കൊച്ചി: കറുപ്പും വെളുപ്പും എന്ന നിറത്തിന്റെ പേരിൽ ഇന്നും സമൂഹത്തിൽ നിലനിൽക്കുന്ന വേർതിരിവുകളെ വരച്ചുകാട്ടുന്ന ‘ഇരുനിറം’ എന്ന ചിത്രം ഒടിടി പ്ലാറ്റ്ഫോമായ മനോരമ മാക്സിൽ റിലീസ് ചെയ്തു (Iruniram Malayalam Movie). വിഷ്ണു കെ. മോഹന്റെ രചനയിൽ ജിന്റോ തോമസ് സംവിധാനം ചെയ്ത ഈ ചിത്രം, ഏഴാം ക്ലാസുകാരിയായ അമ്പിളി എന്ന പെൺകുട്ടിയുടെ ജീവിതത്തിലൂടെയാണ് കഥ പറയുന്നത്.
ലോകത്തിലെ ഏറ്റവും നല്ല നിറം തേടിയിറങ്ങുന്ന ഒരു പെൺകുട്ടിയുടെ കഥയാണ് ‘ഇരുനിറം’. “വെളുപ്പും കറുപ്പും എന്ന് വേർതിരിക്കുന്ന ഒരു മതിൽ ഇപ്പോഴും സമൂഹത്തിലുണ്ട്, ആ മതിൽ തകർക്കാനാണ് ഈ സിനിമ ശ്രമിക്കുന്നത്” എന്ന് സംവിധായകൻ ജിന്റോ തോമസ് പറഞ്ഞു. കുട്ടികളിലുണ്ടാകുന്ന നിറം സംബന്ധിച്ച ബോധവും അത് അവരിൽ സൃഷ്ടിക്കുന്ന പ്രശ്നങ്ങളുമാണ് സിനിമയുടെ കാതൽ.
അഭിനേതാക്കളും അണിയറപ്രവർത്തകരും
രജനീകാന്ത് ചിത്രം ‘വേട്ടയാനി’ലൂടെ ശ്രദ്ധേയയായ തന്മയ സോൾ ആണ് ഇതിലെ കേന്ദ്ര കഥാപാത്രമായ അമ്പിളിയെ അവതരിപ്പിക്കുന്നത്.
ജിയോ ബേബി, നിഷ സാരംഗ്, ദിനീഷ് ആലപ്പി, പ്രദീപ് ബാലൻ, കബനി സാറ, അജിത, പോൾ ഡി. ജോസഫ് തുടങ്ങിയവർ അഭിനയിക്കുന്നു.
റെജി ജോസഫ് ഛായാഗ്രഹണവും പ്രഹ്ലാദ് പുത്തഞ്ചേരി എഡിറ്റിംഗും നിർവ്വഹിക്കുന്നു. സാൻഡിയാണ് സംഗീതവും പശ്ചാത്തല സംഗീതവും നൽകിയിരിക്കുന്നത്. മാളോല പ്രൊഡക്ഷൻസിന്റെ ബാനറിൽ സിജി മാളോലയാണ് ചിത്രം നിർമ്മിച്ചിരിക്കുന്നത്.
സമൂഹത്തിലെ ജാതി-നിറം ചിന്താഗതികളെ തുറന്നുകാട്ടുന്ന ഈ കൊച്ചു ചിത്രം ഇതിനോടകം തന്നെ ഒടിടിയിൽ പ്രേക്ഷക ശ്രദ്ധ നേടുന്നുണ്ട്.
Story Summary: The Malayalam movie ‘Iruniram’, directed by Jinto Thomas, is now streaming on Manorama Max. Starring Tanmayi Sol, known for the movie Vettaiyan, the film addresses social issues like colourism and caste discrimination through the eyes of a 7th-grade student, Ambili. The film, produced by Siji Malola, aims to break the invisible walls of racial bias in contemporary society.
