ജയ്പൂർ: രാജസ്ഥാൻ റോയൽസ് ഉയർത്തിയ കൂറ്റൻ വിജയലക്ഷ്യമായ 229 റൺസ് അനായാസം മറികടന്ന് സൺറൈസേഴ്സ് ഹൈദരാബാദിന് അഞ്ച് വിക്കറ്റിന്റെ തകർപ്പൻ വിജയം. അഭിഷേക് ശർമയുടെയും ഇഷാൻ കിഷന്റെയും വെടിക്കെട്ട് ബാറ്റിംഗാണ് ഹൈദരാബാദിന് തുണയായത്. രാജസ്ഥാന് വേണ്ടി കൗമാരതാരം വൈഭവ് സൂര്യവംശി സെഞ്ചുറി നേടിയെങ്കിലും ടീമിനെ വിജയത്തിലെത്തിക്കാൻ അത് മതിയാവാതെ പോയി.(IPL 2026, Vaibhav Sooryavanshi’s ton in vain SRH chase down 229 to seal five-wicket win)
229 റൺസ് ലക്ഷ്യമിട്ടിറങ്ങിയ ഹൈദരാബാദിന് തുടക്കത്തിൽ ട്രാവിസ് ഹെഡിനെ (6) നഷ്ടമായെങ്കിലും, രണ്ടാം വിക്കറ്റിൽ ഒന്നിച്ച അഭിഷേക് ശർമയും ഇഷാൻ കിഷനും ചേർന്ന് കളം നിറഞ്ഞു കളിച്ചു. ഇരുവരും തകർത്തടിച്ചതോടെ പവർപ്ലേയിൽ തന്നെ ഹൈദരാബാദ് സ്കോർ 89-ൽ എത്തി. അഭിഷേക് ശർമ (29 പന്തിൽ 57) പുറത്തായതിന് പിന്നാലെ ക്രീസിലെത്തിയ ഇഷാൻ കിഷൻ വെടിക്കെട്ട് തുടർന്നു. 31 പന്തിൽ 74 റൺസാണ് കിഷൻ അടിച്ചെടുത്തത്.
ഹെന്റിച്ച് ക്ലാസൻ (24 പന്തിൽ 29), നിതീഷ് കുമാർ റെഡ്ഡി (18 പന്തിൽ 36) എന്നിവർ ചേർന്ന് ഇന്നിങ്സ് സുരക്ഷിതമായി മുന്നോട്ട് നയിച്ചു. 18.3 ഓവറിൽ ഹൈദരാബാദ് ലക്ഷ്യം മറികടന്നു. രാജസ്ഥാൻ റോയൽസിന്റെ യുവതാരം വൈഭവ് സൂര്യവംശി ഐപിഎല്ലിലെ തന്റെ രണ്ടാം സെഞ്ചുറിയുമായി തിളങ്ങി. 1000 ടി20 റൺസ് തികയ്ക്കുന്ന ഏറ്റവും പ്രായം കുറഞ്ഞ താരമെന്ന നേട്ടം വൈഭവ് സ്വന്തമാക്കി. 37 പന്തിൽ 103 റൺസാണ് താരം അടിച്ചുകൂട്ടിയത്. 15 പന്തിൽ അർധസെഞ്ചുറി പൂർത്തിയാക്കിയ വൈഭവ്, പ്രഫുൽ ഹിംഗെയുടെ ആദ്യ ഓവറിൽ തന്നെ നാല് സിക്സറുകൾ പായിച്ച് തുടക്കം ഗംഭീരമാക്കി. 14-ാം ഓവറിലാണ് താരം തന്റെ സെഞ്ചുറി പൂർത്തിയാക്കിയത്. തൊട്ടടുത്ത പന്തിൽ താരം എൽബിഡബ്ല്യു ആയി മടങ്ങി. നേരത്തെ ആദ്യം ബാറ്റ് ചെയ്ത രാജസ്ഥാൻ, വൈഭവിനെ കൂടാതെ ധ്രുവ് ജുറെൽ (37 പന്തിൽ 51), ഡോണോവൻ ഫെരേര (16 പന്തിൽ 33) എന്നിവരുടെ മികവിലാണ് നിശ്ചിത 20 ഓവറിൽ 228 റൺസെന്ന മികച്ച സ്കോർ പടുത്തുയർത്തിയത്.
