മുംബൈ: പ്രിയദർശൻ സംവിധാനം ചെയ്യുന്ന ബോളിവുഡ് ചിത്രം ‘ഹൈവാൻ’ പ്രേക്ഷകർ ഏറെ ആകാംക്ഷയോടെ കാത്തിരിക്കുന്ന ഒന്നാണ്. സെയ്ഫ് അലി ഖാനും അക്ഷയ് കുമാറും കേന്ദ്ര കഥാപാത്രങ്ങളായി എത്തുന്ന ചിത്രത്തിൽ മോഹൻലാലും ഒരു സുപ്രധാന അതിഥി വേഷത്തിൽ എത്തുന്നുണ്ട്. മോഹൻലാലിനൊപ്പം പ്രവർത്തിച്ച അനുഭവം പങ്കുവെക്കുകയാണ് സെയ്ഫ് അലി ഖാൻ (Saif Ali Khan on Mohanlal). ഹോളിവുഡ് റിപ്പോർട്ടർ ഇന്ത്യയ്ക്ക് നൽകിയ അഭിമുഖത്തിലാണ് അദ്ദേഹം ഇക്കാര്യം വ്യക്തമാക്കിയത്.
മോഹൻലാൽ എന്ന വ്യക്തിയും നടനും തനിക്ക് വലിയ അത്ഭുതമാണെന്ന് സെയ്ഫ് പറയുന്നു. വളരെ ലാളിത്യമുള്ള വ്യക്തിയാണ് അദ്ദേഹം. എന്നാൽ ക്യാമറയ്ക്ക് മുന്നിലെത്തുമ്പോൾ കഥാപാത്രമായി അദ്ദേഹം മാറുന്ന രീതി അവിശ്വസനീയമാണ്. ചിത്രത്തിൽ അന്ധനായ കഥാപാത്രത്തെയാണ് മോഹൻലാൽ അവതരിപ്പിക്കുന്നത്. ആ കഥാപാത്രത്തെ തന്മയത്വത്തോടെ അവതരിപ്പിക്കാൻ അദ്ദേഹം എടുത്ത പരിശ്രമം തന്നെ അത്ഭുതപ്പെടുത്തിയെന്ന് സെയ്ഫ് പറയുന്നു.
“അദ്ദേഹത്തിന് സിനിമയിൽ ഒരു ഷോട്ട് മാത്രമേയുള്ളൂ. ഒരു ഗ്ലാസ് കുറച്ച് താഴ്ത്തുന്ന ചെറിയൊരു ഷോട്ടിലൂടെ അന്ധനാണെന്ന് പ്രേക്ഷകരെ ബോധ്യപ്പെടുത്താൻ അദ്ദേഹത്തിന് സാധിച്ചു. അത് ചെയ്യാൻ ഞാൻ ശരിക്കും ബുദ്ധിമുട്ടിയിട്ടുണ്ട്. ക്യാമറയ്ക്ക് പുറത്ത് വളരെ ലളിതമായി നിൽക്കുന്ന അദ്ദേഹം, ക്യാമറയ്ക്ക് മുന്നിലെത്തുമ്പോൾ പൂർണ്ണമായും കഥാപാത്രമായി മാറും. അതൊരു ഗംഭീര സംഗതിയാണ്. വളരെ സപ്പോർട്ടീവ് ആയൊരു സഹപ്രവർത്തകനാണ് അദ്ദേഹം,” സെയ്ഫ് അലി ഖാൻ പറഞ്ഞു. പ്രിയദർശനും മോഹൻലാലും തമ്മിലുള്ള വർഷങ്ങളുടെ ആത്മബന്ധം സെറ്റിൽ കാണാൻ വളരെ രസകരമായിരുന്നുവെന്നും അദ്ദേഹം കൂട്ടിച്ചേർത്തു. സെപ്റ്റംബർ 11-ന് ചിത്രം തീയേറ്ററുകളിൽ എത്തും.
Summary: Saif Ali Khan, in a recent interview, shared his experience working with Mohanlal in Priyadarshan’s upcoming Bollywood film, ‘Haivan’. Saif praised Mohanlal’s ability to effortlessly transition into his character, particularly highlighting his precise and subtle performance in a scene where he portrays a blind man. Saif noted that Mohanlal’s humility and supportive nature made him a delight to work with, while also admiring the deep creative chemistry between the director and the superstar.
