കൊച്ചി: പ്രണയവിവാഹത്തെ എതിർത്തതിലുള്ള വൈരാഗ്യത്തിന് പിതൃസഹോദരനെ കാറിടിച്ച് കൊലപ്പെടുത്താൻ ശ്രമിച്ച കേസിൽ അറസ്റ്റിലായ അയ്യപ്പൻകാവ് സ്വദേശി അഭിജിത്ത് പ്രസാദിനെ കുറിച്ച് ഞെട്ടിക്കുന്ന വിവരങ്ങൾ പുറത്ത്. സ്വന്തം അമ്മയെ ഇയാൾ ക്രൂരമായി മർദ്ദിക്കാൻ ശ്രമിക്കുന്ന ദൃശ്യങ്ങളാണ് ഇപ്പോൾ പുറത്തുവന്നിരിക്കുന്നത്.(Attempted murder case, Footage of the accused brutally beating his mother out )
കഴിഞ്ഞ മാസം 22-നായിരുന്നു അമ്മയെ അഭിജിത്ത് മർദ്ദിക്കാൻ ശ്രമിച്ചത്. വീട്ടിലെ സിസിടിവി ദൃശ്യങ്ങളിൽ പ്രതി അമ്മയെ ഉപദ്രവിക്കുന്നത് പതിഞ്ഞിട്ടുണ്ട്. ഈ സംഭവത്തിൽ കൊച്ചി നോർത്ത് പോലീസ് നേരത്തെ കേസെടുത്തിരുന്നെങ്കിലും തുടർനടപടികൾ ഉണ്ടായില്ലെന്ന ആക്ഷേപം ശക്തമാണ്. ലഹരി ഉപയോഗിച്ചാണോ ഇയാൾ വീട്ടിൽ അതിക്രമം കാട്ടിയതെന്ന് പോലീസ് പരിശോധിച്ചുവരികയാണ്.
പിതൃസഹോദരനായ സത്യപാലനെ (61) ആണ് അഭിജിത്ത് അപായപ്പെടുത്താൻ ശ്രമിച്ചത്. സ്കൂട്ടറിൽ യാത്ര ചെയ്യുകയായിരുന്ന സത്യപാലനെ കാറിടിച്ച് വീഴ്ത്തുകയായിരുന്നു. അപകടമാണെന്ന് ആദ്യം കരുതിയെങ്കിലും സിസിടിവി ദൃശ്യങ്ങൾ പരിശോധിച്ചതോടെയാണ് ഇത് ആസൂത്രിതമായ കൊലപാതക ശ്രമമാണെന്ന് ബോധ്യപ്പെട്ടത്. ഇഷ്ടപ്പെട്ട യുവതിയുമായുള്ള തന്റെ വിവാഹത്തിന് തടസ്സം നിൽക്കുന്നത് സത്യപാലനാണെന്ന് പ്രതി ഉറച്ചു വിശ്വസിച്ചിരുന്നു. ഇതിലുള്ള പകയാണ് ആക്രമണത്തിൽ കലാശിച്ചത്.
