്
യുഡിഎഫിനാണ് ഭരണമെങ്കിൽ മുഖ്യമന്ത്രിയാകാൻ ഏറ്റവും അനുയോജ്യൻ വി.ഡി. സതീശനാണെന്ന് 21 ശതമാനം പേർ വിശ്വസിക്കുന്നു. രമേശ് ചെന്നിത്തലയ്ക്ക് എട്ട് ശതമാനവും കെ.സി. വേണുഗോപാലിന് മൂന്ന് ശതമാനവും പിന്തുണ ലഭിച്ചു. എന്നാൽ ശശി തരൂരിന് ഒരു ശതമാനം പേരുടെ പിന്തുണ മാത്രമേ സർവേയിൽ ലഭിച്ചിട്ടുള്ളൂ എന്നത് ശ്രദ്ധേയമാണ്. മുന്നണിയിൽ നിന്ന് പുതിയൊരു മുഖം മുഖ്യമന്ത്രിയാകണമെന്ന് 11 ശതമാനം പേർ നിലപാടെടുത്തു.
എൻഡിഎയും രാജീവ് ചന്ദ്രശേഖറും
എൻഡിഎ അധികാരത്തിൽ വരികയാണെങ്കിൽ രാജീവ് ചന്ദ്രശേഖർ മുഖ്യമന്ത്രിയാകണമെന്ന് നാല് ശതമാനം പേർ മാത്രമാണ് അഭിപ്രായപ്പെട്ടത്. എന്നാൽ ബിജെപി സഖ്യത്തിൽ നിന്ന് മറ്റാരെങ്കിലും മുഖ്യമന്ത്രിയാകണമെന്ന നിലപാടിലാണ് ഒമ്പത് ശതമാനം ആളുകൾ.
Story Summary: The ‘Axis My India’ survey reveals that Pinarayi Vijayan is the top choice for Chief Minister if LDF retains power, while V.D. Satheesan leads the race for the UDF. Interestingly, the survey shows lower support for other prominent leaders like K.K. Shailaja, Ramesh Chennithala, and Shashi Tharoor compared to the frontrunners.
