ചെന്നൈ: പ്രശസ്ത ഇൻസ്റ്റഗ്രാം ഇൻഫ്ലുവൻസറും ‘ശ്രീ സായ് സിൽക്സ്’ ഉടമയുമായ നാഗലക്ഷ്മി ചെന്നൈ നങ്കനല്ലൂരിലെ വീട്ടിൽ കൊല്ലപ്പെട്ട നിലയിൽ (Nagalakshmi Murder). ഭാര്യയെ വെട്ടിക്കൊന്ന ശേഷം ഭർത്താവ് സുബ്രഹ്മണ്യൻ തൂങ്ങിമരിച്ചു. ദാമ്പത്യ തർക്കങ്ങളാണ് ദാരുണമായ ഈ സംഭവത്തിലേക്ക് നയിച്ചതെന്നാണ് പ്രാഥമിക നിഗമനം.
ദാമ്പത്യപ്രശ്നങ്ങളെ തുടർന്ന് ദീർഘകാലമായി പിരിഞ്ഞു താമസിക്കുകയായിരുന്നു ഇരുവരും. ഭർത്താവുമായി അകന്ന ശേഷമാണ് നാഗലക്ഷ്മി സാരി ബിസിനസിലേക്ക് സജീവമായി ഇറങ്ങിയത്. ഇൻസ്റ്റഗ്രാം വഴി ബിസിനസ് വിപുലീകരിച്ച അവർക്ക് മൂന്നര ലക്ഷത്തോളം ഫോളോവേഴ്സാണുള്ളത്. തന്റെ ബിസിനസ് മികവിലൂടെ ‘ശ്രീ സായ് സിൽക്സ്’ എന്ന വസ്ത്ര വ്യാപാര സ്ഥാപനം ചെന്നൈയിൽ കെട്ടിപ്പടുക്കുന്നതിലും അവർ വിജയിച്ചു.
മധുരയിൽ ബന്ധുവിനൊപ്പം താമസിക്കുകയായിരുന്ന സുബ്രഹ്മണ്യൻ അടുത്തിടെയാണ് ചെന്നൈയിൽ തിരിച്ചെത്തിയത്. പഴയ തെറ്റുകൾക്ക് ക്ഷമ ചോദിക്കാനും വീണ്ടും ഒന്നിച്ചു താമസിക്കാനുമുള്ള ആഗ്രഹം പ്രകടിപ്പിക്കാനുമാണ് ഇയാൾ നാഗലക്ഷ്മിയെ കാണാനെത്തിയത്. എന്നാൽ ഈ കൂടിക്കാഴ്ച വാക്കുതർക്കത്തിൽ കലാശിക്കുകയും പ്രകോപിതനായ സുബ്രഹ്മണ്യൻ നാഗലക്ഷ്മിയെ വെട്ടിക്കൊലപ്പെടുത്തുകയുമായിരുന്നു. ഇതിനു പിന്നാലെ ഇയാൾ തൂങ്ങിമരിക്കുകയും ചെയ്തു. പോലീസ് സംഭവസ്ഥലത്തെത്തി അന്വേഷണം ആരംഭിച്ചിട്ടുണ്ട്.
Story Summary: Nagalakshmi, a popular Instagram influencer and entrepreneur behind ‘Shree Sai Silks’, was murdered by her estranged husband, Subramanian, at her residence in Nanganallur, Chennai. Subramanian later committed suicide. The incident followed a dispute over his request to reconcile after a long period of separation.
