കാർനാർഫോൺ: ഒരിക്കൽ ചാൾസ് രാജാവിന് വിരുന്നൊരുക്കിയ പൗരാണിക കൊട്ടാരത്തിൽ വൻ കഞ്ചാവ് തോട്ടം കണ്ടെത്തി. വടക്കൻ വെയ്ൽസിലെ ഗ്വിനെഡിലുള്ള ചരിത്രപ്രസിദ്ധമായ പ്ലാസ് ഗ്ലിൻലിഫോൺ കൊട്ടാരത്തിലാണ് പോലീസ് റെയ്ഡ് നടത്തിയത്. കെട്ടിടത്തിന്റെ മുകളിലത്തെ നിലയിൽ 12 മുറികളിലായി വ്യാപിച്ചുകിടക്കുന്ന വലിയൊരു കഞ്ചാവ് തോട്ടമാണ് കണ്ടെത്തിയത്.(A palace that once hosted a British king is now a cannabis plantation, North Wales in shock)
രഹസ്യവിവരത്തെത്തുടർന്ന് ചൊവ്വാഴ്ച നടത്തിയ പരിശോധനയിലാണ് അമ്പരപ്പിക്കുന്ന വിവരങ്ങൾ പുറത്തുവന്നത്. തോട്ടത്തിൽ കൃഷി ചെയ്തിരുന്ന ചെടികൾ വിളവെടുപ്പിന് പാകമായ നിലയിലായിരുന്നുവെന്ന് പോലീസ് സൂപ്രണ്ട് അർവെൽ ലൂയിസ് അറിയിച്ചു. കഞ്ചാവ് കൃഷിക്കായി കൊട്ടാരത്തിലെ വൈദ്യുതി ബന്ധത്തിലും ജലവിതരണത്തിലും വലിയ മാറ്റങ്ങൾ വരുത്തിയിട്ടുണ്ട്. ഡിജിറ്റൽ തെളിവുകളും ഫൊറൻസിക് പരിശോധനകളും പൂർത്തിയാക്കി പ്രതികളെ ഉടൻ പിടികൂടുമെന്ന് പോലീസ് വ്യക്തമാക്കി.
1830-കളിൽ നിർമ്മിക്കപ്പെട്ട ഈ മന്ദിരം ചരിത്രപ്രാധാന്യമുള്ള ‘ഗ്രേഡ്-1’ പട്ടികയിൽ ഉൾപ്പെട്ടതാണ്. 1969 ജൂലൈ 1-ന് കാർനാർഫോൺ കോട്ടയിൽ നടന്ന ചടങ്ങിലാണ് ഇപ്പോഴത്തെ ബ്രിട്ടീഷ് രാജാവായ ചാൾസ് മൂന്നാമൻ ‘പ്രിൻസ് ഓഫ് വെയ്ൽസ്’ ആയി അധികാരമേറ്റത്. അന്ന് അദ്ദേഹത്തിന് വേണ്ടി ഔദ്യോഗിക വിരുന്ന് സംഘടിപ്പിച്ചത് ഈ കൊട്ടാരത്തിലായിരുന്നു. നിലവിൽ സ്വകാര്യ ഉടമസ്ഥതയിലുള്ള ഈ മന്ദിരം നാശത്തിന്റെ വക്കിലാണെന്ന് പോലീസ് പറഞ്ഞു. കൊട്ടാരത്തിന് ചുറ്റുമുള്ള 16 ഏക്കർ പൂന്തോട്ടം വിനോദസഞ്ചാരികൾക്കായി തുറന്നുനൽകാറുണ്ടെങ്കിലും കെട്ടിടത്തിന് അകത്ത് നടന്ന ഈ നിയമവിരുദ്ധ പ്രവർത്തനങ്ങൾ അധികൃതരെപ്പോലും അമ്പരപ്പിച്ചിരിക്കുകയാണ്. അന്വേഷണം പൂർത്തിയാകുന്നത് വരെ പ്രദേശത്ത് പോലീസ് കാവൽ ഏർപ്പെടുത്തിയിട്ടുണ്ട്.
