ബിജ്നോർ: സൈബർ കുറ്റവാളികളുടെ ഭീഷണിയെത്തുടർന്നുണ്ടായ മാനസിക സമ്മർദ്ദത്തിൽ ഉത്തർപ്രദേശിലെ ബിജ്നോറിൽ 28-കാരിയായ യുവതി ജീവനൊടുക്കി. രൺധീറിന്റെ ഭാര്യ മോണിക്കയാണ് രണ്ട് പെൺമക്കളെ ഉറക്കിക്കിടത്തിയ ശേഷം ആത്മഹത്യ ചെയ്തത്. ‘ഡിജിറ്റൽ അറസ്റ്റ്’ എന്ന പുതിയ തരം സൈബർ തട്ടിപ്പിന്റെ ഇരയായിരുന്നു മോണിക്കയെന്ന് പോലീസ് കണ്ടെത്തി.(Sorry, mumma has to die, UP woman ends life amid digital arrest ordeal)
ആദ്യം സ്വാഭാവിക മരണമെന്ന് കരുതി ബന്ധുക്കൾ സംസ്കാര ചടങ്ങുകൾ നടത്തിയെങ്കിലും പിന്നീട് കണ്ടെത്തിയ ആത്മഹത്യക്കുറിപ്പാണ് മരണത്തിലെ ദുരൂഹത നീക്കിയത്. എട്ട് വയസ്സുകാരിയായ മകൾ ജിയയെ അഭിസംബോധന ചെയ്തുകൊണ്ടുള്ള കുറിപ്പിൽ ഇങ്ങനെ പറയുന്നു: “ക്ഷമിക്കണം ജിയ, അമ്മയ്ക്ക് മരിക്കേണ്ടി വരും.”
താൻ കടുത്ത മാനസിക സമ്മർദ്ദത്തിലാണെന്നും ഒരാൾ തന്നെ നിരന്തരം ബ്ലാക്ക്മെയിൽ ചെയ്യുന്നുണ്ടെന്നും ഭർത്താവിനെ അഭിസംബോധന ചെയ്ത കുറിപ്പിൽ മോണിക്ക വ്യക്തമാക്കിയിരുന്നു. തുടര്ന്ന് നടത്തിയ പരിശോധനയിൽ മോണിക്കയുടെ ഫോണിലേക്ക് ക്രൈംബ്രാഞ്ച് ഉദ്യോഗസ്ഥരെന്ന വ്യാജേന അഞ്ച് വ്യത്യസ്ത നമ്പറുകളിൽ നിന്ന് വാട്സാപ്പ് കോളുകളും സന്ദേശങ്ങളും വന്നതായി കണ്ടെത്തി.
മയക്കുമരുന്ന് കടത്ത് ഉൾപ്പെടെയുള്ള ഗുരുതരമായ കുറ്റകൃത്യങ്ങളിൽ മോണിക്കയ്ക്ക് പങ്കുണ്ടെന്ന് വിശ്വസിപ്പിച്ചാണ് തട്ടിപ്പുകാർ ഇവരെ കുടുക്കിയത്. ‘ഡിജിറ്റൽ അറസ്റ്റ്’ എന്ന തന്ത്രത്തിലൂടെ വീട്ടിൽ നിന്ന് പുറത്തിറങ്ങാനോ ആരോടും സംസാരിക്കാനോ കഴിയാത്ത വിധം മാനസികമായി തളർത്തി പണം തട്ടിയെടുക്കുകയായിരുന്നു ലക്ഷ്യം. മോണിക്കയുടെ ജീവിതം നശിപ്പിക്കുമെന്ന് ഭീഷണിപ്പെടുത്തി ഇവർ കടുത്ത സമ്മർദ്ദമാണ് ചെലുത്തിയിരുന്നത്.
മോണിക്കയുടെ സംസ്കാര ചടങ്ങുകൾ നടക്കുമ്പോഴും ഇതേ നമ്പറുകളിൽ നിന്ന് വീഡിയോ കോളുകൾ വന്നുകൊണ്ടിരുന്നു. മോണിക്കയുടെ അനന്തരവൻ സൻയോഗ് കോൾ എടുത്തപ്പോൾ പോലീസ് യൂണിഫോം ധരിച്ച ഒരാളാണ് വീഡിയോയിൽ ഉണ്ടായിരുന്നത്. താൻ ക്രൈംബ്രാഞ്ച് ഉദ്യോഗസ്ഥനാണെന്നും മോണിക്കയുമായി സംസാരിക്കണമെന്നും ഇയാൾ ആവശ്യപ്പെട്ടു. മോണിക്ക മരിച്ച വിവരം പറഞ്ഞപ്പോൾ നിയമനടപടി നേരിടേണ്ടി വരുമെന്ന് ഭീഷണിപ്പെടുത്തുകയായിരുന്നു. ബുധനാഴ്ച വരെയും കുടുംബാംഗങ്ങളെ വിളിച്ചുകൊണ്ടിരുന്ന പ്രതികൾ മോണിക്കയുടെ ഭർത്താവിനെ ജയിലിലടയ്ക്കുമെന്നും കുടുംബത്തെ മുഴുവൻ ഉപദ്രവിക്കുമെന്നും ഭീഷണിപ്പെടുത്തി.
ഭർത്താവ് രൺധീറിന്റെ പരാതിയിൽ ഭാരതീയ ന്യായ സംഹിത സെക്ഷൻ 108 പ്രകാരം പോലീസ് എഫ്ഐആർ രജിസ്റ്റർ ചെയ്തു. ആത്മഹത്യക്കുറിപ്പും മൊബൈൽ ഫോണിലെ വിവരങ്ങളും പോലീസ് ശാസ്ത്രീയ പരിശോധനയ്ക്ക് വിധേയമാക്കിയിട്ടുണ്ട്. കുറ്റവാളികളെ കണ്ടെത്താൻ സൈബർ വിഭാഗത്തിന്റെ സഹായം തേടി. ഭയം ആയുധമാക്കി സൈബർ കുറ്റവാളികൾ നടത്തുന്ന ഇത്തരം ക്രൂരതകൾക്കെതിരെ ജാഗ്രത പാലിക്കണമെന്ന് പോലീസ് മുന്നറിയിപ്പ് നൽകുന്നു.
