ന്യൂഡൽഹി: നീറ്റ് ചോദ്യപ്പേപ്പർ ചോർച്ചയെ തുടർന്ന് കോക്രോച്ച് ജനത പാർട്ടി (സിജെപി) നേതൃത്വത്തിൽ ഡൽഹിയിൽ തുടരുന്ന വിദ്യാർഥി സമരവുമായി ബന്ധപ്പെട്ട് ബോളിവുഡ് താരം സൽമാൻ ഖാൻ വീണ്ടും പ്രതികരിച്ചു. സമരത്തിൽ പങ്കെടുക്കുന്ന വിദ്യാർഥികൾ ഇനി വീടുകളിലേക്ക് മടങ്ങണമെന്നും, കുറ്റക്കാർക്കെതിരെ കേന്ദ്ര സർക്കാർ കർശന നടപടി സ്വീകരിക്കുമെന്ന് താൻ വിശ്വസിക്കുന്നുവെന്നും അദ്ദേഹം പറഞ്ഞു. സാമൂഹിക പ്രവർത്തകൻ സോനം വാങ്ചുക്കിനോടും നിരാഹാര സമരം അവസാനിപ്പിക്കാൻ താരം അഭ്യർഥിച്ചു. (Salman Khan CJP Protest Statement)
സാമൂഹിക മാധ്യമത്തിൽ പങ്കുവെച്ച കുറിപ്പിലാണ് സൽമാൻ ഖാന്റെ പ്രതികരണം. വിദ്യാർഥികളുടെ വിദ്യാഭ്യാസവും സുരക്ഷയുമാണ് ഇപ്പോൾ ഏറ്റവും പ്രധാനമെന്നും, പ്രധാനമന്ത്രി നരേന്ദ്ര മോദി ഇതിനകം പ്രതികരിച്ച സാഹചര്യത്തിൽ ചോദ്യപ്പേപ്പർ ചോർച്ചയ്ക്ക് ഉത്തരവാദികളായവർക്കെതിരെ ശക്തമായ നടപടി ഉണ്ടാകുമെന്ന് പ്രതീക്ഷിക്കുന്നുവെന്നും അദ്ദേഹം കുറിച്ചു.
“വിദ്യാർഥികളേ, ഇനി നിങ്ങളുടെ വീടുകളിലേക്കും മാതാപിതാക്കളുടെ അടുത്തേക്കും മടങ്ങൂ. സർക്കാർ ഈ വിഷയത്തിൽ നടപടി സ്വീകരിക്കുമെന്ന കാര്യത്തിൽ എനിക്ക് വിശ്വാസമുണ്ട്,” എന്നാണ് സൽമാൻ ഖാൻ കുറിച്ചത്.
സോനം വാങ്ചുക്കിനെ അഭിസംബോധന ചെയ്തുകൊണ്ട് അദ്ദേഹം എഴുതിയത്: “സോനം, ഇനി മതിയാക്കൂ ബ്രോ. നിരാഹാരം നീട്ടേണ്ട. ആവശ്യമുണ്ടെങ്കിൽ പിന്നീട് ആ ഊർജം ഉപയോഗിക്കാം. ഇപ്പോൾ എന്തെങ്കിലും കഴിക്കൂ. വേണമെങ്കിൽ വീട്ടിൽ നിന്ന് ഭക്ഷണം അയച്ചുതരാം,” എന്നായിരുന്നു.
ഒരു ദിവസം മുൻപ് സമരത്തിന് പരസ്യ പിന്തുണ പ്രഖ്യാപിച്ചിരുന്ന സൽമാൻ ഖാൻ, നീറ്റ് ചോദ്യപ്പേപ്പർ ചോർച്ച അതീവ ഗുരുതരമായ വിഷയമാണെന്നും രാജ്യത്തെ വിദ്യാർഥികൾ മികച്ച വിദ്യാഭ്യാസ സംവിധാനത്തിനായി ഒന്നിച്ച് നിൽക്കുന്നത് അഭിനന്ദനാർഹമാണെന്നും പറഞ്ഞിരുന്നു. സമരം സമാധാനപരമായി തുടരണമെന്നും, വിഷയത്തെ രാഷ്ട്രീയവൽക്കരിക്കരുതെന്നും അദ്ദേഹം അന്ന് ആവശ്യപ്പെട്ടിരുന്നു. “ഇത് വിദ്യാർഥികളുടെയും വിദ്യാഭ്യാസ സംവിധാനത്തിന്റെയും വിഷയമാണ്. രാഷ്ട്രീയ നേട്ടത്തിനായി ഇതിനെ ഉപയോഗിക്കരുത്. ഈ പ്രക്ഷോഭത്തിന്റെ മുഴുവൻ ക്രെഡിറ്റും വിദ്യാർഥികൾക്കാണ്,” എന്നും അദ്ദേഹം അഭിപ്രായപ്പെട്ടു.
നീറ്റ് പരീക്ഷാ ക്രമക്കേടിനെതിരെ സിജെപി നേതൃത്വത്തിൽ ഒരു മാസത്തിലേറെയായി ഡൽഹിയിലെ ജന്തർ മന്തറിൽ വിദ്യാർഥികൾ പ്രതിഷേധം തുടരുകയാണ്. വിദ്യാഭ്യാസമന്ത്രി ധർമേന്ദ്ര പ്രധാൻ രാജിവെക്കണമെന്നതാണ് സമരക്കാരുടെ പ്രധാന ആവശ്യം. ഈ പ്രക്ഷോഭത്തിന് പിന്തുണയുമായി കരീന കപൂർ, വരുണ് ധവാൻ, ആലിയ ഭട്ട്, സാറ അലി ഖാൻ, സോനാക്ഷി സിൻഹ, നസീറുദ്ദീൻ ഷാ, ആർ. മാധവൻ, പ്രകാശ് രാജ്, ശബാന ആസ്മി തുടങ്ങി നിരവധി സിനിമാതാരങ്ങളും രംഗത്തെത്തിയിട്ടുണ്ട്.
Summary: Bollywood actor Salman Khan has urged students participating in the CJP-led NEET protest to return home, saying he believes the government will act against those responsible for the paper leak. He also appealed to activist Sonam Wangchuk to end his hunger strike, saying students’ safety and education should now take priority.
