കൊല്ലം: ശാസ്താംകോട്ട റോഡിൽ മാരാരിത്തോട്ടത്തിന് സമീപം സ്വകാര്യ ബസും ബൈക്കും കൂട്ടിയിടിച്ച് യാത്രികൻ മരിച്ചു (Kollam road accident). തൊടിയൂർ സ്വദേശി വിളയിൽ പടീറ്റതിൽ ശശി (54) ആണ് അപകടത്തിൽ ജീവൻ വെടിഞ്ഞത്. ബൈക്കിൽ ഒപ്പമുണ്ടായിരുന്ന മകൾ ശരണ്യ (27) ഗുരുതര പരിക്കുകളോടെ സ്വകാര്യ ആശുപത്രിയിൽ തീവ്രപരിചരണ വിഭാഗത്തിൽ ചികിത്സയിലാണ്.
വ്യാഴാഴ്ച ഉച്ചയ്ക്ക് രണ്ട് മണിയോടെ മാരാരിത്തോട്ടം പെട്രോൾ പമ്പിന് സമീപമായിരുന്നു ദാരുണമായ ഈ അപകടം സംഭവിച്ചത്. ശാസ്താംകോട്ട ഭാഗത്തേക്ക് പോവുകയായിരുന്ന സ്വകാര്യ ബസ്, മുന്നിലുണ്ടായിരുന്ന കെ.എസ്.ആർ.ടി.സി ബസിനെ മറികടക്കാൻ ശ്രമിച്ചതാണ് ദുരന്തത്തിന് കാരണമായത്. അമിതവേഗതയിലെത്തിയ സ്വകാര്യ ബസ് നിയന്ത്രണം വിട്ട് ബൈക്കിലേക്ക് ഇടിച്ചുകയറുകയായിരുന്നുവെന്ന് ദൃക്സാക്ഷികൾ പറഞ്ഞു.
ഇടിയുടെ ആഘാതത്തിൽ സംഭവസ്ഥലത്തു വച്ചുതന്നെ ശശി മരണപ്പെട്ടിരുന്നു. അപകടത്തെ തുടർന്ന് പ്രകോപിതരായ നാട്ടുകാർ സ്വകാര്യ ബസിന്റെ അശ്രദ്ധമായ ഡ്രൈവിംഗിനെതിരെ പ്രതിഷേധിച്ചു. അപകടവിവരമറിഞ്ഞ് സ്ഥലത്തെത്തിയ അധികൃതർ ശശിയുടെ മൃതദേഹം കരുനാഗപ്പള്ളി താലൂക്ക് ആശുപത്രി മോർച്ചറിയിലേക്ക് മാറ്റി. ഇൻക്വസ്റ്റ് നടപടികൾക്കും പോസ്റ്റ്മോർട്ടത്തിനും ശേഷം മൃതദേഹം ബന്ധുക്കൾക്ക് വിട്ടുനൽകും. പോലീസ് സംഭവത്തിൽ കേസെടുത്ത് അന്വേഷണം ആരംഭിച്ചിട്ടുണ്ട്.
Story Summary:
A 54-year-old bike rider, Shashi from Thodiyoor, was killed after being hit by a speeding private bus near Mararithottam in Kollam. His 27-year-old daughter, Sharanya, sustained severe injuries and is currently undergoing treatment at a private hospital.
