തിരുവനന്തപുരം: സംസ്ഥാനത്ത് വർദ്ധിച്ചുവരുന്ന ലഹരിമരുന്ന് വ്യാപനത്തിനെതിരെ വിപുലമായ സുരക്ഷാ സംവിധാനങ്ങളോടെ സർക്കാരിന്റെ പ്രത്യേക പദ്ധതിയായ ‘ഓപ്പറേഷൻ തൂഫാൻ’ (Operation Toofan) ആരംഭിച്ചു. പദ്ധതിയുടെ സംസ്ഥാനതല ഉദ്ഘാടനം മുഖ്യമന്ത്രി വി.ഡി. സതീശൻ നിർവ്വഹിച്ചു. കേരളം നേരിടുന്ന ഏറ്റവും വലിയ വെല്ലുവിളിയാണ് ലഹരിമരുന്ന് വ്യാപനമെന്നും നാടിന്റെ യുവത്വത്തെ ഇല്ലാതാക്കാൻ ശ്രമിക്കുന്ന ഈ വിപത്തിനെതിരെ സമൂഹത്തിലെ ഓരോരുത്തരും തൂഫാൻ പദ്ധതിയുടെ അംബാസഡർമാരായി മാറണമെന്നും മുഖ്യമന്ത്രി ആഹ്വാനം ചെയ്തു. ഇന്റലിജൻസ് ഐജി പുട്ട വിമലാദിത്യയാണ് ഈ ബൃഹത്തായ പദ്ധതിയുടെ നോഡൽ ഓഫീസറായി ചുമതലയേറ്റിരിക്കുന്നത്. പൊലീസിന്റെ പ്രത്യേക വിംഗ് ഉൾപ്പെടെയുള്ള സന്നാഹങ്ങൾ ഇതിനായി സജ്ജമായിക്കഴിഞ്ഞു.
ലഹരിമരുന്ന് ശൃംഖലയെ അപ്പാടെ നിയമത്തിനു മുന്നിൽ കൊണ്ടുവരുമെന്നും ഇതിൽ യാതൊരുവിധ വിട്ടുവീഴ്ചയും ഉണ്ടാകില്ലെന്നും ചടങ്ങിൽ അധ്യക്ഷത വഹിച്ച ആഭ്യന്തര മന്ത്രി രമേശ് ചെന്നിത്തല വ്യക്തമാക്കി. സിനിമാ രംഗത്തെ കാരവനുകളിൽ കയറി പരിശോധിക്കില്ലെന്ന ധൈര്യം ആർക്കും വേണ്ടെന്നും നിയമത്തിനു മുന്നിൽ പണമോ പദവിയോ സ്റ്റാറ്റസോ നോക്കിയായിരിക്കില്ല പൊലീസ് പ്രവർത്തിക്കുകയെന്നും അദ്ദേഹം കർശന മുന്നറിയിപ്പ് നൽകി. ഡാർക്ക് വെബിന്റെ മറവിലിരുന്ന് കച്ചവടം നടത്തുന്നവരെ സൈബർ സെല്ലിന്റെ സഹായത്തോടെ കൃത്യമായി പിന്തുടരുമെന്നും ഈ നിയമവിരുദ്ധ ശൃംഖലയിലുള്ളവർ ഇന്ന് തന്നെ കച്ചവടം അവസാനിപ്പിക്കുന്നതാണ് നല്ലതെന്നും ആഭ്യന്തര മന്ത്രി കൂട്ടിച്ചേർത്തു. ലഹരി മാഫിയയെക്കുറിച്ചുള്ള പരാതികളും അറിയിപ്പുകളും നൽകുന്ന പൊതുജനങ്ങളുടെ വിവരങ്ങൾ പൂർണ്ണമായും രഹസ്യമായി സൂക്ഷിക്കുമെന്നും സർക്കാർ ഉറപ്പുനൽകുന്നു.
എക്സൈസ്, പൊലീസ്, വിദ്യാഭ്യാസ വകുപ്പുകൾ സംയുക്തമായാണ് ഈ പദ്ധതി സംസ്ഥാനത്തുടനീളം നടപ്പാക്കുന്നത്. ചടങ്ങിൽ തൂഫാൻ വാരിയേഴ്സ് ആയി തിരഞ്ഞെടുക്കപ്പെട്ട വിദ്യാർത്ഥിനികൾക്ക് ആഭ്യന്തര മന്ത്രി ബാഡ്ജുകൾ വിതരണം ചെയ്യുകയും തൂഫാൻ ഫ്ലാഗ് വിദ്യാഭ്യാസ മന്ത്രി എൻ. ഷംസുദീൻ കോട്ടൺഹിൽ സ്കൂളിലെ സ്റ്റുഡന്റ് പൊലീസ് കേഡറ്റുകൾക്ക് കൈമാറുകയും ചെയ്തു. ചടങ്ങിൽ എക്സൈസ് മന്ത്രി എം. ലിജു, ഗതാഗത വകുപ്പ് മന്ത്രി സി.പി. ജോൺ, ശശി തരൂർ എംപി, സംസ്ഥാന പൊലീസ് മേധാവി റാവാഡ ചന്ദ്രശേഖർ തുടങ്ങിയ പ്രമുഖർ പങ്കെടുത്തു. ഇന്റലിജൻസ് ഐജിയുടെ നേതൃത്വത്തിൽ നാർക്കോട്ടിക് സെല്ലും ക്രൈംബ്രാഞ്ചും ഉൾപ്പെടെയുള്ള പൊലീസ് സംവിധാനങ്ങൾ ജില്ലാതലത്തിലും താഴേത്തട്ടിലും ലഹരി മാഫിയകൾക്കെതിരെ ശക്തമായ നടപടികളുമായി മുന്നോട്ടുപോകും.
Summary: The Kerala government has launched ‘Operation Toofan,’ a comprehensive initiative to combat the growing drug menace in the state. Inaugurated by Chief Minister V.D. Satheesan, the project aims to eradicate drug networks with strict enforcement across all sectors, including high-profile areas. Home Minister Ramesh Chennithala warned that no status or position would prevent police inspections, and dark web drug traffickers would be tracked by the cyber cell.
