വാഷിങ്ടൺ: യുദ്ധസാഹചര്യം അവസാനിപ്പിക്കുന്നതിനുള്ള ചർച്ചകളെ ഇറാൻ ഇപ്പോൾ കൂടുതൽ ഗൗരവത്തോടെ സമീപിക്കുന്നതായി തോന്നുന്നുവെന്ന് യുഎസ് പ്രസിഡന്റ് ഡൊണാൾഡ് ട്രംപ് (Trump Military Action Warning Iran). വൈറ്റ് ഹൗസിൽ മാധ്യമപ്രവർത്തകരോട് സംസാരിക്കവെയാണ് ട്രംപ് ഇക്കാര്യം വ്യക്തമാക്കിയത്. അതേസമയം, നയതന്ത്ര ശ്രമങ്ങൾ പരാജയപ്പെട്ടാൽ ഇറാനെതിരെ വീണ്ടും സൈനിക നടപടി സ്വീകരിക്കാൻ അമേരിക്ക പൂർണമായി സജ്ജമാണെന്നും അദ്ദേഹം മുന്നറിയിപ്പ് നൽകി.
ഇറാനുമായി ചർച്ചകൾ തുടരുകയാണെന്നും, എന്നാൽ അതിന്റെ ഫലം എന്തായിരിക്കുമെന്ന് ഇപ്പോൾ പ്രവചിക്കാനാകില്ലെന്നും ട്രംപ് പറഞ്ഞു. ആവശ്യമെങ്കിൽ ഏത് നിമിഷവും സൈനിക നടപടിയിലേക്ക് നീങ്ങാൻ അമേരിക്ക തയ്യാറാണെന്നും അദ്ദേഹം വ്യക്തമാക്കി. “ഞങ്ങൾ പൂർണമായും സജ്ജമാണ്. എന്നാൽ നിലവിൽ ചർച്ചകൾ നടക്കുകയാണ്. വീണ്ടും ആക്രമണത്തിലേക്ക് കടക്കേണ്ട സാഹചര്യം ഉണ്ടാകുമോ ഇല്ലയോ എന്ന് ഇപ്പോൾ പറയാനാകില്ല,” എന്നായിരുന്നു ട്രംപിന്റെ പ്രതികരണം. ഇറാൻ ഒരു കരാറിലെത്തുകയോ അല്ലെങ്കിൽ സംഘർഷത്തിൽ നിന്ന് പിന്മാറുകയോ ചെയ്യുമെന്ന പ്രതീക്ഷയും അദ്ദേഹം പങ്കുവച്ചു.
സംഘർഷം അവസാനിപ്പിക്കാൻ മുന്നിലുള്ളത് രണ്ട് വഴികളാണെന്നാണ് ട്രംപ് അഭിപ്രായപ്പെട്ടത്. ഒന്നാമത്തേത് സൈനിക നടപടികൾ തുടരുക എന്നതും, രണ്ടാമത്തേത് ചർച്ചകളിലൂടെ ഒരു ധാരണയിലെത്തുക എന്നതുമാണ്. ഇറാനുമായി ചർച്ചകൾ പുരോഗമിക്കുന്നുണ്ടെങ്കിലും കരാർ ഉറപ്പാണെന്ന് പറയാനാകില്ലെന്നും അദ്ദേഹം കൂട്ടിച്ചേർത്തു. ഇറാൻ വിഷയത്തിൽ അമേരിക്കയുടെ നിലപാട് ശക്തമായി തുടരുന്നതിനിടെയാണ് ട്രംപിന്റെ പുതിയ പ്രതികരണം. നയതന്ത്ര നീക്കങ്ങൾക്കും സൈനിക തയ്യാറെടുപ്പുകൾക്കും ഒരേസമയം പ്രാധാന്യം നൽകുന്ന സമീപനമാണ് യുഎസ് സ്വീകരിക്കുന്നതെന്നാണ് വിലയിരുത്തൽ.
Summary: US President Donald Trump said Iran has started taking negotiations more seriously but warned that Washington is prepared for military action if diplomacy fails. Trump stated that talks are ongoing, while keeping the option of further attacks open.
