മെക്സിക്കോ സിറ്റി: ലോക ഫുട്ബോളിന്റെ ഏറ്റവും വലിയ മാമാങ്കമായ ഫിഫ ലോകകപ്പ് 2026-ന് ഇന്ന് ഔദ്യോഗിക തുടക്കമാകും. ഉദ്ഘാടന മത്സരത്തിൽ ആതിഥേയരായ മെക്സിക്കോയും ദക്ഷിണാഫ്രിക്കയും ഏറ്റുമുട്ടും (FIFA Opening Match). ചരിത്രത്തിലാദ്യമായി മൂന്ന് രാജ്യങ്ങൾ സംയുക്തമായി ആതിഥേയത്വം വഹിക്കുന്ന ലോകകപ്പാണ് ഇത്തവണത്തേത്. മെക്സിക്കോ, കാനഡ, അമേരിക്ക എന്നിവിടങ്ങളിലായാണ് മത്സരങ്ങൾ നടക്കുന്നത്. ഉദ്ഘാടന മത്സരം പ്രശസ്തമായ എസ്റ്റാഡിയോ അസ്റ്റെക്ക സ്റ്റേഡിയത്തിലാണ് അരങ്ങേറുന്നത്.
മത്സരത്തിന് മുന്നോടിയായി നടന്ന വാർത്താസമ്മേളനത്തിൽ ദക്ഷിണാഫ്രിക്കൻ പരിശീലകനായ ഹ്യൂഗോ ബ്രൂസും മധ്യനിര താരം ടെബോഹോ മൊകോയേനയും ടീമിന്റെ ആത്മവിശ്വാസം പ്രകടിപ്പിച്ചു. ശക്തരായ ആതിഥേയരെ നേരിടുന്നത് വെല്ലുവിളിയാണെങ്കിലും മികച്ച പ്രകടനം കാഴ്ചവെക്കാനാകുമെന്നാണ് അവരുടെ പ്രതീക്ഷ. 48 ടീമുകൾ പങ്കെടുക്കുന്ന ആദ്യ ലോകകപ്പാണ് 2026 പതിപ്പ്. ആകെ 104 മത്സരങ്ങളാണ് ടൂർണമെന്റിൽ നടക്കുക. ഫുട്ബോൾ ആരാധകർ ഏറെ പ്രതീക്ഷയോടെ കാത്തിരിക്കുന്ന ടൂർണമെന്റിന് വർണാഭമായ ഉദ്ഘാടന ചടങ്ങുകളും ഒരുക്കിയിട്ടുണ്ട്. മെക്സിക്കോയുടെ ഹോം ഗ്രൗണ്ടിൽ നടക്കുന്ന ഉദ്ഘാടന മത്സരത്തിൽ വിജയത്തോടെ ലോകകപ്പ് യാത്ര ആരംഭിക്കാനാണ് ഇരുടീമുകളും ലക്ഷ്യമിടുന്നത്.
Summary: The FIFA World Cup 2026 kicks off today with hosts Mexico facing South Africa in the opening match at the iconic Estadio Azteca in Mexico City. This is the first World Cup to be jointly hosted by three nations — Mexico, Canada, and the United States. South Africa head coach Hugo Broos and midfielder Teboho Mokoena expressed confidence ahead of the match. The expanded tournament features 48 teams and 104 matches, making it the largest FIFA World Cup in history.
Keywords
