സെന്റ് പീറ്റേഴ്സ്ബർഗ്: നാല് വർഷമായി തുടരുന്ന റഷ്യ-ഉക്രെയ്ൻ യുദ്ധം അവസാനിപ്പിക്കുന്നതിനായി ഉക്രെയ്ൻ പ്രസിഡന്റ് വോളോഡിമിർ സെലൻസ്കി മുന്നോട്ടുവെച്ച നേരിട്ടുള്ള സമാധാന ചർച്ചയ്ക്കുള്ള നിർദ്ദേശം റഷ്യൻ പ്രസിഡന്റ് വ്ലാഡിമിർ പുടിൻ തള്ളി (Putin Rejects Zelenskyy Face To Face Meeting). സെന്റ് പീറ്റേഴ്സ്ബർഗ് അന്താരാഷ്ട്ര സാമ്പത്തിക ഫോറത്തിനിടെ മാധ്യമങ്ങളോട് സംസാരിക്കവെ, നിലവിലെ സാഹചര്യത്തിൽ സെലൻസ്കിയുമായി നേരിട്ട് കൂടിക്കാഴ്ച നടത്തുന്നതിൽ യാതൊരു അർത്ഥവുമില്ലെന്ന് പുടിൻ വ്യക്തമാക്കി.
ചർച്ച വേണമെന്നാവശ്യപ്പെട്ട് സെലൻസ്കി അയച്ച തുറന്ന കത്ത് അങ്ങേയറ്റം മര്യാദകേടാണെന്നു, സമാധാന അന്തരീക്ഷം ഉണ്ടാക്കുന്നതിന് പകരം ചർച്ചകൾ അസാധ്യമാക്കുന്ന രീതിയിലാണ് കത്തിലെ പരാമർശങ്ങളെന്നും പുടിൻ കുറ്റപ്പെടുത്തി. ഉക്രെയ്ന് ചർച്ചകളിൽ ആത്മാർത്ഥതയുണ്ടെങ്കിൽ വിദഗ്ദ്ധർ ആദ്യം ചർച്ച ചെയ്ത് കരാറിന്റെ ഔദ്യോഗിക രേഖകൾ തയ്യാറാക്കട്ടെ എന്നും അതിന് ശേഷം ഒപ്പിടാനായി മാത്രം കൂടിക്കാഴ്ച നടത്താമെന്നുമാണ് മോസ്കോയുടെ നിലപാട്. റഷ്യൻ സാമ്പത്തിക രംഗത്തെ മാന്ദ്യവും ബിസിനസ്സ് പ്രമുഖർക്കിടയിലെ അസംതൃപ്തിയും മുതലെടുക്കാനാണ് സാമ്പത്തിക ഫോറം നടക്കുന്ന സമയത്തുതന്നെ സെലൻസ്കി ഈ കത്തുമായി രംഗത്തെത്തിയതെന്ന് വിലയിരുത്തപ്പെടുന്നു.
നിലവിലെ പ്രതികൂല സാഹചര്യത്തിലും റഷ്യൻ സമ്പദ്വ്യവസ്ഥ കൈവരിക്കുന്ന നേരിയ വളർച്ച ഒരു ‘അത്ഭുതമാണെന്ന്’ റഷ്യയിലെ ഏറ്റവും വലിയ ബാങ്കായ സ്ബെർബാങ്കിന്റെ സിഇഒ ജർമ്മൻ ഗ്രെഫ് തന്നെ പരസ്യമായി സമ്മതിച്ചിരുന്നു. അമേരിക്കയുടെ ശ്രദ്ധ ഇപ്പോൾ പൂർണ്ണമായും ഇറാൻ വിഷയത്തിലേക്ക് തിരിഞ്ഞിരിക്കുന്നതിനാൽ, യുഎസ് ഇടപെടലിനായി കാത്തുനിൽക്കാതെ മൂന്നാമതൊരു രാജ്യത്ത് വെച്ച് പൂർണ്ണ വെടിനിർത്തലോടെ ഉക്രെയ്നും റഷ്യയും നേരിട്ട് ചർച്ച നടത്തണമെന്നായിരുന്നു സെലൻസ്കിയുടെ ആവശ്യം. എന്നാൽ റഷ്യൻ സൈന്യത്തിന്റെ മുന്നേറ്റം തടയാൻ വേണ്ടിയുള്ള ഒരു തന്ത്രം മാത്രമാണ് ഈ കത്തെന്നും യുദ്ധം അവസാനിപ്പിക്കാൻ പുടിൻ ആഗ്രഹിക്കുന്നില്ലെന്നതിന്റെ തെളിവാണ് ഈ പ്രതികരണമെന്നും സെലൻസ്കി പിന്നീട് തിരിച്ചടിച്ചു.
Summary: Russian President Vladimir Putin flatly rejected Ukrainian President Volodymyr Zelensky’s proposal for a direct face-to-face meeting to end the ongoing four-year conflict, calling Zelensky’s open letter “boorish” and pointless. Speaking at the St. Petersburg International Economic Forum, Putin claimed that the letter’s aggressive tone seemed intended to sabotage any constructive dialogue rather than facilitate it, adding that official talks can only happen once experts draft a concrete document ready for signature.
