ലക്ഷങ്ങൾ ശമ്പളം ലഭിച്ചിരുന്ന കോർപ്പറേറ്റ് ജോലി ഉപേക്ഷിച്ച് വെയിട്രസായി മാറിയ യുവതിയുടെ അനുഭവം സമൂഹമാധ്യമങ്ങളിൽ വൈറലാകുന്നു. 33 വയസ്സുകാരിയായ സരമെ കോർണിഷ് ആണ് കോർപ്പറേറ്റ് ലോകം വിട്ട് ഹോട്ടലിൽ വെയിട്രസായി ജോലി തുടങ്ങിയത്. കടുത്ത ജോലി സമ്മർദ്ദം കാരണം തന്റെ ആരോഗ്യം വഷളായതിനെത്തുടർന്നാണ് ഇങ്ങനെയൊരു തീരുമാനമെടുത്തതെന്ന് ഇവർ പറയുന്നു. (Corporate Job to Waitress)
കോർപ്പറേറ്റ് ജോലിയിലായിരുന്ന അവസാന ആറുമാസം താൻ കടുത്ത ദഹനപ്രശ്നങ്ങളും മറ്റ് ആരോഗ്യപ്രശ്നങ്ങളും നേരിട്ടിരുന്നതായി സരമെ പറയുന്നു. പലതവണ ഡോക്ടർമാരെ കണ്ടിട്ടും പരിഹാരമുണ്ടായില്ല. എന്നാൽ ജോലി രാജിവെച്ച ഉടൻ തന്നെ ഈ ലക്ഷണങ്ങളെല്ലാം അപ്രത്യക്ഷമായെന്നും, താൻ മുമ്പത്തേക്കാൾ ആരോഗ്യവതിയാണെന്നും സരമെ വ്യക്തമാക്കി. “അതെല്ലാം കേവലം ജോലി സമ്മർദ്ദം മാത്രമായിരുന്നു എന്ന് തിരിച്ചറിഞ്ഞു,” അവർ കൂട്ടിച്ചേർത്തു.
തന്റെ ഈ തീരുമാനത്തെക്കുറിച്ച് സരമെ പങ്കുവെച്ച ഇൻസ്റ്റാഗ്രാം വീഡിയോ ലക്ഷക്കണക്കിന് ആളുകളാണ് കണ്ടത്. സമാനമായ അനുഭവം പങ്കുവെച്ച് നിരവധി പേർ കമന്റ് ബോക്സിൽ രംഗത്തെത്തി. ഉയർന്ന ശമ്പളമുള്ള ജോലി ഉപേക്ഷിച്ച് സന്തോഷം കണ്ടെത്തുന്ന ജോലികളിലേക്ക് മാറിയ പലരും തങ്ങളുടെ അനുഭവങ്ങൾ പങ്കുവെച്ചു. അനാവശ്യമായി സമ്മർദ്ദം അനുഭവിക്കുന്നതിനേക്കാൾ നല്ലത് സന്തോഷത്തോടെ ചെയ്യുന്ന ഏത് ജോലിയാണെന്നും, മറ്റുള്ളവർ എന്തു വിചാരിക്കും എന്ന് പേടിച്ച് ജീവിതം കളയേണ്ടതില്ലെന്നും സരമെ വീഡിയോയിൽ ഓർമ്മിപ്പിക്കുന്നു.
