കൊച്ചി: നവാഗതനായ അരുൺ അനിരുദ്ധൻ സംവിധാനം ചെയ്യുന്ന ‘അതിരടി’ എന്ന ചിത്രത്തിന് വേണ്ടി നടത്തിയ വലിയ ശാരീരിക മാറ്റങ്ങളെക്കുറിച്ച് മനസ്സ് തുറന്ന് നടനും സംവിധായകനുമായ ബേസിൽ ജോസഫ് (Basil Joseph Weight Loss). ചിത്രത്തിൽ ഒരു കോളേജ് വിദ്യാർത്ഥിയായി മാറുന്നതിന് വേണ്ടി 15 കിലോ ശരീരഭാരമാണ് ബേസിൽ കുറച്ചത്. ടൊവിനോ തോമസ്, വിനീത് ശ്രീനിവാസൻ എന്നിവർക്കൊപ്പം ക്യൂ സ്റ്റുഡിയോയ്ക്ക് നൽകിയ അഭിമുഖത്തിലാണ് ബേസിൽ തന്റെ ഈ മാറ്റത്തെക്കുറിച്ച് സംസാരിച്ചത്.
“സാം ബോയ്” എന്ന കോളേജ് വിദ്യാർത്ഥിയുടെ വേഷമാണ് ചിത്രത്തിൽ ബേസിൽ കൈകാര്യം ചെയ്യുന്നത്. യഥാർത്ഥ ജീവിതത്തിൽ വിവാഹിതനും ഒരു കുട്ടിയുടെ അച്ഛനുമായ താൻ, വെറുതെ ക്ലീൻ ഷേവ് ചെയ്താൽ മാത്രം കോളേജ് പയ്യനാകില്ലെന്ന് തനിക്ക് ഉറപ്പായിരുന്നുവെന്ന് ബേസിൽ പറയുന്നു.
കഴിഞ്ഞ പത്ത് മാസമായി മറ്റ് ജോലികൾ മാറ്റി വെച്ച് ദിവസവും രണ്ട് മണിക്കൂർ വർക്കൗട്ടിനും ഫാസ്റ്റിങ്ങിനുമായി താരം ചിലവഴിച്ചു. എക്സ്ട്രീം ലെവലിലുള്ള അധ്വാനമാണ് ഇതിനായി നടത്തിയത്.
34 ഇഞ്ച് ആയിരുന്ന പാന്റിന്റെ അളവ് ഇപ്പോൾ 28-ലേക്ക് എത്തിയിരിക്കുകയാണ്. 75 കിലോയിൽ നിന്ന് 60 കിലോയിലേക്കാണ് ബേസിൽ ഭാരം കുറച്ചത്. കഴിഞ്ഞ രണ്ട് വർഷം തന്റെ ജീവിതത്തിന്റെ ഒരു ഭാഗം തന്നെ ഈ സിനിമയ്ക്കായി നീക്കി വെച്ചതായും താരം വ്യക്തമാക്കി.
‘മരണമാസ്’, ‘പൊൻമാൻ’, ‘സൂക്ഷ്മദർശിനി’ എന്നീ ചിത്രങ്ങൾക്ക് ശേഷം പ്രേക്ഷകർക്ക് തന്നിലുള്ള പ്രതീക്ഷ വർദ്ധിച്ചിട്ടുണ്ടെന്നും, ആ നിലവാരത്തിൽ നിന്ന് പിന്നോട്ട് പോകാൻ കഴിയില്ലെന്ന ബാധ്യത തനിക്കുണ്ടെന്നും ബേസിൽ കൂട്ടിച്ചേർത്തു.
ബേസിൽ തന്നെ നിർമ്മാണ പങ്കാളിയാകുന്ന ‘അതിരടി’ ഒരു പക്കാ ആക്ഷൻ എന്റർടെയ്നർ ആയിരിക്കുമെന്നാണ് സൂചന. ലുക്ക് ടെസ്റ്റ് കഴിഞ്ഞപ്പോൾ എല്ലാവരും ‘കോളേജ് പയ്യൻ’ എന്ന് വിശേഷിപ്പിച്ചത് വലിയ ആത്മവിശ്വാസം നൽകിയെന്നും താരം പറഞ്ഞു. ബേസിലിന്റെ കരിയറിലെ ഏറ്റവും വലിയ മേക്കോവർ ആയിരിക്കും ഈ ചിത്രത്തിലേതെന്നാണ് ആരാധകരുടെ വിലയിരുത്തൽ.
Story Summary: Actor-director Basil Joseph shared his incredible physical transformation for the upcoming film Athiradi, directed by Arun Anirudhan. To portray the role of “Sam Boy,” a college student, Basil lost 15 kg through a rigorous 10-month routine of fasting and exercise. His weight dropped from 75 kg to 60 kg, and his waist size reduced from 34 to 28 inches. Basil noted that this dedication was necessary to meet audience expectations following his recent hits.
