മുംബൈ: മുംബൈ കോർപ്പറേഷൻ (BMC) മേയർ റിതു താവ്ഡെയുടെ Mumbai Mayor Ritu Tawde bomb threat) ഔദ്യോഗിക വഹനവും ഓഫീസും ബോംബെറിഞ്ഞ് തകർക്കുമെന്ന് ഭീഷണിപ്പെടുത്തി ഇമെയിൽ വഴി ഭീഷണി. മുംബൈ മേയർ ഓഫീസിന് പുറമെ മുഖ്യമന്ത്രിയുടെ ഓഫീസിനും (CMO) സമാനമായ രീതിയിൽ ഭീഷണി സന്ദേശം ലഭിച്ചിട്ടുണ്ട്. സംഭവത്തെ തുടർന്ന് മുംബൈ പോലീസും ബോംബ് ഡിറ്റക്ഷൻ ആൻഡ് ഡിസ്പോസൽ സ്ക്വാഡും (BDDS) നഗരത്തിലെ പ്രധാന കേന്ദ്രങ്ങളിൽ വൻ തിരച്ചിൽ ആരംഭിച്ചു.
ബുധനാഴ്ച ഉച്ചയോടെയാണ് ഐഇഡി (IED) ബോംബുകൾ ഉപയോഗിച്ച് സ്ഫോടനം നടത്തുമെന്ന മുന്നറിയിപ്പോടെയുള്ള ഇമെയിൽ അധികൃതർക്ക് ലഭിക്കുന്നത്. കൃത്യമായ തീയതിയും സമയവും രേഖപ്പെടുത്തിക്കൊണ്ടുള്ളതായിരുന്നു ഭീഷണി സന്ദേശം. കൺട്രോൾ റൂമിൽ വിവരമറിയിച്ചതിനെ തുടർന്ന് ബിഎംസി ആസ്ഥാന മന്ദിരത്തിൽ നിന്നും ജീവനക്കാരെയും സന്ദർശകരെയും അടിയന്തരമായി ഒഴിപ്പിച്ചു. സുരക്ഷാ മുൻകരുതലുകളുടെ ഭാഗമായി മുംബൈയിലും സമീപ നഗരമായ പുണെയിലെ മേയർ ഓഫീസുകളിലും അതീവ ജാഗ്രതാ നിർദ്ദേശം (Security Alert) പുറപ്പെടുവിച്ചിട്ടുണ്ട്.
മേയറുടെ ഔദ്യോഗിക വസതിക്കും വാഹനങ്ങൾക്കും കോർപ്പറേഷൻ പരിസരത്തും കനത്ത പോലീസ് കാവലാണ് ഏർപ്പെടുത്തിയിരിക്കുന്നത്. നഗരത്തിലെ റെയിൽവേ സ്റ്റേഷനുകൾ, വിമാനത്താവളങ്ങൾ, ജനത്തിരക്കേറിയ വിപണികൾ എന്നിവിടങ്ങളിലും പരിശോധന കർശനമാക്കി. വ്യാജ ഇമെയിൽ ഐഡി ഉപയോഗിച്ചാണ് സന്ദേശം അയച്ചിരിക്കുന്നതെന്നാണ് സൈബർ പോലീസിന്റെ പ്രാഥമിക നിഗമനം.
വിഷയത്തിൽ മുംബൈ ക്രൈംബ്രാഞ്ചും സൈബർ സെല്ലും സംയുക്തമായി അന്വേഷണം ആരംഭിച്ചിട്ടുണ്ട്. സന്ദേശത്തിന്റെ ഉറവിടം കണ്ടെത്താനായി ഇന്റർനെറ്റ് പ്രോട്ടോക്കോൾ (IP) വിലാസം കേന്ദ്രീകരിച്ചാണ് നിലവിൽ അന്വേഷണം പുരോഗമിക്കുന്നത്. നഗരവാസികൾ ആരും പരിഭ്രാന്തരാകേണ്ടതില്ലെന്നും സുരക്ഷ ഉറപ്പാക്കാൻ പോലീസ് സദാ സന്നദ്ധമാണെന്നും മുംബൈ പോലീസ് കമ്മീഷണർ അറിയിച്ചു.
