കോഴിക്കോട്: കോഴിക്കോട് കക്കട്ടിൽ സഹകരണ ബാങ്കിന്റെ തളീക്കര ശാഖ മാനേജരും സി.പി.എം പ്രാദേശിക നേതാവുമായ ഗനീഷ് കുമാർ പി.കെ.യെ മരിച്ച നിലയിൽ കണ്ടെത്തി (CPM leader found dead Kozhikode). വീടിന് സമീപത്തെ മുറുവശേരി വായനശാലയ്ക്കുള്ളിലാണ് മൃതദേഹം കണ്ടെത്തിയത്.
തിങ്കളാഴ്ച രാവിലെ പതിവുപോലെ പ്രഭാതസവാരിക്കായി വീട്ടിൽ നിന്ന് പോയ ഗനീഷ് കുമാർ തിരികെയെത്താതിരുന്നതിനെ തുടർന്ന് ബന്ധുക്കൾ നടത്തിയ തിരച്ചിലിലാണ് മൃതദേഹം കണ്ടെത്തിയത്. ഉടൻ പൊലീസിനെ വിവരം അറിയിക്കുകയും ഉദ്യോഗസ്ഥർ സ്ഥലത്തെത്തി പരിശോധന നടത്തുകയും ചെയ്തു.
സഹകരണ ബാങ്ക് ബ്രാഞ്ച് മാനേജരായി ജോലി ചെയ്തിരുന്ന ഗനീഷ് കുമാർ സി.പി.എം ലോക്കൽ കമ്മിറ്റി അംഗവും കർഷകസംഘം മേഖലാ സെക്രട്ടറിയുമായിരുന്നു. കഴിഞ്ഞ തദ്ദേശ സ്വയംഭരണ തിരഞ്ഞെടുപ്പിന് ശേഷം പാർട്ടി ചുമതലകളിൽ നിന്ന് അദ്ദേഹത്തെ മാറ്റിയിരുന്നുവെന്നാണ് വിവരം.
മരണത്തിന് പിന്നിൽ വ്യക്തിപരമോ കുടുംബപരമോ ആയ കാരണങ്ങളാകാമെന്ന തരത്തിലുള്ള വിവരങ്ങൾ പ്രചരിക്കുന്നുണ്ടെങ്കിലും, ഇതുസംബന്ധിച്ച് ഔദ്യോഗിക സ്ഥിരീകരണമൊന്നും ഉണ്ടായിട്ടില്ല. മരണകാരണം സംബന്ധിച്ച് പൊലീസ് അന്വേഷണം ആരംഭിച്ചിട്ടുണ്ടെന്നും പോസ്റ്റ്മോർട്ടം റിപ്പോർട്ട് ഉൾപ്പെടെയുള്ള പരിശോധനകൾക്ക് ശേഷമേ കൂടുതൽ വ്യക്തത ലഭിക്കുകയുള്ളുവെന്നും അധികൃതർ അറിയിച്ചു.
Story Summary:
A cooperative bank branch manager and local CPM leader was found dead inside a reading room near his residence in Kozhikode. Police have launched an investigation, and the exact cause of death is yet to be confirmed.
