തിരുവനന്തപുരം: വരാനിരിക്കുന്ന നിയമസഭാ തെരഞ്ഞെടുപ്പിൽ യുഡിഎഫ് 100-ലധികം സീറ്റുകൾ നേടി അധികാരം പിടിക്കുമെന്ന് പ്രതിപക്ഷ നേതാവ് വി.ഡി. സതീശൻ. യുഡിഎഫിന്റെ വിജയസാധ്യതയെ പരിഹസിച്ച മുഖ്യമന്ത്രിക്ക്, തോൽവിക്ക് പിന്നാലെ കണ്ടംവഴി ഓടേണ്ടി വരുമെന്ന് സതീശൻ തിരിച്ചടിച്ചു.(After defeat, Pinarayi Vijayan will run at 110 speed, VD Satheesan on Assembly elections)
യുഡിഎഫ് 100 സീറ്റിലധികം നേടുമെന്ന് താൻ പറഞ്ഞതിനെ മുഖ്യമന്ത്രി കളിയാക്കിയിരുന്നു. 110 ആയിരിക്കും എന്നായിരുന്നു മുഖ്യമന്ത്രിയുടെ പരിഹാസം. ഇതിന് മറുപടിയായാണ്, തോൽവി ഉറപ്പാകുമ്പോൾ മുഖ്യമന്ത്രി കണ്ടംവഴി ഓടുന്ന സ്പീഡ് 110 ആയിരിക്കുമെന്ന് സതീശൻ പരിഹസിച്ചത്.
യുഡിഎഫിന്റെ ‘പുതുയുഗ യാത്ര’ കേരളത്തിന്റെ ഭാവിയെയും വികസനത്തെയും കുറിച്ചുള്ള ഗൗരവകരമായ ചർച്ചയാണെന്ന് അദ്ദേഹം പറഞ്ഞു. വികസനം ചർച്ച ചെയ്യാൻ പ്രതിപക്ഷത്തിന് ഭയമാണെന്ന ആരോപണം അദ്ദേഹം തള്ളി. മുഖ്യമന്ത്രി യുഡിഎഫിന്റെ യാത്രകളെ സൂക്ഷ്മമായി നിരീക്ഷിക്കുന്നുണ്ടെന്നും അദ്ദേഹം കൂട്ടിച്ചേർത്തു. സമസ്തയുൾപ്പെടെയുള്ള സംഘടനകളുടെ ആഭ്യന്തര കാര്യങ്ങളിൽ പ്രതിപക്ഷ നേതാവ് എന്ന നിലയിൽ താൻ ഇടപെടില്ല. സൂര്യന് കീഴിലുള്ള എല്ലാ കാര്യങ്ങളിലും അഭിപ്രായം പറയേണ്ട ഉത്തരവാദിത്തം തനിക്കില്ലെന്നും സംഘടനകളിലെ പ്രശ്നങ്ങൾ അവർ തന്നെ പരിഹരിക്കുമെന്നും അദ്ദേഹം വ്യക്തമാക്കി.
