ന്യൂഡൽഹി: ലോകമെമ്പാടുമുള്ള ഫുട്ബോൾ ആരാധകർ കാത്തിരുന്ന ഫിഫ ലോകകപ്പ് 2026-ന് ഇന്ന് തുടക്കമാകും. ചരിത്രത്തിലാദ്യമായി മൂന്ന് രാജ്യങ്ങളായ മെക്സിക്കോ, അമേരിക്ക, കാനഡ എന്നിവ ചേർന്നാണ് ലോകകപ്പിന് ആതിഥേയത്വം വഹിക്കുന്നത്. ഉദ്ഘാടന മത്സരത്തിൽ മെക്സിക്കോയും ദക്ഷിണാഫ്രിക്കയും ഏറ്റുമുട്ടും (FIFA World Cup 2026). ഇന്ത്യൻ സമയം ജൂൺ 12 പുലർച്ചെ 12:30-നാണ് മെക്സിക്കോ സിറ്റി സ്റ്റേഡിയത്തിൽ ഉദ്ഘാടന മത്സരം ആരംഭിക്കുക. ലോകകപ്പിന്റെ സംപ്രേഷണാവകാശം ഇന്ത്യയിൽ സീ എന്റർടെയ്ൻമെന്റ് സ്വന്തമാക്കിയതോടെ മത്സരങ്ങൾ ഒ.ടി.ടി പ്ലാറ്റ്ഫോമായ Zee5-ലും പുതിയ സ്പോർട്സ് ചാനലുകളിലുമായി തത്സമയം കാണാൻ സാധിക്കും. ഫുട്ബോൾ ആരാധകർക്ക് സ്മാർട്ട്ഫോൺ, ടാബ്ലെറ്റ്, സ്മാർട്ട് ടി.വി, ലാപ്ടോപ്പ് തുടങ്ങിയ ഉപകരണങ്ങളിലൂടെ Zee5 ആപ്പിലോ വെബ്സൈറ്റിലോ എല്ലാ മത്സരങ്ങളും തത്സമയം കാണാം. ലോകകപ്പിനായി പ്രത്യേകമായി Zee5 FIFA World Cup 2026 + All Access സബ്സ്ക്രിപ്ഷൻ പ്ലാനും അവതരിപ്പിച്ചിട്ടുണ്ട്.
ടെലിവിഷൻ പ്രേക്ഷകർക്ക് Unite8 Sports 1, Unite8 Sports 1 HD, Unite8 Sports 2, Unite8 Sports 2 HD എന്നീ ചാനലുകളിലൂടെ മത്സരങ്ങൾ സംപ്രേഷണം ചെയ്യും. കൂടാതെ ഡിഡി സ്പോർട്സ് വഴിയും തിരഞ്ഞെടുക്കപ്പെട്ട മത്സരങ്ങൾ സൗജന്യമായി കാണാൻ സാധിക്കും. ക്വാർട്ടർ ഫൈനലുകൾ, സെമിഫൈനലുകൾ, ഫൈനൽ എന്നിവ ഡിഡി സ്പോർട്സ് സംപ്രേഷണം ചെയ്യും. ഈ വർഷത്തെ ലോകകപ്പിൽ 48 ടീമുകളാണ് മത്സരിക്കുന്നത്. ആകെ 104 മത്സരങ്ങളാണ് ടൂർണമെന്റിൽ നടക്കുക. ഫൈനൽ മത്സരം ജൂലൈ 20-ന് ഇന്ത്യൻ സമയം പുലർച്ചെ നടക്കും. മെക്സിക്കോ-ദക്ഷിണാഫ്രിക്ക ഉദ്ഘാടന മത്സരത്തിന് പുറമെ ദക്ഷിണ കൊറിയ-ചെക്കിയ, കാനഡ-ബോസ്നിയ & ഹെർസഗോവിന, അമേരിക്ക-പരാഗ്വേ തുടങ്ങിയ മത്സരങ്ങളും ആദ്യ ദിവസങ്ങളിൽ അരങ്ങേറും. ലോകകപ്പ് ഫുട്ബോളിന്റെ ആവേശം അടുത്ത ഒരു മാസക്കാലം ലോകമെമ്പാടുമുള്ള ആരാധകരെ ആവേശത്തിലാഴ്ത്തും.
Summary: FIFA World Cup 2026 begins today with hosts Mexico taking on South Africa in the opening match. Indian viewers can watch all matches live on Zee5 and the Unite8 Sports channels, while selected knockout matches will also be available on DD Sports. The expanded tournament features 48 teams and 104 matches across Mexico, the United States, and Canada.
