വാഷിംഗ്ടൺ: ചൈനയുടെ വിതരണ ശൃംഖലയിലെ ആധിപത്യത്തെ നേരിടാൻ ഇന്ത്യയും അമേരിക്കയും കൈകോർക്കുന്നു. ഇരുരാജ്യങ്ങളും തമ്മിൽ നിർണ്ണായക ധാതുക്കളുടെയും അപൂർവ്വ എർത്ത് മൂലകങ്ങളുടെയും വിതരണത്തിൽ സഹകരണം വർദ്ധിപ്പിക്കുന്നതിനായി ‘യുഎസ്-ഇന്ത്യ ക്രിട്ടിക്കൽ മിനറൽസ് സെക്യൂരിറ്റി ടാസ്ക്ഫോഴ്സ്’ (US-India Critical Minerals Security Taskforce) രൂപീകരിച്ചു. ഇതിന്റെ ആദ്യയോഗം കഴിഞ്ഞ ആഴ്ച വാഷിംഗ്ടണിൽ നടന്നു. ഇരുരാജ്യങ്ങളിലെയും പ്രമുഖരായ 17 കമ്പനികൾ ഉൾപ്പെടുന്ന ഈ കൂട്ടായ്മ, ലിഥിയം ശുദ്ധീകരണം, ബാറ്ററി നിർമ്മാണം, ധാതുക്കളുടെ പുനരുപയോഗം തുടങ്ങിയ മേഖലകളിൽ സഹകരിച്ച് പ്രവർത്തിക്കും.
വിദേശകാര്യമന്ത്രി ഡോ. എസ്. ജയശങ്കറും യുഎസ് സ്റ്റേറ്റ് സെക്രട്ടറി മാർക്കോ റൂബിയോയും തമ്മിൽ കഴിഞ്ഞ മാസം ഒപ്പുവെച്ച സുപ്രധാന കരാറിന്റെ തുടർച്ചയായാണ് ഈ പുതിയ ടാസ്ക്ഫോഴ്സ് നിലവിൽ വന്നത്. ലിഥിയം, അപൂർവ്വ ധാതുക്കൾ എന്നിവയുടെ സംസ്കരണത്തിൽ ചൈനയ്ക്കുള്ള അമിത ആശ്രയത്വം കുറയ്ക്കുക എന്നതാണ് ഇതിന്റെ പ്രധാന ലക്ഷ്യം. ലിഥിയം ശുദ്ധീകരണം, ബാറ്ററി-ഗ്രേഡ് സിന്തറ്റിക് ഗ്രാഫൈറ്റ് ഉത്പാദനം, കാന്തം നിർമ്മാണം തുടങ്ങിയ അഞ്ച് മേഖലകൾക്കാണ് ടാസ്ക്ഫോഴ്സ് മുൻഗണന നൽകുന്നത്. ഇന്ത്യയുടെ വ്യാവസായിക-സംസ്കരണ ശേഷിയും അമേരിക്കയുടെ സാങ്കേതികവിദ്യയും മൂലധനവും സംയോജിപ്പിക്കുന്നത് വഴി കൂടുതൽ സുസ്ഥിരമായ വിതരണ ശൃംഖല കെട്ടിപ്പടുക്കാൻ സാധിക്കുമെന്ന് യുഎസ്-ഇന്ത്യ ബിസിനസ് കൗൺസിൽ മാനേജിംഗ് ഡയറക്ടർ രാഹുൽ ശർമ്മ വ്യക്തമാക്കി.
ഹരിത ഊർജ്ജത്തിലേക്കുള്ള ആഗോള മാറ്റത്തിൽ നിർണ്ണായകമായ ലിഥിയം, മറ്റ് ധാതുക്കൾ എന്നിവയുടെ ലഭ്യത ഉറപ്പാക്കുന്നതിനായി ക്വാഡ് ക്രിട്ടിക്കൽ മിനറൽസ് ഇനിഷ്യേറ്റീവ് ഉൾപ്പെടെയുള്ള ആഗോള ശ്രമങ്ങളുടെ ഭാഗമായാണ് ഈ സഹകരണം. സാങ്കേതികവിദ്യ വികസനം, നിക്ഷേപ അവസരങ്ങൾ കണ്ടെത്തൽ, നയപരമായ തടസ്സങ്ങൾ നീക്കൽ എന്നിവയ്ക്കായി ടാസ്ക്ഫോഴ്സ് നാല് പ്രത്യേക കർമ്മപദ്ധതികൾ രൂപീകരിച്ചിട്ടുണ്ട്. ആഗോള തലത്തിൽ ഉർജ്ജ സുരക്ഷയും വ്യാവസായിക വികസനവും ലക്ഷ്യമിട്ടുള്ള ഇന്ത്യ-യുഎസ് സഹകരണം ഏഷ്യൻ മേഖലയിലെ തന്ത്രപരമായ നീക്കങ്ങളിൽ നിർണ്ണായകമാകും.
Summary: The US and India have launched the ‘Critical Minerals Security Taskforce’ to build resilient supply chains and reduce reliance on China-dominated resource networks. Comprising 17 leading American and Indian companies, the taskforce focuses on strategic sectors such as lithium refining, battery-grade graphite production, and rare-earth processing.
