ന്യൂഡൽഹി: കാലാവധി കഴിഞ്ഞ അന്താരാഷ്ട്ര ബ്രാൻഡ് ഭക്ഷ്യവസ്തുക്കളുടെ എക്സ്പയറി തീയതി മാറ്റി പുതിയ ലേബലുകൾ ഒട്ടിച്ച് വിപണിയിലെത്തിച്ചിരുന്ന വൻ റാക്കറ്റിനെ ഡൽഹി പോലീസ് തകർത്തു. ഓഖ്ല ഫേസ്-II-ലെ ‘വെസ്റ്റൻഡ് കോർപ്പറേഷൻ പ്രൈവറ്റ് ലിമിറ്റഡ്’ എന്ന സ്ഥാപനത്തിൽ നടത്തിയ റെയ്ഡിൽ 20 ലക്ഷത്തിലധികം രൂപയുടെ വ്യാജ ഭക്ഷ്യവസ്തുക്കൾ പിടിച്ചെടുത്തു.(Delhi Police Busts Major Racket Repackaging Expired Branded Food Products)
ബാലവേല നടക്കുന്നുണ്ടെന്ന രഹസ്യവിവരത്തെ തുടർന്നാണ് പോലീസ് പരിശോധന നടത്തിയത്. കുട്ടികളെ കണ്ടെത്തിയില്ലെങ്കിലും, ഇവിടെ നടന്നിരുന്ന ആസൂത്രിത തട്ടിപ്പ് ഉദ്യോഗസ്ഥരെ ഞെട്ടിച്ചു. കാലാവധി തീരാറായതും തീർന്നതുമായ വിദേശ ഭക്ഷ്യവസ്തുക്കൾ കുറഞ്ഞ വിലയ്ക്ക് വാങ്ങി, കെമിക്കൽ തിന്നറുകൾ ഉപയോഗിച്ച് യഥാർത്ഥ തീയതികൾ മായ്ച്ചുകളയുകയായിരുന്നു. തുടർന്ന് അത്യാധുനിക പ്രിന്റിംഗ് യന്ത്രങ്ങൾ ഉപയോഗിച്ച് വ്യാജമായ എക്സ്പയറി തീയതികളും എം.ആർ.പിയും ബാച്ച് നമ്പറുകളും പതിച്ച് വിപണിയിൽ എത്തിക്കുകയായിരുന്നു ഇവരുടെ രീതി.
പ്രമുഖ ബ്രാൻഡുകളുടെ ഉൽപ്പന്നങ്ങളാണ് ഇവിടെ നിന്ന് പിടിച്ചെടുത്തത്. ഈ ഉൽപ്പന്നങ്ങൾ ഇന്ത്യയിലെയും വിദേശത്തെയും വിപണികളിലേക്കും ഇ-കൊമേഴ്സ് പ്ലാറ്റ്ഫോമുകളിലേക്കും വിതരണം ചെയ്തിരുന്നതായി പോലീസ് പറഞ്ഞു. സ്ഥാപന ഉടമ ദർശൻ സിംഗ് സച്ച്ദേവ, മാനേജർ നിതീഷ് ഭരദ്വാജ്, അക്കൗണ്ടന്റ് നരേന്ദർ കുമാർ, ഓപ്പറേറ്റർ കപിൽ, വെയർഹൗസ് കീപ്പർ ലക്കി ഓഝ, സൂപ്പർവൈസർമാരായ പ്രേം യാദവ്, പവൻ കുമാർ യാദവ് എന്നിവരെ പോലീസ് അറസ്റ്റ് ചെയ്തു. പ്രതികൾക്കെതിരെ ഭാരതീയ ന്യായ സംഹിത (BNS) പ്രകാരം കേസെടുത്തു.
Story Summary
Delhi Police has busted an organized racket in Okhla Phase-II that was repackaging expired international branded food products by altering expiry dates and nutritional labels. Raids on M/s Westened Corporation Pvt. Ltd. led to the arrest of seven individuals, including the owner, and the seizure of goods worth over Rs 20 lakh, including popular items like soft drinks, health drinks, and noodles.
