ടെഹ്റാൻ: അമേരിക്കയുമായുള്ള സമാധാന ചർച്ചകൾ പൂർണ്ണമായും സ്തംഭനാവസ്ഥയിലാണെന്നും വിദേശ ബാങ്കുകളിൽ മരവിപ്പിച്ചിരിക്കുന്ന 24 ബില്യൺ യുഎസ് ഡോളറിന്റെ ഇറാന്റെ ആസ്തികൾ വിട്ടുകൊടുക്കാൻ ഡൊണാൾഡ് ട്രംപ് ഭരണകൂടം തയ്യാറാകണമെന്നും ഇറാന്റെ പരമോന്നത സൈനിക ഉപദേശകൻ മോഹ്സൻ റെസായീ (Mohsen Rezaei Iran US Peace Talks Deadlock). ചർച്ചകളിൽ പുരോഗതിയുണ്ടാകാൻ ട്രംപിന് മുന്നിലുള്ള ഏറ്റവും വലിയ വിശ്വാസ്യത പരിശോധനയാണിതെന്നും, ഇറാന്റെ സ്വന്തം പണം തിരികെ നൽകി ഈ ചലഞ്ച് ജയിക്കേണ്ടത് അമേരിക്കയുടെ ആവശ്യമാണെന്നും സിഎൻഎന്നിന് ൽകിയ പ്രത്യേക അഭിമുഖത്തിൽ അദ്ദേഹം വ്യക്തമാക്കി.
ഇടക്കാല കരാർ ഒപ്പിട്ടാലുടൻ 12 ബില്യൺ ഡോളറും, പിന്നീടുള്ള ഘട്ടത്തിൽ ബാക്കി 12 ബില്യൺ ഡോളറും വിട്ടുനൽകണമെന്നാണ് ഇറാന്റെ ആവശ്യം. എന്നാൽ പണം കൈമാറുന്നത് ഇറാന് മേലുള്ള തങ്ങളുടെ സമ്മർദ്ദ തന്ത്രം ഇല്ലാതാക്കുമെന്ന ആശങ്കയിലാണ് വാഷിംഗ്ടൺ. അമേരിക്ക വീണ്ടും യുദ്ധത്തിലേക്ക് നീങ്ങിയാൽ അത് കേവലം പേർഷ്യൻ ഗൾഫിൽ മാത്രം ഒതുങ്ങില്ലെന്നും ഹോർമുസ് കടലിടുക്കിൽ നിന്നും ഇന്ത്യൻ മഹാസമുദ്രം, ബാബ് അൽ-മന്ദാബ്, ചെങ്കടൽ, മെഡിറ്ററേനിയൻ കടൽ എന്നിവടങ്ങളിലേക്ക് വ്യാപിപ്പിച്ച് യുഎസ് സൈനിക താവളങ്ങൾക്ക് നേരെ ശക്തമായ ആക്രമണം അഴിച്ചുവിടുമെന്നും മുൻ റെവല്യൂഷനറി ഗാർഡ് കമാൻഡർ കൂടിയായ റെസായീ മുന്നറിയിപ്പ് നൽകി.
നിലവിൽ യുദ്ധത്തിനുള്ള സാധ്യത കുറവാണെങ്കിലും അമേരിക്കയുടെ ഭാഗത്തുനിന്നും ഉണ്ടാകുന്ന ഏത് നീക്കവും കനത്ത പ്രത്യാഘാതം ഉണ്ടാക്കും. അടുത്തിടെ ഇസ്രായേൽ ആക്രമണത്തിൽ മുൻ പരമോന്നത നേതാവ് അലി ഖൊമേനി കൊല്ലപ്പെട്ടതിന് പിന്നാലെ ചുമതലയേറ്റ പുതിയ പരമോന്നത നേതാവ് ആയത്തുള്ള മുജ്തബ ഖൊമേനിയും ട്രംപും തമ്മിൽ കൂടിക്കാഴ്ച നടത്തുമെന്ന വാർത്തകൾ അദ്ദേഹം പൂർണ്ണമായും തള്ളി. ഹോർമുസ് കടലിടുക്കിന്റെ പരമാധികാരം ഒമാനും ഇറാനുമാണെന്നും, കപ്പൽ ഗതാഗതത്തിന്റെ പരിപാലനത്തിനായി പ്രത്യേക മെയിന്റനൻസ് ഫീസ് ഈടാക്കാൻ തങ്ങൾക്ക് അവകാശമുണ്ടെന്നും റെസായീ കൂട്ടിച്ചേർത്തു.
Summary: A potential peace agreement between Washington and Tehran is deadlocked over Iran’s demand for the Trump administration to release $24 billion in frozen assets, senior military adviser Mohsen Rezaei stated in an exclusive CNN interview. Rezaei framed the phased release of these funds—$12 billion immediately upon signing an interim deal and the rest later—as a critical trust test for the US.
