‘രാക്ഷസൻ’ എന്ന ചിത്രത്തിലൂടെ പ്രേക്ഷകരുടെ പ്രിയങ്കരനായ നടൻ വിഷ്ണു വിശാൽ തന്റെ പേരിന് പിന്നിലെ രസകരമായ കഥ വെളിപ്പെടുത്തി. താൻ സിനിമയിലേക്ക് എത്തുന്നതിന് മുൻപ് ക്രിക്കറ്റിൽ സജീവമായിരുന്നുവെന്നും, അന്ന് എല്ലാവരും തന്നെ ‘വിശാൽ’ എന്നാണ് വിളിച്ചിരുന്നതെന്നും അദ്ദേഹം പറഞ്ഞു. ജിഞ്ചർ മീഡിയ എന്റർടെയ്ൻമെന്റ്സിന് നൽകിയ അഭിമുഖത്തിലാണ് താരം മനസ് തുറന്നത്. (Vishnu Vishal Real Name)
തന്റെ യഥാർഥ പേര് ‘വിശാൽ’ എന്നാണ്. എന്നാൽ, തമിഴ് സിനിമയിൽ ഇതിനകം തന്നെ മറ്റൊരു പ്രമുഖ നടൻ ‘വിശാൽ’ എന്ന പേരിൽ ഉള്ളതുകൊണ്ടാണ് താൻ ‘വിഷ്ണു’ എന്ന പേര് കൂടി ചേർത്തതെന്ന് താരം വ്യക്തമാക്കി. സിനിമയിലെത്തിയ ശേഷം നടൻ വിശാലുമായി താൻ അടുത്ത സുഹൃത്തുക്കളായി മാറിയെന്നും അദ്ദേഹം പറഞ്ഞു. യഥാർഥ പേര് താൻ ഇടയ്ക്കിടെ മിസ് ചെയ്യാറുണ്ടെന്നും എന്നാൽ വിഷ്ണു വിശാൽ എന്ന പേര് വളരെ സിംപിളായി തോന്നുന്നുണ്ടെന്നും താരം കൂട്ടിച്ചേർത്തു.
സിനിമയിൽ വരുന്നതിന് മുൻപ് തമിഴ്നാട് ക്രിക്കറ്റ് അസോസിയേഷൻ (TNCA) ലീഗ് മത്സരങ്ങളിൽ താൻ സജീവമായിരുന്നുവെന്നും, എന്നാൽ കാലിന് പരിക്കേറ്റതിനെത്തുടർന്നാണ് ക്രിക്കറ്റ് ഉപേക്ഷിക്കേണ്ടി വന്നതെന്നും വിഷ്ണു വിശാൽ പറഞ്ഞു. ക്രിക്കറ്റിലൂടെ തനിക്ക് ലഭിച്ച സൗഹൃദങ്ങളെക്കുറിച്ചും അദ്ദേഹം വാചാലനായി. ഇന്ത്യൻ ക്രിക്കറ്റ് താരം ശ്രീശാന്തുമായി താൻ അടുത്ത സൗഹൃദം പുലർത്തുന്നുണ്ടെന്നും, ആന്ധ്രയിലും നോർത്ത് ഇന്ത്യയിലുമെല്ലാം തനിക്ക് നിരവധി ക്രിക്കറ്റ് സുഹൃത്തുക്കളുണ്ടെന്നും അദ്ദേഹം കൂട്ടിച്ചേർത്തു. ജൂലൈ മൂന്നിന് റിലീസ് ചെയ്യുന്ന ‘ഗാട്ട ഗുസ്തി 2’ ആണ് വിഷ്ണു വിശാലിന്റെ പുതിയ ചിത്രം.
Summary: Actor Vishnu Vishal has revealed that his real name is ‘Vishal’, but he adopted ‘Vishnu Vishal’ upon entering the film industry to avoid confusion with established actor Vishal. In a recent interview, he shared fond memories of his cricket days, noting that he is still known as ‘Vishal’ among his cricketing friends, including Sreesanth. The actor, who transitioned to cinema after a leg injury ended his cricketing career, is currently gearing up for the release of his upcoming film, ‘Gatta Kusthi 2’.
