തിരുവനന്തപുരം: മോഹൻലാൽ നായകനാകുന്ന ബിഗ് ബജറ്റ് ചിത്രം ‘അതിമനോഹരം’ സിനിമയുടെ ചിത്രീകരണം നിർത്തിവെച്ചുവെന്ന തരത്തിൽ പ്രചരിക്കുന്ന വാർത്തകൾ പൂർണ്ണമായും വ്യാജമാണെന്ന് സംവിധായകൻ തരുൺ മൂർത്തി (Athimanoharam movie shoot update). തിരക്കഥയിലെ ആശയക്കുഴപ്പങ്ങൾ കാരണം സിനിമയുടെ ഷൂട്ടിംഗ് താൽക്കാലികമായി നിർത്തിവെച്ചു എന്ന രീതിയിൽ വരുന്ന ഓൺലൈൻ വാർത്തകൾ തെറ്റാണെന്ന് അദ്ദേഹം തന്റെ സോഷ്യൽ മീഡിയ പ്രൊഫൈലിലൂടെ വ്യക്തമാക്കി. ചിത്രത്തിന്റെ ഷൂട്ടിംഗ് തൊടുപുഴയിൽ മികച്ച രീതിയിൽ പുരോഗമിക്കുകയാണെന്നും എന്നാൽ കനത്ത മഴ ഷെഡ്യൂളിനെ ചെറുതായി ബാധിച്ചിട്ടുണ്ടെന്നത് ശരിയാണെന്നും തരുൺ കുറിച്ചു.
വ്യാജ വാർത്തകളോട് പ്രതികരിച്ച് തരുൺ മൂർത്തി പങ്കുവെച്ച കുറിപ്പ് ഇങ്ങനെയാണ്:
“തിരക്കഥയിലെ ആശയക്കുഴപ്പം കാരണം ഞങ്ങളുടെ സിനിമയുടെ ചിത്രീകരണം നിർത്തിവച്ചു എന്ന രീതിയിൽ വരുന്ന ഓൺലൈൻ വാർത്തകളെക്കുറിച്ച് ചോദിച്ച് എനിക്ക് നിരവധി സന്ദേശങ്ങളും ഫോൺ കോളുകളും വരുന്നുണ്ട്. ഈ വാർത്തകൾ പൂർണ്ണമായും വ്യാജമാണ്. കഴിഞ്ഞ 78 ദിവസങ്ങളായി ഞങ്ങൾ തൊടുപുഴയിൽ തുടർച്ചയായി ചിത്രീകരണത്തിലാണ്. മഴയും കാലാവസ്ഥാ വ്യതിയാനങ്ങളും ഞങ്ങളുടെ ചില പ്ലാനുകളെ ബാധിച്ചിട്ടുണ്ട് എന്നത് ശരിയാണ്. എന്നാൽ പ്രതിസന്ധികളെല്ലാം മറികടന്ന് വലിയ ആവേശത്തോടെയും പോസിറ്റിവിറ്റിയോടെയും ചിത്രീകരണം മുന്നോട്ട് കൊണ്ടുപോകാൻ ഞങ്ങളുടെ ടീം കഠിനമായി ശ്രമിക്കുന്നുണ്ട്.
വ്യക്തിപരമായ ലൈക്കുകൾക്കും വ്യൂസിനും റീച്ചിനും വേണ്ടി ദയവായി ആരും ഇത്തരം വ്യാജവും സ്ഥിരീകരിക്കാത്തതുമായ വിവരങ്ങൾ പങ്കുവെക്കുകയോ പ്രചരിപ്പിക്കുകയോ ചെയ്യരുതെന്ന് ഞാൻ അഭ്യർത്ഥിക്കുന്നു. ഇത്തരം തെറ്റായ വാർത്തകൾ പ്രേക്ഷകർക്കിടയിൽ അനാവശ്യമായ ആശയക്കുഴപ്പങ്ങൾ ഉണ്ടാക്കുമെന്ന് മാത്രമല്ല, ഒരു സിനിമയ്ക്കായി അണിനിരക്കുന്ന മുഴുവൻ ടീമിന്റെയും പ്രയത്നത്തെയും അത് ബാധിക്കുകയും ചെയ്യും. നിങ്ങളുടെ പിന്തുണയ്ക്കും തിരിച്ചറിവിനും ഹൃദയം നിറഞ്ഞ നന്ദി.”
‘തുടരും’ എന്ന ബിഗ് ബജറ്റ് ബ്ലോക്ക്ബസ്റ്റർ ഹിറ്റിന് ശേഷം തരുൺ മൂർത്തി – മോഹൻലാൽ കൂട്ടുകെട്ടിൽ ഒരുങ്ങുന്ന ചിത്രമാണ് ‘അതിമനോഹരം’. ഇതിൽ ‘ലൗലജൻ’ എന്ന വേറിട്ട പോലീസ് കഥാപാത്രമായാണ് മോഹൻലാൽ എത്തുന്നത്. മീരാ ജാസ്മിനാണ് ചിത്രത്തിൽ നായികയായി എത്തുന്നത്. ആഷിഖ് ഉസ്മാൻ പ്രൊഡക്ഷൻസിന്റെ ബാനറിൽ ആഷിഖ് ഉസ്മാനാണ് ഈ ചിത്രം നിർമ്മിക്കുന്നത്. ചിത്രത്തിന്റെ പ്രധാന ഷെഡ്യൂളുകൾ അവസാന ഘട്ടത്തിലേക്ക് കടക്കുകയാണ്.
Story Summary:
Director Tharun Moorthy dismissed viral online rumors claiming that the shooting of his upcoming Mohanlal-starrer movie ‘Athimanoharam’ has been halted due to script issues. Clarifying on social media, the director stated that the team has been filming continuously in Thodupuzha for 78 days and while rain has disrupted a few plans, the shoot is progressing positively.
