ടെക്സാസ്: ഇന്ത്യൻ മാമ്പഴങ്ങളെയും അവ വാങ്ങുന്ന ഇന്ത്യൻ വംശജരായ ഉപഭോക്താക്കളെയും പരിഹസിച്ച് അമേരിക്കൻ കൺസർവേറ്റീവ് കമന്റേറ്ററും പോഡ്കാസ്റ്ററുമായ സാറ ഗൊൺസാലസ് ( American Podcaster Indian Mango Controversy). ഇന്ത്യൻ മാമ്പഴങ്ങളെ “വെറുപ്പുളവാക്കുന്നവ” എന്ന് വിശേഷിപ്പിച്ച അവർ, പ്രാദേശിക കോസ്റ്റ്കോ സ്റ്റോറിൽ കയറുമ്പോൾ “മുംബൈയിലെത്തിയ പോലെ തോന്നുന്നു” എന്ന പരാമർശവും നടത്തി. ‘സാര ഗോൺസാലസ് അൺഫിൽറ്റേഡ്’ എന്ന പരിപാടിക്കിടെയായിരുന്നു വിവാദ പരാമർശങ്ങൾ. അമേരിക്കയിൽ ഇന്ത്യൻ മാമ്പഴങ്ങൾക്ക് വർധിച്ചുവരുന്ന ആവശ്യകതയെക്കുറിച്ച് സംസാരിക്കവെ, വാട്ട്സ്ആപ്പ് ഗ്രൂപ്പുകളിലൂടെയും റോഡ്സൈഡ് വിൽപ്പനക്കാരിലൂടെയും മാമ്പഴങ്ങൾ വിൽക്കുന്ന രീതിയെ അവർ പരിഹസിച്ചു.
ബംഗനപ്പള്ളി മാമ്പഴത്തെ പരാമർശിച്ച അവർ, “ആ പേര് പോലും ആകർഷകമായി തോന്നുന്നില്ല” എന്നായിരുന്നു പ്രതികരണം. തുടർന്ന് കോസ്റ്റ്കോയിൽ ഇന്ത്യൻ മാമ്പഴങ്ങൾ വിൽക്കുന്നതിനെക്കുറിച്ച് സംസാരിക്കവെ, “എന്റെ പ്രാദേശിക കോസ്റ്റ്കോയിൽ കയറുമ്പോഴെല്ലാം ഞാൻ മുംബൈയിലാണെന്ന് തോന്നുന്നു. അവിടേക്ക് വരുന്ന ഉപഭോക്താക്കളെ പരിഗണിച്ചായിരിക്കാം ഇത്” എന്നും അവർ പറഞ്ഞു. അമേരിക്കയിൽ ഇന്ത്യൻ മാമ്പഴങ്ങൾക്ക് ലഭിക്കുന്ന ജനപ്രീതി സംബന്ധിച്ച ഒരു വാർത്തയെ ഉദ്ധരിച്ച ഗോൺസാലസ്, “മാമ്പഴങ്ങൾ വാങ്ങാൻ തിരക്ക് കൂട്ടുന്നത് അമേരിക്കക്കാരല്ല, ഇവിടെ വന്നെത്തുന്നവരാണ്” എന്നും അഭിപ്രായപ്പെട്ടു.
തുടർന്ന് ഭക്ഷ്യസുരക്ഷാ വിഷയവും അവർ ഉയർത്തിക്കാട്ടി. ഇന്ത്യൻ മാമ്പഴങ്ങളുടെ ചില കയറ്റുമതികളുമായി ബന്ധപ്പെട്ട് ജപ്പാനും നേപ്പാളും അടുത്തിടെ ഉയർത്തിയ പരിശോധനാ ആശങ്കകൾ ചൂണ്ടിക്കാട്ടി, “ഇന്ത്യയിൽ നിന്ന് വരുന്ന മറ്റ് ഭക്ഷ്യവസ്തുക്കളെപ്പോലെ തന്നെ മാമ്പഴങ്ങളും ജൈവ അപകടസാധ്യതയുള്ളവയാണ്” എന്ന വിവാദ പരാമർശവും അവർ നടത്തി.
ഗോൺസാലസിന്റെ പരാമർശങ്ങൾ സാമൂഹിക മാധ്യമങ്ങളിൽ വ്യാപക വിമർശനത്തിന് വഴിവെച്ചിട്ടുണ്ട്. ഇന്ത്യൻ ഭക്ഷ്യസംസ്കാരത്തെയും പ്രവാസി സമൂഹത്തെയും അപമാനിക്കുന്ന തരത്തിലുള്ള പരാമർശങ്ങളാണിതെന്നാണ് നിരവധി പേരുടെ പ്രതികരണം.
Summary: Texas-based podcaster Sara Gonzales has sparked controversy after mocking Indian mangoes and Indian-origin shoppers in the United States. In a video segment, she described Indian mangoes as “disgusting” and remarked that visiting her local Costco felt “like being in Mumbai.” She questioned the popularity and price of imported Indian mangoes and also cited recent concerns raised by Japan and Nepal regarding some Indian mango shipments. Her comments have drawn criticism on social media, with many accusing her of stereotyping Indians and disrespecting Indian food culture.
