തിരുവനന്തപുരം: വിഴിഞ്ഞം അന്താരാഷ്ട്ര തുറമുഖ പദ്ധതിയുമായി ബന്ധപ്പെട്ട് സംസ്ഥാന സർക്കാരിനെതിരെയും മുഖ്യമന്ത്രിക്കെതിരെയും കടുത്ത രാഷ്ട്രീയ നിലപാടുമായി ബി.ജെ.പി സംസ്ഥാന വൈസ് പ്രസിഡന്റ് അഡ്വ. ഷോൺ ജോർജ്. വിഴിഞ്ഞം പദ്ധതി ലോകോത്തര ഷിപ്പിംഗ് കമ്പനിയായ എം.എസ്.സി (MSC) യുമായി ചേർന്ന് വലിയ വിജയത്തിലേക്ക് കുതിക്കുമ്പോൾ, അദാനി ഗ്രൂപ്പുമായി 2015-ൽ യു.ഡി.എഫ് സർക്കാർ ഒപ്പുവെച്ച കരാർ പുനഃപരിശോധിക്കാൻ മുഖ്യമന്ത്രി തയ്യാറാകണമെന്ന് ഷോൺ ജോർജ് ഫേസ്ബുക്ക് കുറിപ്പിലൂടെ ആവശ്യപ്പെട്ടു.(Shone George Demands CM Renegotiate Vizhinjam Adani Port Contract)
മിസ്റ്റർ ചീഫ് മിനിസ്റ്റർ, വിഴിഞ്ഞം ഒരു ചെറിയ മീനല്ല ….അങ്ങനെ ആരെങ്കിലും വിശ്വസിക്കുന്നുണ്ടെങ്കിൽ, അവരുടെ കൂട്ടത്തിൽ ഞാനില്ല, എന്ന് വ്യക്തമാക്കിക്കൊണ്ടാണ് അദ്ദേഹം തന്റെ നിലപാട് പരസ്യപ്പെടുത്തിയത്. നിലവിൽ ലോകത്തിലെ ഏറ്റവും വലിയ ഷിപ്പിംഗ് കമ്പനികളിലൊന്നായ എം.എസ്.സി കേരളത്തിൽ വൻ നിക്ഷേപവുമായി എത്തുന്നത് വലിയ സന്തോഷം നൽകുന്ന കാര്യമാണ്. എന്നാൽ 2015-ലെ കരാറിലെ വ്യവസ്ഥ (Clause 5.3) പ്രകാരം അദാനി പോർട്സിന്റെ ഓഹരികളിൽ 25 ശതമാനത്തിലധികം മറ്റൊരാൾക്ക് കൈമാറണമെങ്കിൽ സംസ്ഥാന സർക്കാരിന്റെ മുൻകൂർ അനുമതി നിർബന്ധമാണ്. ഇപ്പോൾ നടന്നിരിക്കുന്ന ഓഹരി കൈമാറ്റത്തിന് അദാനി ഗ്രൂപ്പ് സർക്കാർ അനുമതിക്കായി വരുമ്പോൾ, സംസ്ഥാന താല്പര്യങ്ങൾ സംരക്ഷിച്ച് പഴയ കരാർ പുനഃപരിശോധിക്കാനുള്ള ഏറ്റവും വലിയ അവസരമാണ് സർക്കാരിന് ലഭിച്ചിരിക്കുന്നത്.
പഴയ കരാർ പ്രകാരം സംസ്ഥാനത്തിന് ഗണ്യമായ വരുമാനം ലഭിക്കുന്നത് ഏകദേശം 30 വർഷങ്ങൾക്ക് ശേഷമാണ്. പദ്ധതി ലാഭകരമാകില്ലെന്ന വാദമുയർത്തി അന്ന് കമ്പനിക്ക് അനുകൂലമായാണ് വ്യവസ്ഥകൾ രൂപപ്പെടുത്തിയത്. എന്നാൽ ഇന്ന് വിഴിഞ്ഞം വൻ വിജയമാണെന്ന് തെളിഞ്ഞു കഴിഞ്ഞു. അതിനാൽ സംസ്ഥാനത്തിന് കൂടുതൽ വരുമാനവും തുറമുഖ ലാഭത്തിൽ ന്യായമായ വിഹിതവും ഉറപ്പാക്കുന്ന പുതിയ വ്യവസ്ഥകൾ ഉൾപ്പെടുത്തി കരാർ പുതുക്കാൻ മുഖ്യമന്ത്രി തയ്യാറാകണം.
തുറമുഖം, നിയമം, ധനകാര്യം എന്നീ സുപ്രധാന വകുപ്പുകൾ മുഖ്യമന്ത്രി നേരിട്ട് കൈകാര്യം ചെയ്യാൻ തീരുമാനിച്ചതിനെ പരാമർശിച്ച ഷോൺ ജോർജ്, ഇതിന് പിന്നിൽ മറ്റെന്തെങ്കിലും ലക്ഷ്യങ്ങളുണ്ടെങ്കിൽ മുൻ മുഖ്യമന്ത്രിയുടെ അനുഭവം മറക്കാതിരിക്കുന്നത് നല്ലതാണെന്ന് മുന്നറിയിപ്പ് നൽകി. കൂടാതെ, താൻ അദാനി പോർട്സിന്റെ 3 ഓഹരികൾ വാങ്ങാൻ തീരുമാനിച്ചതായും അദ്ദേഹം കുറിപ്പിൽ വ്യക്തമാക്കി.
Story Summary
BJP Kerala Vice President Adv. Shone George urged Chief Minister Pinarayi Vijayan to utilize the recent entry of shipping giant MSC into Vizhinjam Port as an opportunity to renegotiate the 2015 contract with Adani Ports. Highlighting Clause 5.3 of the agreement, which mandates government approval for transferring more than 25% of shares, Shaun George stated that the state must now demand a fairer profit share.
