തിരുവനന്തപുരം: നിയമസഭാ തിരഞ്ഞെടുപ്പിൽ യുഡിഎഫ് ഉജ്ജ്വല വിജയം നേടിയതോടെ മുഖ്യമന്ത്രി പിണറായി വിജയൻ രാജിവെച്ചു (Pinarayi Vijayan Resignation). രാജ്ഭവനിലെത്തി ഗവർണർക്ക് അദ്ദേഹം രാജി സമർപ്പിച്ചു. പുതിയ സർക്കാർ അധികാരമേൽക്കുന്നത് വരെ കാവൽ മുഖ്യമന്ത്രിയായി തുടരാൻ ഗവർണർ നിർദ്ദേശിച്ചു. ചൊവ്വാഴ്ച നിശ്ചയിച്ചിരുന്ന മന്ത്രിസഭാ യോഗം റദ്ദാക്കിയ ശേഷമാണ് അദ്ദേഹം രാജി തീരുമാനത്തിലേക്ക് നീങ്ങിയത്.
അതേസമയം , തിരഞ്ഞെടുപ്പ് ഫലം അപ്രതീക്ഷിതമാണെന്ന് സിപിഎം സംസ്ഥാന സെക്രട്ടേറിയേറ്റ് പ്രതികരിച്ചു. ഇടതുപക്ഷത്തിന് ഭരണത്തുടർച്ച ലഭിക്കുമെന്ന് കരുതിയിരുന്നിടത്താണ് തിരിച്ചടിയുണ്ടായത്. സംസ്ഥാനത്തെ വികസന കുതിപ്പും ക്ഷേമപദ്ധതികളും നീതി ആയോഗിന്റെ റാങ്കിംഗിലെ മുന്നേറ്റവുമൊന്നും വോട്ടായി മാറിയില്ലെന്നത് പാർട്ടി ഗൗരവമായി കാണുന്നു. ഉയർന്നുവരുന്ന വിമർശനങ്ങളും പോരായ്മകളും പരിശോധിച്ച് തിരുത്തൽ നടപടികൾ സ്വീകരിക്കുമെന്നും പാർട്ടി വ്യക്തമാക്കി.
കേരളത്തിൽ ബിജെപി മൂന്ന് സീറ്റുകൾ നേടിയത് അതീവ ഗൗരവമുള്ള കാര്യമാണെന്ന് സിപിഎം പ്രസ്താവനയിൽ ചൂണ്ടിക്കാട്ടി. ഈ മൂന്ന് മണ്ഡലങ്ങളിലും ബിജെപിയുമായി നേരിട്ട് പോരാടിയത് എൽഡിഎഫ് ആണെന്നും യുഡിഎഫ് ഇവിടെ മൂന്നാം സ്ഥാനത്തേക്ക് പോയെന്നും പാർട്ടി നിരീക്ഷിക്കുന്നു. കേരളം കാത്തുസൂക്ഷിക്കുന്ന മതസൗഹാർദ്ദത്തിന് വർഗീയ രാഷ്ട്രീയം ഭീഷണിയാണെന്നും ഇതിനെതിരെ ശക്തമായ പോരാട്ടം തുടരുമെന്നും സെക്രട്ടേറിയേറ്റ് അറിയിച്ചു.
മതരാഷ്ട്ര രൂപീകരണത്തിനെതിരായ പോരാട്ടത്തിലും ഫെഡറലിസം സംരക്ഷിക്കുന്നതിലും സർക്കാർ നടത്തിയ നീക്കങ്ങൾ ജനകീയ അടിത്തറയുള്ളതായിരുന്നു. എന്നാൽ തിരിച്ചടിയുടെ കാരണങ്ങൾ വരും ദിവസങ്ങളിൽ വിശദമായി ചർച്ച ചെയ്ത് പരിഹരിക്കുമെന്നും പാർട്ടി ഉറപ്പുനൽകി.
Story Summary: Pinarayi Vijayan resigned as Kerala Chief Minister following LDF’s defeat in the 2026 Assembly elections. The CPM State Secretariat termed the loss “unexpected” and expressed concern over BJP winning three seats in the state, promising a detailed review of the setbacks.
