തിരുവനന്തപുരം: കപ്പൽനിർമ്മാണ മേഖലയിലെ വൻകിട നിക്ഷേപവുമായി ബന്ധപ്പെട്ട് മുഖ്യമന്ത്രി വി.ഡി സതീശൻ നടത്തിയ പ്രസ്താവന ടാറ്റാ ഗ്രൂപ്പ് തള്ളിയതോടെ രൂപപ്പെട്ട വൻ വിവാദത്തിൽ ഔദ്യോഗിക വിശദീകരണവുമായി സംസ്ഥാന സർക്കാർ (CM VD Satheesan tata group investment denial). ഏതെങ്കിലും ഒരു പ്രത്യേക സ്ഥാപനവുമായി മാത്രം 10,000 കോടി രൂപയുടെ നിക്ഷേപത്തിന് നിലവിൽ കരാർ ഒപ്പിട്ടിട്ടില്ലെന്ന് വാർത്താക്കുറിപ്പിലൂടെ ആഭ്യന്തര-വ്യാവസായിക വകുപ്പുകൾ വ്യക്തമാക്കി. വരും വർഷങ്ങളിൽ വിവിധ പദ്ധതികളിലൂടെയും വ്യത്യസ്ത നിക്ഷേപകരിലൂടെയും സംസ്ഥാനത്തേക്ക് ആകർഷിക്കാൻ സർക്കാർ ലക്ഷ്യമിടുന്ന ആകെ നിക്ഷേപത്തിന്റെ വ്യാപ്തിയെയാണ് 10,000 കോടിയോളം രൂപയുടെ ‘നിക്ഷേപ സാധ്യത’ എന്ന പരാമർശത്തിലൂടെ മുഖ്യമന്ത്രി സൂചിപ്പിച്ചതെന്ന് സർക്കാർ വിശദീകരിക്കുന്നു.
കേരളത്തെ രാജ്യത്തെ പ്രമുഖ കപ്പൽ നിർമ്മാണ-സമുദ്ര വ്യവസായ കേന്ദ്രമായി വികസിപ്പിക്കുന്നതിനുള്ള ‘മിഷൻ സമുദ്ര’ പദ്ധതിയുടെ ദീർഘവീക്ഷണമാണ് മുഖ്യമന്ത്രി തന്റെ അഭിമുഖത്തിൽ പങ്കുവെച്ചത്. മിഷൻ സമുദ്രയുടെ ഭാഗമായി കപ്പൽ നിർമ്മാണ മേഖലയിൽ ടാറ്റ ഗ്രൂപ്പ് 10,000 കോടി രൂപയുടെ ഭീമൻ നിക്ഷേപം നടത്താൻ സന്നദ്ധത അറിയിച്ചെന്ന തരത്തിൽ മുഖ്യമന്ത്രി നടത്തിയ അവകാശവാദം ടാറ്റാ ഗ്രൂപ്പ് അധികൃതർ പൂർണ്ണമായി തള്ളിയതോടെയാണ് സംഭവം വിവാദമായത്. കേരളത്തിലോ രാജ്യത്ത് മറ്റെവിടെയെങ്കിലുമോ പുതിയ കപ്പൽ നിർമ്മാണശാല സ്ഥാപിക്കാൻ ടാറ്റ ഗ്രൂപ്പിന് നിലവിൽ യാതൊരു പദ്ധതിയുമില്ലെന്ന് കമ്പനിയുടെ ഉന്നത ഉദ്യോഗസ്ഥരെ ഉദ്ധരിച്ച് ദേശീയ മാധ്യമങ്ങൾ റിപ്പോർട്ട് ചെയ്തിരുന്നു. ഒരു അന്താരാഷ്ട്ര മാധ്യമത്തിന് നൽകിയ അഭിമുഖത്തിലാണ് മുഖ്യമന്ത്രി ടാറ്റയുടെ വൻ നിക്ഷേപത്തെക്കുറിച്ച് സൂചന നൽകിയത്.
ഈ വിഷയത്തിൽ ടാറ്റ ഗ്രൂപ്പുമായി ചർച്ചകൾ പുരോഗമിക്കുകയാണെന്നും ഒരു മാസത്തിനകം അന്തിമ തീരുമാനമുണ്ടാകുമെന്നുമായിരുന്നു മുഖ്യമന്ത്രിയുടെ മുൻ പ്രസ്താവന. എന്നാൽ, മുഖ്യമന്ത്രിയുടെ ഈ പരാമർശം തങ്ങളെ അത്ഭുതപ്പെടുത്തിയെന്നാണ് ടാറ്റ ഗ്രൂപ്പിലെ ഒരു ഉന്നത എക്സിക്യൂട്ടീവ് വ്യക്തമാക്കിയത്. ഇത്തരമൊരു പദ്ധതിക്കായി ഇപ്പോഴത്തെ സർക്കാരോ, മുൻ സർക്കാരുകളോ തങ്ങളെ ഔദ്യോഗികമായി സമീപിച്ചിട്ടില്ലെന്നും കമ്പനി വെളിപ്പെടുത്തിയിരുന്നു. പ്രതിപക്ഷം ഇത് വലിയ രാഷ്ട്രീയ ആയുധമാക്കിയതോടെയാണ് സർക്കാർ വിശദീകരണക്കുറിപ്പ് ഇറക്കിയത്.
സർക്കാറിന്റെ വാർത്താക്കുറിപ്പിലെ പ്രധാന വിവരങ്ങൾ:
മിഷൻ സമുദ്രയിലൂടെ സർക്കാർ ലക്ഷ്യമിടുന്നത് സമഗ്ര കപ്പൽ നിർമ്മാണ ഇക്കോസിസ്റ്റമായി കേരളത്തെ മാറ്റുകയെന്നതാണ്. മലബാർ സിമന്റ്സ് ലിമിറ്റഡും, ടാറ്റാ പ്രോജക്ട്സിന്റെ ഭാഗമായ ആർട്സൺ എഞ്ചിനീയറിംഗ് ലിമിറ്റഡും ചേർന്നുള്ള സംയുക്ത സംരംഭത്തിന് (Joint Venture) കൊച്ചിൻ പോർട്ടിൽ കപ്പൽ നിർമ്മാണ യൂണിറ്റ് സ്ഥാപിക്കാൻ സർക്കാർ സൗകര്യമൊരുക്കിയിട്ടുണ്ട്. ഇതിനാവശ്യമായ ഭൂമി കൊച്ചിൻ പോർട്ട് അതോറിറ്റി ലഭ്യമാക്കി.
വിഴിഞ്ഞം അന്താരാഷ്ട്ര തുറമുഖം, കൊച്ചി തുറമുഖം, കൊച്ചിൻ ഷിപ്പ്യാർഡ് എന്നിവയുൾപ്പെടെ സംസ്ഥാനത്തെ തീരദേശ മേഖലയെ പ്രയോജനപ്പെടുത്തി കപ്പൽനിർമ്മാണം, കപ്പൽ അറ്റകുറ്റപ്പണി, ഓഫ്ഷോർ ഫാബ്രിക്കേഷൻ, ലോജിസ്റ്റിക്സ് തുടങ്ങിയവ ഏകോപിപ്പിച്ചുള്ള സമഗ്ര സമുദ്ര വികസനമാണ് സർക്കാർ നടപ്പിലാക്കാൻ ഉദ്ദേശിക്കുന്നത്. ഓരോ നിക്ഷേപ പദ്ധതിയും അന്തിമഘട്ടത്തിലാകുന്ന മുറയ്ക്ക് അത് സംബന്ധിച്ച പ്രഖ്യാപനങ്ങൾ ഔദ്യോഗികമായി നടത്തുമെന്നും സർക്കാർ അറിയിച്ചു.
Story Summary: The Kerala government issued a clarification after the Tata Group denied claims regarding a ₹10,000 crore shipyard investment in the state. The government stated that Chief Minister VD Satheesans’s remarks during a recent interview referred to the total investment potential aimed under the ‘Mission Samudra’ initiative through various investors, rather than a finalized single contract with any specific firm. The government highlighted an ongoing joint venture at Cochin Port involving Malabar Cements and Artson Engineering, a subsidiary of Tata Projects.
