തിരുവനന്തപുരം: സെൻസസ് 2027-ന്റെ ഒന്നാം ഘട്ടമായ ഹൗസ്ലിസ്റ്റിംഗ് ആൻഡ് ഹൗസിംഗ് സെൻസസിന് കേരളത്തിൽ നാളെ (ജൂൺ 16, 2026) തുടക്കമാകും. 15 ദിവസം നീണ്ടുനിൽക്കുന്ന സെൽഫ്-എന്യൂമറേഷൻ പ്രക്രിയയിലൂടെ പൊതുജനങ്ങൾക്ക് തങ്ങളുടെ വീട്ടുവിവരങ്ങൾ ഓൺലൈനായി സമർപ്പിക്കാം.(Census 2027 Kerala self enumeration phase begins on June 16)
https://se.census.gov.in/ എന്ന വെബ്സൈറ്റ് വഴി ജൂൺ 30 വരെ വിവരങ്ങൾ സമർപ്പിക്കാം. നാളെ രാവിലെ 6 മണി മുതൽ പോർട്ടൽ പ്രവർത്തനസജ്ജമാകും. ഇന്ത്യൻ അതിർത്തിക്കുള്ളിൽ നിന്ന് മാത്രമേ പോർട്ടൽ ആക്സസ് ചെയ്യാൻ സാധിക്കൂ. വാടകയ്ക്ക് താമസിക്കുന്നവരാണെങ്കിൽ, നിലവിൽ താമസിക്കുന്നവരാണ് വിവരങ്ങൾ പൂരിപ്പിക്കേണ്ടത്. താമസസ്ഥലം എന്ന ആശയത്തെ അടിസ്ഥാനമാക്കിയാണ് ഇത്.
സെൽഫ്-എന്യൂമറേഷൻ പൂർത്തിയാകുമ്പോൾ ലഭിക്കുന്ന 11 അക്ക ‘SE ID’ ജൂലൈ 1 മുതൽ 30 വരെ വീടുകളിലെത്തുന്ന എന്യൂമറേറ്റർമാർക്ക് കൈമാറണം. വിവരങ്ങളുടെ പൂർണ്ണമായ സുരക്ഷയും സ്വകാര്യതയും ഉറപ്പാക്കുമെന്ന് ജനറൽ അഡ്മിനിസ്ട്രേഷൻ ഡിപ്പാർട്ട്മെന്റ് സെക്രട്ടറിയും, കേരളത്തിലെ സെൻസസ് ഓപ്പറേഷൻസ് ഡയറക്ടറും അറിയിച്ചു. വ്യക്തിഗത വിവരങ്ങൾ പ്രസിദ്ധീകരിക്കില്ലെന്നും, ക്രോഡീകരിച്ച വിവരങ്ങൾ മാത്രമേ പുറത്തുവിടൂ എന്നും അധികൃതർ വ്യക്തമാക്കി. 33 ചോദ്യങ്ങളാണ് ആദ്യഘട്ടത്തിലുള്ളത്.
സംസ്ഥാനത്താകെ 61,282 എന്യൂമറേറ്റർമാരെയും 10,189 സൂപ്പർവൈസർമാരെയും ഇതിനായി നിയോഗിച്ചിട്ടുണ്ട്. പ്രധാനമായും അധ്യാപകരും സർക്കാർ ജീവനക്കാരുമാണ് ഈ ചുമതല നിർവഹിക്കുന്നത്. മൊബൈൽ ആപ്പ് വഴിയായിരിക്കും വിവരശേഖരണം. ഒന്നാം ഘട്ടത്തിന് ശേഷം 2027 ഫെബ്രുവരിയിൽ പോപ്പുലേഷൻ എന്യൂമറേഷൻ (രണ്ടാം ഘട്ടം) നടക്കും. കൂടുതൽ വിവരങ്ങൾക്ക് 1855 എന്ന ടോൾ-ഫ്രീ ഹെൽപ്പ്ലൈൻ നമ്പറിൽ ബന്ധപ്പെടാവുന്നതാണ്.
Story Summary
Kerala begins the 15-day self-enumeration phase for Census 2027 on June 16, 2026, allowing citizens to submit household details via an official portal. The process, which aims to ensure full data privacy, will be followed by field verification by enumerators from July 1 to July 30, utilizing a mobile app for efficient digital data collection.
