റിപ്പോർട്ട് : അൻവർ ഷരീഫ്
കൊണ്ടോട്ടി: ആഗോള ഫുട്ബോൾ ലോകകപ്പിന്റെ വരവറിയിച്ച് മലബാറിന്റെ ഫുട്ബോൾ മണ്ണായ കൊണ്ടോട്ടിയും വൻ ഒരുക്കങ്ങളിലേക്ക് (Kondotty MLA box football world cup fan park). ലോകകപ്പിലെ ആവേശകരമായ മത്സരങ്ങൾ പൊതുജനങ്ങൾക്ക് തത്സമയം തത്സമയം കാണുന്നതിനായി മണ്ഡലത്തിൽ സജ്ജീകരിക്കുന്ന ‘എം.എൽ.എ. ബോക്സിന്റെ’ (MLA Box) ഔദ്യോഗിക പ്രഖ്യാപനം കായിക വകുപ്പ് മന്ത്രി ഒ.ജെ. ജനീഷ് നിർവഹിച്ചു.
കൊണ്ടോട്ടി നിയോജക മണ്ഡലം എംഎൽഎ ടി.പി. അഷ്റഫലിയുടെ സവിശേഷമായ നേതൃത്വത്തിലാണ് ഈ വിപുലമായ ഫാൻ പാർക്ക് ഒരുങ്ങുന്നത്. കൊണ്ടോട്ടിയിലെ സാംസ്കാരിക കേന്ദ്രമായ മഹാകവി മോയിൻകുട്ടി വൈദ്യർ മാപ്പിളകലാ അക്കാദമി സ്മാരകത്തിലാണ് ഫുട്ബോൾ ആരാധകർക്കായി ഈ ബോക്സ് സ്ഥാപിക്കുന്നത്. ലോകകപ്പ് ടൂർണമെന്റിലെ മുഴുവൻ മത്സരങ്ങളും ഹൈഡെഫനിഷൻ (HD) ബിഗ് സ്ക്രീനിൽ ഇവിടെ സൗജന്യമായി പ്രദർശിപ്പിക്കും. മത്സര പ്രദർശനങ്ങൾക്ക് പുറമെ, പ്രമുഖ വ്യക്തിത്വങ്ങൾക്കൊപ്പം കളി കാണാനുള്ള ‘വാച്ച് വിത്ത് സെലിബ്രിറ്റി` (Watch with Celebrity) പ്രോഗ്രാം, തത്സമയ കമന്ററി മത്സരം, ഫുട്ബോൾ ക്വിസ് അടക്കമുള്ള വൈവിധ്യമാർന്ന അനുബന്ധ പരിപാടികളും ബോക്സിന്റെ ഭാഗമായി സംഘടിപ്പിക്കും.
“ഒരുപാട് കാൽപ്പന്ത് ആരാധകരുള്ള നാടാണ് കൊണ്ടോട്ടി. അവർക്ക് സ്റ്റേഡിയം അന്തരീക്ഷത്തിൽ മികച്ചൊരു കളിവിരുന്ന് സമ്മാനിക്കുക എന്ന ലക്ഷ്യത്തിലാണ് എംഎൽഎ ബോക്സ് എന്ന ആശയത്തിലേക്ക് ഞങ്ങൾ എത്തിയത്. ഇന്ത്യൻ പ്രീമിയർ ലീഗ് (IPL) ക്രിക്കറ്റിൽ വലിയ വിജയമായ ഫാൻ പാർക്കുകളുടെ മാതൃകയിലായിരിക്കും ഈ ബോക്സിന്റെയും പ്രവർത്തനം. കൊണ്ടോട്ടിയുടെ പരമ്പരാഗത ഫുട്ബോൾ ആവേശം കൂടുതൽ ഉയരങ്ങളിലെത്തിക്കാൻ ഈ സംരംഭത്തിന് സാധിക്കുമെന്ന് പ്രതീക്ഷിക്കുന്നു,” എന്ന് എംഎൽഎ ടി.പി. അഷ്റഫലി വ്യക്തമാക്കി.
ചടങ്ങിൽ ചെറുകാവ് ഗ്രാമപഞ്ചായത്ത് പ്രസിഡന്റ് ജസീന ആലുങ്ങൽ, പ്രമുഖ അന്താരാഷ്ട്ര ഫുട്ബോൾ താരം അനസ് എടത്തൊടിക, കൊണ്ടോട്ടി ബ്ലോക്ക് പഞ്ചായത്ത് സ്റ്റാൻഡിംഗ് കമ്മിറ്റി ചെയർമാൻ കബീർ മുതുപറമ്പ്, ഡിസിസി (DCC) സെക്രട്ടറി പി.എ. അബ്ദുൽ അലി, എംഎസ്എഫ് (MSF) ദേശീയ പ്രസിഡന്റ് അഹമ്മദ് സാജു, കെ. ഷറഫലി, കുഞ്ഞുമോൻ ഐക്കരപ്പടി, അഹമ്മദ് സുഹൈൽ, ഷാഹിദ്, ഹാരിസ് മുതൂർ, മൻസൂർ കൊട്ടപ്പുറം, പി.എ. ഫർസീൻ എന്നിവർ പങ്കെടുത്തു.
Story Summary: Kondotty is gearing up for the Football World Cup with the announcement of the ‘MLA Box’ fan park, initialized by Kondotty MLA T.P. Ashrafali. Minister for Sports O.J. Janeesh officially launched the project, which will be set up at the Moyinkutty Vaidyar Memorial. The box features big screen live match screenings, ‘Watch with Celebrity’ interactive sessions, commentary challenges, and football quizzes tailored after IPL fan parks.
