സ്വകാര്യതയുമായി ബന്ധപ്പെട്ട വ്യാപകമായ പരാതികളെത്തുടർന്ന്, ഇൻസ്റ്റാഗ്രാം ഉപയോക്താക്കളുടെ പബ്ലിക് അക്കൗണ്ടുകളിലെ ചിത്രങ്ങൾ ഉപയോഗിച്ച് എഐ ചിത്രങ്ങൾ നിർമ്മിക്കാൻ അനുവദിക്കുന്ന ഫീച്ചർ മെറ്റ പിൻവലിച്ചു (Meta AI Muse Image). ‘മ്യൂസ് ഇമേജ്’ എന്ന് പേരിട്ടിരുന്ന ഈ ഫീച്ചർ പുറത്തിറക്കി ദിവസങ്ങൾക്കുള്ളിലാണ് കമ്പനി പിൻവലിക്കാൻ തീരുമാനിച്ചത്. ഫേസ്ബുക്കിന്റെയും ഇൻസ്റ്റാഗ്രാമിന്റെയും ഉടമസ്ഥരായ മെറ്റാ സുപ്പർ ഇന്റലിജൻസ് ലാബ്സിൽ നിന്നുള്ള ആദ്യത്തെ ഇമേജ് ജനറേഷൻ മോഡലായിരുന്നു ഇത്.
ഉപയോക്താക്കളുടെ സമ്മതമില്ലാതെ അവരുടെ ചിത്രങ്ങൾ എഐക്ക് ഉപയോഗിക്കാൻ അവസരമൊരുക്കി എന്നതായിരുന്നു പ്രധാന വിമർശനം. ഓട്ടോമാറ്റിക് ‘ഓപ്റ്റ്-ഇൻ’ രീതിയിലായിരുന്നു ഈ ഫീച്ചർ പ്രവർത്തിച്ചിരുന്നത്. പ്രശസ്ത നടിയും ‘ഹാക്സ്’ എന്ന പരമ്പരയിലെ താരവുമായ ഹന്ന ഐൻബൈൻഡർ ഉൾപ്പെടെയുള്ളവർ ഈ ഫീച്ചറിനെതിരെ രംഗത്തെത്തിയിരുന്നു. എഐയുടെ ഇത്തരം പ്രവൃത്തികൾക്കെതിരെ സജ്ജരായ ഹോളിവുഡ് താരങ്ങളുടെ സംഘടനയായ SAG-AFTRA, ഈ ഫീച്ചർ ഉടൻ തന്നെ നിർത്തലാക്കണമെന്ന് ആവശ്യപ്പെടുകയും ഉപയോക്താക്കളോട് ഇതിൽ നിന്നും വിട്ടുനിൽക്കാൻ നിർദ്ദേശിക്കുകയും ചെയ്തിരുന്നു.
“ഉപയോക്താക്കൾക്ക് ഉപയോഗപ്രദമായ ഒരു സർഗ്ഗാത്മക ടൂൾ നൽകാനാണ് ഞങ്ങൾ ലക്ഷ്യമിട്ടത്. എന്നാൽ ഉപയോക്താക്കളിൽ നിന്നും ലഭിച്ച ഫീഡ്ബാക്കുകൾ അനുസരിച്ച് ഈ ഫീച്ചർ പരാജയപ്പെട്ടുവെന്ന് മനസ്സിലാക്കുന്നു,” മെറ്റ ഔദ്യോഗിക പ്രസ്താവനയിൽ പറഞ്ഞു. ഫീച്ചർ പിൻവലിച്ച മെറ്റായുടെ നടപടിയെ SAG-AFTRA സ്വാഗതം ചെയ്തു. എഐ സാങ്കേതികവിദ്യയുടെ വികസനത്തിൽ ഉപയോക്താക്കളുടെ സ്വകാര്യതയ്ക്കും അവർ പങ്കുവെക്കുന്ന ഉള്ളടക്കത്തിന്മേൽ അവർക്കുള്ള നിയന്ത്രണത്തിനും മുൻഗണന നൽകണമെന്ന ആവശ്യം വീണ്ടും ശക്തമാക്കുന്നതാണ് ഈ സംഭവം.
Summary: Meta has discontinued its newly launched ‘Muse Image’ AI tool following intense backlash over privacy concerns. The feature, which allowed AI to generate and edit images using public Instagram content, faced heavy criticism from actors and media unions for its automatic opt-in policy and lack of user consent.
