കൊച്ചി: രാജ്യത്തെ റീട്ടെയ്ൽ ക്രെഡിറ്റ് (റീട്ടെയ്ൽ വായ്പ) മേഖല കഴിഞ്ഞ സാമ്പത്തിക വർഷത്തിൽ ശക്തമായ മുന്നേറ്റം കൈവരിച്ചതായി ആഗോള ഡാറ്റാ-സാങ്കേതിക സേവനദാതാക്കളായ എക്സ്പീരിയൻ (Experian) പുറത്തുവിട്ട ഏറ്റവും പുതിയ റിപ്പോർട്ട് വ്യക്തമാക്കുന്നു (Experian retail loan report). 2026 മാർച്ച് 31 വരെയുള്ള ഔദ്യോഗിക കണക്കുകൾ പ്രകാരം, ഇന്ത്യൻ റീട്ടെയ്ൽ വായ്പാ വിപണിയുടെ മൊത്തം ആസ്തി 19 ശതമാനം വാർഷിക വളർച്ചയോടെ 137 ലക്ഷം കോടി രൂപയായി ഉയർന്നു. സുരക്ഷിത വായ്പകൾക്കുള്ള (Secured Loans) ആവശ്യകത വർദ്ധിച്ചതും ഉപഭോക്താക്കളുടെ തിരിച്ചടവ് കൂടുതൽ കാര്യക്ഷമമായതുമാണ് വിപണിക്ക് ഈ വൻ നേട്ടമുണ്ടാക്കി കൊടുത്തത്.
ഇന്ത്യൻ റീട്ടെയ്ൽ ക്രെഡിറ്റ് വിപണി നിലവിൽ കൂടുതൽ ശക്തവും സുരക്ഷിതവുമായ നിലയിലാണെന്ന് റിപ്പോർട്ട് ചൂണ്ടിക്കാണിക്കുന്നു. വിപണിയിൽ പുതിയതായി അനുവദിച്ച വായ്പകളുടെ (New Sourcing) വിഭാഗം മാത്രം 31 ശതമാനം വാർഷിക വളർച്ചയോടെ 75 ലക്ഷം കോടി രൂപ രേഖപ്പെടുത്തിയിട്ടുണ്ട്. ഭവന വായ്പ (Home Loan), സ്വർണ്ണ വായ്പ (Gold Loan), വിവിധ ആസ്തികൾ ഈട് വെച്ചുള്ള മറ്റ് പ്രീമിയം വായ്പകൾ എന്നിവയുടെ സ്ഥിരതയാർന്ന വളർച്ചയാണ് സുരക്ഷിത വായ്പാ മേഖലയെ തുണച്ചത്. റിസ്ക് കുറവുള്ള ഇത്തരം വായ്പാ ഉത്പന്നങ്ങൾ നൽകാൻ മുൻനിര ധനകാര്യ സ്ഥാപനങ്ങളും, അവ കരസ്ഥമാക്കാൻ ഇടപാടുകാരും ഒരുപോലെ താല്പര്യം കാണിക്കുന്നതായി എക്സ്പീരിയൻ വിലയിരുത്തുന്നു.
ആദ്യമായി വായ്പയെടുക്കുന്ന സാധാരണക്കാരായ ഇടപാടുകാരെ ഔദ്യോഗിക ബാങ്കിംഗ്-വായ്പാ സംവിധാനങ്ങളിലേക്ക് ആകർഷിക്കുന്നതിൽ സ്വർണ്ണ വായ്പകൾക്ക് വലിയ പങ്കാണുള്ളത്. ലളിതമായ നടപടിക്രമങ്ങളിലൂടെ വളരെ വേഗത്തിൽ പണം ലഭ്യമാകുമെന്നതിനാൽ വിപണിയിൽ സ്വർണ്ണ വായ്പകൾക്ക് ഇപ്പോഴും ആവശ്യക്കാരേറെയാണ്.
വായ്പകളുടെ തിരിച്ചടവ് നിരക്കിലും വലിയ പുരോഗതിയാണ് രാജ്യം കൈവരിച്ചിരിക്കുന്നത്. ഒരു മാസത്തിലേറെ (30+ Days Past Due) തിരിച്ചടവ് മുടങ്ങുന്ന വായ്പകളുടെ അനുപാതം വെറും 3 ശതമാനമായി കുറഞ്ഞിട്ടുണ്ട്. രാജ്യത്തെ ബാങ്ക് ഇതര ധനകാര്യ സ്ഥാപനങ്ങളും (NBFC) പുത്തൻ സാങ്കേതിക വിദ്യയുമായി എത്തിയ ഫിൻടെക് (Fintech) കമ്പനികളുമാണ് നിലവിൽ റീട്ടെയ്ൽ ക്രെഡിറ്റ് വിപണിയുടെ ഏറിയ പങ്കും കൈകാര്യം ചെയ്യുന്നത്. എന്നാൽ ഭവന വായ്പ, വ്യക്തിഗത വായ്പ (Personal Loan) എന്നീ വിഭാഗങ്ങളിൽ ആകർഷകമായ ജനപ്രിയ ഉത്പന്നങ്ങൾ അവതരിപ്പിച്ചുകൊണ്ട് പൊതുമേഖലാ ബാങ്കുകളും (PSU Banks) വിപണിയിൽ ഇപ്പോൾ ശക്തമായി സജീവമാകുന്നുണ്ടെന്ന് റിപ്പോർട്ട് അടിവരയിടുന്നു.
Story Summary: According to a report by global data and technology services provider Experian, India’s retail credit market achieved a 19% YoY growth, touching ₹137 lakh crore as of March 31, 2026. The growth was driven by a robust demand for secured loans like home and gold loans, coupled with improved repayment efficiency, dropping the 30+ DPD delinquency rate to 3%.
