കാസർഗോഡ്: എലിവിഷം അബദ്ധത്തിൽ ഉള്ളിൽച്ചെന്ന് ചികിത്സയിലായിരുന്ന വീട്ടമ്മ മരിച്ചു. കാസർഗോഡ് കോളിച്ചാൽ മൊട്ടയംകൊച്ചി സ്വദേശിനി ബി.പി. ശോഭന (53) ആണ് കോഴിക്കോട് മെഡിക്കൽ കോളേജ് ആശുപത്രിയിൽ ചികിത്സയിലിരിക്കെ മരിച്ചത്.(Rat poison accidentally spilled into glass, Woman dies after drinking water)
വീട്ടിൽ എലിക്കു വിഷം വെക്കുന്നതിനിടെ അബദ്ധത്തിൽ വിഷം തെറിച്ച് ഗ്ലാസിൽ വീഴുകയായിരുന്നുവെന്നാണ് വിവരം. ഈ ഗ്ലാസിൽ വിഷമുണ്ടെന്ന് അറിയാതെ ശോഭന ഇതിൽ നിന്ന് വെള്ളം കുടിക്കുകയായിരുന്നു.
വിഷം ഉള്ളിൽച്ചെന്ന് ദേഹാസ്വാസ്ഥ്യം അനുഭവപ്പെട്ട ശോഭനയെ ആശുപത്രിയിൽ എത്തിച്ചു. ആദ്യം മംഗളൂരുവിലെയും പിന്നീട് കണ്ണൂരിലെയും സ്വകാര്യ ആശുപത്രികളിൽ പ്രവേശിപ്പിച്ചു. നില വഷളായതിനെ തുടർന്ന് കോഴിക്കോട് മെഡിക്കൽ കോളേജ് ആശുപത്രിയിലേക്ക് മാറ്റിയെങ്കിലും ജീവൻ രക്ഷിക്കാനായില്ല.
