കൊച്ചി: മലയാള ചലച്ചിത്ര അഭിനേതാക്കളുടെ സംഘടനയായ ‘അമ്മ’യ്ക്കുള്ളിൽ പുകയുന്ന ആഭ്യന്തര ഭിന്നതകളും തർക്കങ്ങളും പരസ്യമാക്കി നടി മായ വിശ്വനാഥ് രംഗത്ത് (Maya Viswanath Interview). സംഘടനയിലെ ഏറ്റവും വലിയ ‘സൈലന്റ് കില്ലർ പോയ്സൺ’ നടി സരയൂ മോഹൻ ആണെന്നാണ് മായ വിശ്വനാഥ് തുറന്നടിച്ചത്. ‘സീ മലയാളം’ മാധ്യമത്തിന് നൽകിയ പ്രത്യേക അഭിമുഖത്തിലാണ് സംഘടനയെ മൊത്തത്തിൽ പിടിച്ചുലയ്ക്കുന്ന അതീവ ഗുരുതരമായ വെളിപ്പെടുത്തലുകൾ താരം നടത്തിയത്. മുൻപ് അമ്മയുടെ കുടുംബസംഗമവുമായി ബന്ധപ്പെട്ട് സരയൂ മോഹന്റെ ഭർത്താവിന് രണ്ടര ലക്ഷം രൂപയുടെ സാമ്പത്തിക ഓർഡർ നൽകിയതിനെച്ചൊല്ലി സംഘടനയ്ക്കുള്ളിൽ വലിയ ചോദ്യങ്ങൾ ഉയർന്നിരുന്നുവെന്നും മായ വെളിപ്പെടുത്തി. സുഹൃത്തുക്കൾ തമ്മിലുള്ള തികച്ചും സ്വകാര്യമായ ഫോൺ സംഭാഷണം രഹസ്യമായി റെക്കോർഡ് ചെയ്ത് സോഷ്യൽ മീഡിയയിൽ പ്രചരിപ്പിച്ചതിന് പിന്നിൽ നടി ശ്വേതാ മേനോന്റെ വൃത്തികെട്ട മനസ്സാണെന്നും മായ വിശ്വനാഥ് കടുത്ത ഭാഷയിൽ കുറ്റപ്പെടുത്തി.
സംഘടനയിലെ വലിയൊരു വിഭാഗം അംഗങ്ങൾക്കും സരയൂവിന്റെ യഥാർത്ഥ മുഖം അറിയാമെങ്കിലും ആരും അത് ഭയം കാരണം തുറന്നുപറയുന്നില്ലെന്ന് മായ ആരോപിക്കുന്നു. “അമ്മ എന്ന ഓർഗനൈസേഷനിലേക്ക് ഞാൻ വ്യക്തിപരമായി അയച്ച അതീവ രഹസ്യമായ ഒരു ഇമെയിൽ എങ്ങനെയാണ് ഒരു ഓൺലൈൻ മാധ്യമത്തിന് ചോർന്നു കിട്ടിയത്? എക്സിക്യൂട്ടീവ് മീറ്റിംഗിലെ പല സുപ്രധാന തീരുമാനങ്ങളും ഭാരവാഹികൾ വീടുകളിൽ എത്തുന്നതിന് മുൻപ് തന്നെ ഓൺലൈൻ ചാനലുകൾ വാർത്തയാക്കുന്നു. അവിടുത്തെ ആഭ്യന്തര കാര്യങ്ങൾ എന്തിനാണ് ഇവർ ഓൺലൈൻ ചാനലുകൾ വഴി പുറംലോകത്തെ അറിയിക്കുന്നത്?” മായ ചോദിക്കുന്നു. താനും മാലാ പാർവതിയും കമ്മിറ്റിയിൽ അശ്ലീലം പറഞ്ഞു എന്ന് പ്രചരിപ്പിക്കുന്നവർ അതിനുള്ള തെളിവ് പുറത്തുവിടട്ടെ എന്നും, സ്ത്രീത്വത്തെ ആരും ആയുധമാക്കരുതെന്നും കണക്കുകൾ കൃത്യമായി കാണിക്കണമെന്നുമാണ് താൻ ആവശ്യപ്പെട്ടതെന്നും മായ വ്യക്തമാക്കി. മുൻപ് ഒരു പ്രമുഖ നടൻ ഇടപെട്ട് ശ്വേതയെക്കൊണ്ട് മാപ്പ് പറയിപ്പിച്ച സംഭവം വരെ ഉണ്ടായിട്ടുണ്ടെന്നും അവർ കൂട്ടിച്ചേർത്തു.
എം.എൽ.എയായ രമേശ് പിഷാരടിയെ ‘പിഷു’ എന്ന് വിളിച്ച് അപമാനിച്ചു
ശ്വേതാ മേനോനും രമേശ് പിഷാരടിയും തമ്മിലുള്ള ഫോൺ സംഭാഷണം പുറത്തുവന്നതിനെക്കുറിച്ചും മായ ശക്തമായി പ്രതികരിച്ചു. പാലക്കാട് നിന്ന് വലിയ ജനവിശ്വാസത്തോടെ വിജയിച്ച ഒരു ജനപ്രതിനിധിയായ എം.എൽ.എ രമേശ് പിഷാരടിയെ ‘പിഷു പിഷു’ എന്ന് വല്ലാത്തൊരു രീതിയിലാണ് ശ്വേത അഭിസംബോധന ചെയ്തത്. ഒരു പ്രോട്ടോക്കോളും പാലിക്കാതെ ഇത്തരത്തിൽ സംസാരിച്ച കാര്യം രഹസ്യമായി റെക്കോർഡ് ചെയ്ത് പ്രചരിപ്പിച്ചതിന് പിന്നിൽ വലിയ അസഹിഷ്ണുതയുണ്ട്. മുൻപ് നടന്ന തിരഞ്ഞെടുപ്പിൽ ജഗദീഷ് പ്രസിഡന്റ് സ്ഥാനത്തേക്ക് മത്സരിക്കാൻ നിന്നിട്ട് പെട്ടെന്ന് പത്രിക പിൻവലിച്ചതിന് പിന്നിലും ശ്വേതയുടെ തന്ത്രങ്ങളുണ്ടെന്ന് താൻ സംശയിക്കുന്നതായി മായ പറഞ്ഞു. കൂടാതെ, തിരഞ്ഞെടുപ്പിന് മുൻപ് ഉയർന്നുവന്ന ‘മാർട്ടിൻ’ എന്ന വ്യക്തിയുടെ വിവാദം ഇവർ തന്നെ കെട്ടിച്ചമച്ച നാടകമായിരുന്നുവെന്നും, മൂന്ന് കോടിയുടെ മാനനഷ്ടക്കേസ് ഫയൽ ചെയ്യുമെന്ന് പറഞ്ഞവർ ജയിച്ചതിന് ശേഷം ആ കേസ് എവിടെപ്പോയെന്നും അവർ ചോദിച്ചു.
സംഘടനയുടെ നിലവിലെ അവസ്ഥ പരിതാപകരമാണെന്നും യുവാക്കൾ കൂട്ടത്തോടെ അകന്നുപോവുകയാണെന്നും വ്യക്തമാക്കിയ മായ വിശ്വനാഥ്, ‘അമ്മ’യുടെ നേതൃത്വത്തിലേക്ക് നടൻ ധ്യാൻ ശ്രീനിവാസൻ വരണമെന്ന് ആവശ്യപ്പെട്ടു. അന്തരിച്ച മുൻ പ്രസിഡന്റ് ഇന്നസെന്റിനെപ്പോലെ കാര്യങ്ങൾ ബുദ്ധിപൂർവ്വം കൈകാര്യം ചെയ്യാൻ ധ്യാന് സാധിക്കും. മുൻപ് ഇടവേള ബാബു ഒറ്റയാൾ പോരാട്ടമായി സംഘടന മുന്നോട്ട് കൊണ്ടുപോയപ്പോൾ അതിന് പിന്നിൽ ഇന്നസെന്റ്, മമ്മൂട്ടി, മോഹൻലാൽ എന്നിവരുടെ വലിയ പിന്തുണയുണ്ടായിരുന്നു. ഇപ്പോൾ സംഘടനയിൽ നിന്നും രാജിവെച്ച് പുറത്തുപോയവർ അഡ്ഹോക്ക് കമ്മിറ്റി ഔദ്യോഗികമായി രാജിപ്പത്രിക ആവശ്യപ്പെടുമ്പോൾ ഫോൺ പോലും എടുക്കാതെ ഒളിച്ചുകളിക്കുകയാണെന്നും മായ കുറ്റപ്പെടുത്തി.
Story Summary: In an explosive interview with Zee Malayalam, actress Maya Viswanath labeled actress Sarayu Mohan as the biggest “silent killer poison” within the AMMA organization, questioning financial transactions worth ₹2.5 lakhs involving Sarayu’s husband during a family meet. Maya heavily criticized Shweta Menon, accusing her of having a “dirty mind” for allegedly recording and leaking private phone conversations. She also condemned Shweta’s disrespectful tone towards Palakkad MLA Ramesh Pisharody in a leaked audio. Advocating for a leadership overhaul, Maya suggested that youth icon Dhyan Srinivasan should take charge of the crisis-ridden actors’ association.
