ന്യൂഡൽഹി: രാജ്യത്ത് അഭിപ്രായ സ്വാതന്ത്ര്യത്തിനും സമാധാനപരമായി പ്രതിഷേധിക്കാനുള്ള പൗരന്മാരുടെ അവകാശത്തിനും സംരക്ഷണം കുറഞ്ഞുവരുന്നുവെന്ന് സുപ്രീംകോടതി ജഡ്ജി ജസ്റ്റിസ് ഉജ്ജൽ ഭുയാൻ (Justice Ujjal Bhuyan Freedom of Speech Remarks). പ്രതിഷേധിക്കുന്ന വിദ്യാർഥികളെ അറസ്റ്റ് ചെയ്ത് ദീർഘകാലം ജാമ്യം നിഷേധിക്കുന്ന സാഹചര്യങ്ങളും ചെറിയ സംഭവങ്ങളിൽ പോലും ആളുകളെ ജയിലിലടയ്ക്കുന്ന പ്രവണതയും ഭരണഘടന ഉറപ്പുനൽകുന്ന അടിസ്ഥാന അവകാശങ്ങളെ ദുർബലപ്പെടുത്തുന്നതാണെന്നും അദ്ദേഹം ചൂണ്ടിക്കാട്ടി.
ഭോപ്പാലിലെ നാഷണൽ ലോ ഇൻസ്റ്റിറ്റ്യൂട്ട് യൂണിവേഴ്സിറ്റിയിൽ നടന്ന അഞ്ചാമത് ജസ്റ്റിസ് ജി.പി. സിംഗ് മെമ്മോറിയൽ ലക്ചറിൽ സംസാരിക്കുകയായിരുന്നു ജസ്റ്റിസ് ഭുയാൻ. ജനാധിപത്യത്തിന്റെ അടിസ്ഥാന ഘടകങ്ങൾ സംവാദവും വിയോജിപ്പുമാണെന്നും, സമാധാനപരമായി പ്രതിഷേധിക്കാനുള്ള അവകാശം ഓരോ പൗരന്റെയും ഭരണഘടനാപരമായ അവകാശമാണെന്നും അദ്ദേഹം പറഞ്ഞു. അവകാശങ്ങൾക്കായി പ്രതിഷേധിക്കുന്ന വിദ്യാർഥികളെ പോലും അറസ്റ്റ് ചെയ്ത് 30 മുതൽ 40 ദിവസം വരെ ജാമ്യം ലഭിക്കാതെ ജയിലിൽ കഴിയേണ്ടി വരുന്ന സാഹചര്യം വർധിക്കുന്നതായി അദ്ദേഹം നിരീക്ഷിച്ചു. സാധാരണ ജനാധിപത്യ പ്രവർത്തനങ്ങളെ പോലും പലപ്പോഴും കുറ്റകൃത്യങ്ങളായി പരിഗണിക്കുന്ന പ്രവണത ആശങ്കപ്പെടുത്തുന്നതാണെന്നും ജസ്റ്റിസ് ഭുയാൻ വ്യക്തമാക്കി.
‘ചിക്കൻ ബിരിയാണി കഴിച്ചത് കുറ്റമല്ല’
ഗംഗാ നദിയിൽ ബോട്ടിൽ യാത്ര ചെയ്യുന്നതിനിടെ ചിക്കൻ ബിരിയാണി കഴിച്ചെന്നാരോപിച്ച് യുവാക്കളെ അറസ്റ്റ് ചെയ്ത സംഭവവും ജസ്റ്റിസ് ഭുയാൻ പ്രസംഗത്തിനിടെ പരാമർശിച്ചു. “ചിക്കൻ ബിരിയാണി കഴിക്കുന്നത് കുറ്റകൃത്യമാണെന്ന് തനിക്ക് തോന്നുന്നില്ല. ഗംഗാ നദിയിൽ ചിക്കൻ കഴിക്കുന്നത് വിലക്കുന്ന നിയമമില്ല. എന്നിട്ടും ഇത്തരം കേസുകളിൽ ആളുകളെ അറസ്റ്റ് ചെയ്ത് മാസങ്ങളോളം ജാമ്യം നിഷേധിക്കുന്നത് എങ്ങനെ ന്യായീകരിക്കാനാകും?” എന്നായിരുന്നു അദ്ദേഹത്തിന്റെ ചോദ്യം.
ജാമ്യവുമായി ബന്ധപ്പെട്ട് കോടതികൾ ഏർപ്പെടുത്തുന്ന ചില നിയന്ത്രണങ്ങളെക്കുറിച്ചും അദ്ദേഹം വിമർശനം ഉന്നയിച്ചു. ജാമ്യം ലഭിച്ച ശേഷവും പാസ്പോർട്ട് സമർപ്പിക്കണം, പൊതുയോഗങ്ങളിൽ പങ്കെടുക്കരുത്, പ്രസംഗിക്കരുത് തുടങ്ങിയ വ്യവസ്ഥകൾ വ്യക്തികളുടെ അഭിപ്രായ സ്വാതന്ത്ര്യത്തെ ബാധിക്കുന്നുവെന്നും അദ്ദേഹം അഭിപ്രായപ്പെട്ടു.
‘കോടതികൾ കൂടുതൽ സൂക്ഷ്മത പുലർത്തണം’
ജാമ്യം അനുവദിക്കുന്നതിലും അതിനോടനുബന്ധിച്ചുള്ള നിബന്ധനകൾ നിശ്ചയിക്കുന്നതിലും കോടതികൾ കൂടുതൽ സൂക്ഷ്മമായ സമീപനം സ്വീകരിക്കണമെന്ന് ജസ്റ്റിസ് ഭുയാൻ ആവശ്യപ്പെട്ടു. നീതിന്യായ വ്യവസ്ഥയുടെ തീരുമാനങ്ങൾ ജനാധിപത്യ അവകാശങ്ങളുടെ സംരക്ഷണവുമായി നേരിട്ട് ബന്ധപ്പെട്ടിരിക്കുന്നതിനാൽ അവ ഗൗരവത്തോടെ വിലയിരുത്തേണ്ടതുണ്ടെന്നും അദ്ദേഹം പറഞ്ഞു. വിരമിച്ച ജഡ്ജിമാർ പിന്നീട് രാഷ്ട്രീയ രംഗത്തേക്ക് പ്രവേശിക്കുന്നതിനെയും അദ്ദേഹം വിമർശിച്ചു. ഇത് അധികാര വിഭജനത്തിന്റെ അടിസ്ഥാന തത്വങ്ങളുമായി ബന്ധപ്പെട്ട ആശങ്കകൾ ഉയർത്തുന്നുവെന്നായിരുന്നു അദ്ദേഹത്തിന്റെ നിരീക്ഷണം.
പലസ്തീൻ വിഷയത്തിലെ പ്രതിഷേധ വിലക്കിലും പരാമർശം
ഗാസയിലെ മനുഷ്യാവകാശ വിഷയങ്ങൾ ഉയർത്തി പ്രതിഷേധിക്കാൻ അനുമതി നിഷേധിച്ച ബോംബെ ഹൈക്കോടതിയുടെ സമീപനവും ജസ്റ്റിസ് ഭുയാൻ പരാമർശിച്ചു. ഇന്ത്യ പലസ്തീനെ അംഗീകരിച്ച രാജ്യമാണെന്നും, രാജ്യത്ത് പലസ്തീൻ എംബസി പ്രവർത്തിക്കുന്നുണ്ടെന്നും അദ്ദേഹം ഓർമിപ്പിച്ചു. അന്താരാഷ്ട്ര തലത്തിൽ ചർച്ച ചെയ്യുന്ന വിഷയങ്ങളിൽ സമാധാനപരമായി അഭിപ്രായം പ്രകടിപ്പിക്കാൻ പൗരന്മാർക്ക് അവസരം ലഭിക്കേണ്ടതുണ്ടെന്നും അദ്ദേഹം കൂട്ടിച്ചേർത്തു. ബുൾഡോസർ നടപടികളെയും ജസ്റ്റിസ് ഭുയാൻ വിമർശിച്ചു. വിവിധ കോടതി വിധികൾ ഉദ്ധരിച്ചുകൊണ്ട് ഭരണഘടനാ മൂല്യങ്ങളും പൗരാവകാശങ്ങളും സംരക്ഷിക്കുന്നതിൽ കൂടുതൽ ജാഗ്രത ആവശ്യമാണെന്ന് അദ്ദേഹം വ്യക്തമാക്കി.
Summary: Supreme Court Justice Ujjal Bhuyan expressed concern over the declining protection of freedom of speech and the right to peaceful protests in India. He criticised prolonged denial of bail in minor cases and urged courts to adopt a more sensitive approach while protecting constitutional rights.
