റിപ്പോർട്ട്: അൻവർ ഷരിഫ്
ബംഗളൂരുവിൽ നടന്ന നാഷണൽ റോബോട്ടിക് ഒളിംപിക്സിൽ കേരളത്തെ പ്രതിനിധീകരിച്ച് പങ്കെടുത്ത കക്കോവ് പിഎംഎസ്എപിടിഎച്ച്എസ് (PMSAPTHS) സ്കൂളിലെ വിദ്യാർത്ഥികൾ മികച്ച നേട്ടം കൈവരിച്ചു (National Robotic Olympics). രാജ്യത്തെ മികച്ച അടൽ ടിങ്കറിങ് ലാബുകളിൽ (ATL) നിന്ന് തിരഞ്ഞെടുക്കപ്പെട്ട 20 ടീമുകൾ മാത്രം പങ്കെടുത്ത “ഭാരതീയ യാത്രാ ഖേൽ മഹോത്സവ്” എന്ന നാഷണൽ പ്രോഗ്രാമിൽ, കക്കോവ് സ്കൂളിലെ ‘ടീം ടെക് ഇന്നോവേഷൻസ്’ ഏഴാം സ്ഥാനം കരസ്ഥമാക്കി. ടീം ലീഡർ ഹസീഫ് മുഹമ്മദ്, ആഗ്നേയ്, അർച്ചിത്, നിരഞ്ജൻ, അനയ് കൃഷ്ണ എന്നിവരടങ്ങുന്ന സംഘമാണ് റോബോട്ടുകളുമായി മത്സരത്തിൽ പങ്കെടുത്തത്.
മുൻ വർഷങ്ങളിലും ശാസ്ത്രലോകത്ത് ശ്രദ്ധേയമായ പല മോഡലുകൾ നിർമ്മിച്ച് ഇവർ വ്യക്തിമുദ്ര പതിപ്പിച്ചിട്ടുണ്ട്. എ ഐ ടീച്ചർ, എ ഐ ഡോക്ടർ, ഫയർ റസ്ക്യൂ റോബോട്ട്, പൈറോലിങ്ക് ഫോറസ്റ്റ് പ്രൊട്ടക്ഷൻ സിസ്റ്റം, എ ഐ ബ്ലൈൻഡ് സ്പെക്റ്റ്സ് തുടങ്ങിയവ ഇവരുടെ മികച്ച കണ്ടുപിടുത്തങ്ങളിൽ ചിലതാണ്. വൈഐപി (YIP) ശാസ്ത്രപഥം, ബിഗ് ബാങ്ക് ഇന്നോവേഷൻ ചാലഞ്ച്, സയൻസ് കോൺഗ്രസ് തുടങ്ങി നിരവധി മത്സരങ്ങളിൽ മിന്നുന്ന വിജയം ഇവർ നേടിയിട്ടുണ്ട്. സ്കൂൾ സമയങ്ങൾക്ക് പുറമെ അവധി ദിവസങ്ങളിലും എടിഎൽ ലാബിൽ കഠിനാധ്വാനം ചെയ്താണ് ഇവർ ഈ നേട്ടങ്ങൾ കൈവരിച്ചത്. അധ്യാപകനായ വി.കെ. അനൂപിന്റെ നേതൃത്വത്തിലുള്ള സാങ്കേതിക സഹായവും മാനേജ്മെന്റ്, സ്റ്റാഫ്, പി.ടി.എ എന്നിവരുടെ പിന്തുണയും ഈ സ്കൂളിനെ എഐ പഠനത്തിൽ സംസ്ഥാനത്തെ തന്നെ മികച്ച സ്ഥാപനമാക്കി മാറ്റാൻ സഹായിച്ചു.
Summary: Students from PMSAPTHS Kakkov, representing Kerala, secured seventh place at the National Robotic Olympics held in Bengaluru. The team, ‘Tech Innovations,’ was selected from top Atal Tinkering Labs (ATL) across India to compete in the prestigious “Bharathiya Yatra Khel Mahotsav.” The team, comprising Haseef Muhammed, Aagneya, Archith, Niranjan, and Anay Krishna, showcased their expertise with advanced robotic models.
