തൃശൂർ: അടാട്ട് ഗ്രാമപഞ്ചായത്ത് പ്രസിഡന്റ് സ്ഥാനത്ത് നിന്നും പ്രമുഖ കോൺഗ്രസ് നേതാവ് അനിൽ അക്കര രാജിവെച്ചു (Anil Akkara). കേരള ഗ്രാമപഞ്ചായത്ത് അസോസിയേഷൻ പ്രസിഡന്റ് എന്ന നിലയിലുള്ള സംസ്ഥാനതല പ്രവർത്തനങ്ങളിൽ കൂടുതൽ ശ്രദ്ധ കേന്ദ്രീകരിക്കുന്നതിനും, പുതിയ നേതാക്കൾക്ക് അവസരം നൽകുന്നതിനുമായി പാർട്ടിയിലുണ്ടാക്കിയ മുൻകൂർ ധാരണയുടെയും അടിസ്ഥാനത്തിലാണ് രാജി. ജൂൺ 30-ഓടെ അദ്ദേഹം ഔദ്യോഗികമായി സ്ഥാനമൊഴിഞ്ഞു.
കേരള ഗ്രാമപഞ്ചായത്ത് അസോസിയേഷൻ പ്രസിഡന്റിന്റെ ചുമതലകൾ വളരെ വിപുലമായതിനാൽ രണ്ട് പ്രധാന പദവികൾ ഒരേസമയം മുന്നോട്ട് കൊണ്ടുപോകുന്നത് പ്രായോഗികമല്ലെന്ന് അദ്ദേഹം വ്യക്തമാക്കി. കഴിഞ്ഞ നിയമസഭാ തെരഞ്ഞെടുപ്പിൽ മത്സരിക്കുന്നതിന് പകരം ഗ്രാമപഞ്ചായത്ത് അസോസിയേഷൻ നേതൃത്വത്തിൽ പ്രവർത്തിക്കാനാണ് താൻ താല്പര്യപ്പെട്ടിരുന്നതെന്നും, ആ വിശ്വാസം ഉൾക്കൊണ്ടാണ് പാർട്ടി തന്നെ അസോസിയേഷൻ പ്രസിഡന്റായി തെരഞ്ഞെടുത്തതെന്നും രാജിക്കാര്യങ്ങൾ വിശദീകരിച്ചുകൊണ്ടുള്ള കുറിപ്പിൽ അനിൽ അക്കര പറഞ്ഞു.
പഞ്ചായത്തിൽ പുതിയ മുഖങ്ങൾക്ക് അവസരം ലഭിക്കണമെന്ന പാർട്ടി തീരുമാനവും ഈ രാജിക്ക് പിന്നിലുണ്ട്. ഒരാളുടെ അവസരം മറ്റൊരാൾ തടസ്സപ്പെടുത്തരുതെന്ന അന്തരിച്ച ജനപ്രിയ നേതാവ് പി.ടി. തോമസിന്റെ നിലപാടുകൾ അദ്ദേഹം തന്റെ കുറിപ്പിൽ പ്രത്യേകം സ്മരിച്ചു. താൻ പ്രസിഡന്റായി തുടർന്നിരുന്നെങ്കിൽ മറ്റ് രണ്ട് സഹപ്രവർത്തകർക്ക് ആ അവസരം ലഭിക്കാൻ വീണ്ടും വർഷങ്ങളോളം കാത്തിരിക്കേണ്ടി വരുമായിരുന്നു എന്ന് അദ്ദേഹം വ്യക്തമാക്കി. പാർട്ടി നിശ്ചയിച്ച പുതിയ ധാരണ പ്രകാരം, അടുത്ത രണ്ട് വർഷം ഇരുപതാം വാർഡ് മെമ്പറായ പി.ജെ സണ്ണി അടാട്ട് ഗ്രാമപഞ്ചായത്ത് പ്രസിഡന്റാകും. ശേഷിക്കുന്ന ഭരണകാലയളവിൽ ഒൻപതാം വാർഡ് മെമ്പറായ ടി.ഡി വിൽസൺ ആയിരിക്കും പ്രസിഡന്റ് പദവി വഹിക്കുക.
പ്രസിഡന്റ് സ്ഥാനം ഒഴിഞ്ഞാലും അടാട്ട് ഗ്രാമപഞ്ചായത്തിലെ 15-ാം വാർഡായ സംസ്കൃതം കോളേജ് വാർഡിലെ ജനപ്രതിനിധിയായി അനിൽ അക്കര തുടരും. പ്രസിഡന്റ് എന്നതും മെമ്പർ എന്നതും തനിക്ക് സ്ഥാനങ്ങൾ മാത്രമാണെന്നും, ജനങ്ങളോടൊപ്പം കൂടുതൽ സജീവമായി നാടിന്റെ വികസനത്തിനായി താൻ എപ്പോഴുമുണ്ടാകുമെന്നും അദ്ദേഹം കൂട്ടിച്ചേർത്തു. കഴിഞ്ഞ തദ്ദേശ തെരഞ്ഞെടുപ്പിൽ കടുത്ത പോരാട്ടത്തിലൂടെ അടാട്ട് ഗ്രാമപഞ്ചായത്ത് ഭരണം തിരികെ പിടിക്കുക എന്ന പാർട്ടിയുടെ ലക്ഷ്യം വിജയകരമായി പൂർത്തിയാക്കിയതിന്റെ ചാരിതാർഥ്യത്തോടെയാണ് അദ്ദേഹം പ്രസിഡന്റ് പദവിയിൽ നിന്നും പടിയിറങ്ങുന്നത്.
Story Summary:
Anil Akkara has resigned from the post of Adat Grama Panchayat President to focus on his role as the Kerala Grama Panchayat Association President. Following a prior party agreement to give opportunities to new leaders, P.J. Sunny and T.D. Wilson will take over the presidency for the remaining terms, while Akkara will continue as a ward member.
