ന്യൂഡൽഹി: കടുത്ത ചൂടിനും ഉഷ്ണതരംഗത്തിനും ശമനമേകി ഉത്തരേന്ത്യയിൽ പരക്കെ കനത്ത മഴ. എന്നാൽ മഴ ശക്തമായതോടെ ഡൽഹി ഉൾപ്പെടെയുള്ള നഗരങ്ങളിൽ വെള്ളക്കെട്ടും കനത്ത ഗതാഗതക്കുരുക്കും രൂക്ഷമായി. ഇന്ന് രാവിലെ പത്ത് മണി വരെയുള്ള മൂന്ന് മണിക്കൂർ സമയം തലസ്ഥാന നഗരവും പരിസര പ്രദേശങ്ങളും അതീവ ജാഗ്രതാനിർദ്ദേശമായ ‘റെഡ് അലർട്ടിൽ’ ആയിരുന്നു. കഴിഞ്ഞ 24 മണിക്കൂറിനിടെ റെക്കോർഡ് മഴയാണ് ഡൽഹിയിൽ രേഖപ്പെടുത്തിയത്. തലസ്ഥാന മേഖലയ്ക്ക് പുറമെ ഹരിയാന, ഉത്തർപ്രദേശ്, ഉത്തരാഖണ്ഡ് എന്നീ സംസ്ഥാനങ്ങളിലെ വിവിധ ജില്ലകളിൽ കാലാവസ്ഥാ നിരീക്ഷണ കേന്ദ്രം ഓറഞ്ച് അലർട്ട് പ്രഖ്യാപിച്ചിട്ടുണ്ട്.(Heavy rainfall hits North India Delhi red alert Rohini building collapse and Kashmir landslides)
കനത്ത മഴയെത്തുടർന്ന് ഡൽഹിയിലെ രോഹിണിയിൽ നിർമ്മാണത്തിലിരുന്ന കെട്ടിടം തകർന്നുണ്ടായ അപകടത്തിൽ മരണസംഖ്യ മൂന്നായി ഉയർന്നു. കെട്ടിട ഉടമയുടേതടക്കമുള്ള മൃതദേഹങ്ങളാണ് ഇന്ന് രക്ഷാപ്രവർത്തകർ കണ്ടെടുത്തത്. ഡൽഹിക്ക് പുറമെ ഉത്തർപ്രദേശ്, രാജസ്ഥാൻ, പഞ്ചാബ് എന്നീ സംസ്ഥാനങ്ങളിലും കനത്ത നാശനഷ്ടങ്ങളാണ് റിപ്പോർട്ട് ചെയ്തിട്ടുള്ളത്. ഹിമാചൽ പ്രദേശിലെ രാംപൂരിൽ താൽക്കാലിക പാലങ്ങൾ ഒലിച്ചുപോയതിനെ തുടർന്ന് നിരവധി ഗ്രാമങ്ങൾ പൂർണ്ണമായി ഒറ്റപ്പെട്ട നിലയിലാണ്.
മലയോര മേഖലകളിൽ മണ്ണിടിച്ചിൽ സാധ്യത ശക്തമായതിനെ തുടർന്ന് ഹിമാചൽ പ്രദേശിലും ജമ്മു കശ്മീരിലും ഭരണകൂടം ജാഗ്രതാ നിർദ്ദേശം നൽകിയിട്ടുണ്ട്. ജമ്മു കശ്മീരിലെ വൈഷ്ണോദേവി പാതയിലുണ്ടായ മണ്ണിടിച്ചിലിനെ തുടർന്ന് തീർത്ഥാടകർക്കായുള്ള ബാറ്ററി കാർ സർവീസുകൾ താൽക്കാലികമായി നിർത്തിവെച്ചു. ഉത്തരാഖണ്ഡിലെ തെഹ്രി ഗർവാൾ ജില്ലയിൽ ദേശീയപാത 707A യ്ക്ക് സമീപം മണ്ണിടിച്ചിലിൽ ഒരു കെട്ടിടം പൂർണ്ണമായി തകർന്നു. അപകടസാധ്യത മുൻകൂട്ടി കണ്ട് ആളുകളെ നേരത്തെ തന്നെ ഒഴിപ്പിച്ചിരുന്നതിനാൽ വലിയൊരു ദുരന്തം ഒഴിവായി. നിലവിൽ ഈ മേഖലയിലേക്കുള്ള ഗതാഗതം അധികൃതർ താൽക്കാലികമായി നിരോധിച്ചിരിക്കുകയാണ്.
Story Summary
Heavy rainfall caused widespread disruptions in North India, placing Delhi under a short-term red alert due to record rains and causing a building collapse in Rohini that killed three. Landslides in Himachal Pradesh and Jammu & Kashmir have halted local services and isolated villages, while an orange alert remains active across several neighboring states.
