സംസ്ഥാന കോൺഗ്രസ് അധ്യക്ഷനെ ഉടൻ നിയമിക്കുന്നതിനുള്ള പ്രാഥമിക ചർച്ചകൾ ആരംഭിക്കാൻ പാർട്ടി ഹൈക്കമാൻഡ് ദീപാദാസ് മുൻഷിക്ക് നിർദ്ദേശം നൽകി. നിലവിലെ അധ്യക്ഷനായിരുന്ന സണ്ണി ജോസഫ് മന്ത്രിസഭയിൽ ഉൾപ്പെട്ടതിനെത്തുടർന്നാണ് പുതിയ നേതൃത്വത്തെ കണ്ടെത്തേണ്ട അടിയന്തര സാഹചര്യം ഉടലെടുത്തത് (KPCC President Appointment). പാർലമെന്ററി പദവികൾ വഹിക്കുന്നവരെ കെപിസിസി അധ്യക്ഷ സ്ഥാനത്തേക്ക് പരിഗണിക്കേണ്ടതില്ലെന്നാണ് ഹൈക്കമാൻഡിന്റെ പ്രാഥമിക തീരുമാനം. എം.എം. ഹസൻ, ജോസഫ് വാഴക്കൻ, മുല്ലപ്പള്ളി രാമചന്ദ്രൻ എന്നിവരുടെ പേരുകൾ നിലവിൽ പരിഗണനാ പട്ടികയിലുണ്ട്. ഇതിൽ മുല്ലപ്പള്ളി രാമചന്ദ്രനെ മുന്നണി കൺവീനർ സ്ഥാനത്തേക്കും പരിഗണിക്കുന്നതായി സൂചനയുണ്ട്. കർണാടക മന്ത്രിസഭാ വികസനം പൂർത്തിയായതിന് ശേഷം അന്തിമഘട്ട ചർച്ചകൾ നടക്കും.
കെപിസിസി അധ്യക്ഷ സ്ഥാനത്തേക്ക് എം.പിമാരെയും എം.എൽ.എമാരെയും പരിഗണിക്കാൻ പാടില്ലെന്ന് ആവശ്യപ്പെട്ട് സംസ്ഥാനത്തെ വിവിധ ഇടങ്ങളിൽ നേരത്തെ ഫ്ലക്സ് ബോർഡുകൾ പ്രത്യക്ഷപ്പെട്ടിരുന്നു. ജനപ്രതിനിധികൾ സ്വന്തം മണ്ഡലങ്ങളിലെ പ്രവർത്തനങ്ങളിൽ ശ്രദ്ധ കേന്ദ്രീകരിക്കണമെന്നായിരുന്നു പ്രധാന ആവശ്യം. യുവതലമുറയെ നേതൃത്വത്തിലേക്ക് കൊണ്ടുവരണമെന്ന ആവശ്യവും പാർട്ടിയിൽ ശക്തമാണ്. 55 വയസ്സിൽ താഴെയുള്ളവർ നേതൃത്വത്തിൽ വരണമെന്നും, ഭരണകാലയളവിൽ തന്നെ സംഘടനയെ താഴെത്തട്ടിൽ വരെ സജീവമാക്കാൻ പ്രാപ്തിയുള്ളവരാകണം അധ്യക്ഷനെന്നും നേതൃത്വം ആഗ്രഹിക്കുന്നു. മന്ത്രിസഭ രൂപീകരണത്തിൽ പുതുമുഖങ്ങൾക്കും യുവാക്കൾക്കും നൽകിയ പരിഗണന കെപിസിസി, ഡി.സി.സി പുനഃസംഘടനയിലും തുടരാനാണ് കോൺഗ്രസ് നേതൃത്വത്തിന്റെ തീരുമാനം.
Summary: The Congress high command has directed Deepa Dasmunshi to initiate preliminary discussions for the appointment of a new KPCC president following Sunny Joseph’s induction into the cabinet. The party is considering a younger leadership, likely excluding current parliamentarians, and aims to mirror the youth-centric approach taken during the recent cabinet formation in its upcoming organizational restructuring.
