കൊച്ചി: മുനമ്പത്തെ വഖഫ് ഭൂമി തർക്കവുമായി ബന്ധപ്പെട്ട് മുഖ്യമന്ത്രി വി.ഡി. സതീശൻ നടത്തിയ പരാമർശങ്ങൾക്കെതിരെ കടുത്ത വിമർശനവുമായി സമസ്ത നേതാവ് ഉമർ ഫൈസി മുക്കം രംഗത്ത് (Munambam Waqf Land Dispute). വഖഫ് ഭൂമി “ഉമീദ്” പോർട്ടലിൽ രജിസ്റ്റർ ചെയ്തതുമായി ബന്ധപ്പെട്ട വിവാദങ്ങളുടെ പശ്ചാത്തലത്തിൽ മുഖ്യമന്ത്രി നടത്തിയ ‘എട്ടിന്റെ പണി’ പരാമർശം വെറും രാഷ്ട്രീയ തമാശ മാത്രമാണെന്ന് അദ്ദേഹം കുറ്റപ്പെടുത്തി. കൊച്ചിയിൽ ചേർന്ന വഖഫ് സംരക്ഷണ സമിതി യോഗത്തിന് ശേഷം മാധ്യമങ്ങളോട് സംസാരിക്കുകയായിരുന്നു അദ്ദേഹം.
മറ്റാരുടെയും സ്വത്ത് തങ്ങൾക്ക് ആവശ്യമില്ലെന്നും, അല്ലാഹുവിന്റെ സ്വത്തായ വഖഫ് ഭൂമി വഖഫ് ആയി തന്നെ സംരക്ഷിക്കപ്പെടണമെന്നാണ് തങ്ങൾ അവകാശപ്പെടുന്നതെന്നും ഉമർ ഫൈസി മുക്കം വ്യക്തമാക്കി. 2019-ൽ തന്നെ ഈ ഭൂമി വഖഫിൽ കൃത്യമായി രജിസ്റ്റർ ചെയ്തിട്ടുള്ളതാണെന്നും ഇതിന് വ്യക്തമായ തെളിവുകളുണ്ടെന്നും അദ്ദേഹം കൂട്ടിച്ചേർത്തു. വഖഫ് ഭൂമിയെക്കുറിച്ച് പലരും സമൂഹത്തിൽ വലിയ തെറ്റിദ്ധാരണകൾ പരത്തുകയാണെന്നും വിഷയത്തെ വർഗ്ഗീയവൽക്കരിക്കാൻ ശ്രമം നടക്കുന്നുണ്ടെന്നും അദ്ദേഹം ആരോപിച്ചു. മുനമ്പത്ത് താമസിക്കുന്നവരെ പുനരധിവസിപ്പിക്കാൻ സർക്കാർ തയ്യാറാകണം. മാറിമാറി വന്ന സർക്കാരുകളും ഫാറൂഖ് കോളേജ് മാനേജ്മെന്റുമാണ് ഈ പ്രശ്നങ്ങൾക്കെല്ലാം കാരണക്കാരായ യഥാർത്ഥ പ്രതികൾ. മറ്റുള്ളവരുടെ സ്വത്ത് എടുത്ത് ദാനം ചെയ്ത് ആളാകാൻ ആരും നോക്കേണ്ടെന്നും, മുനമ്പത്തെ ഭൂമി വീണ്ടെടുക്കാനുള്ള നിയമപരമായ നടപടികളുമായി മുന്നോട്ട് പോകുമെന്നും ഉമർ ഫൈസി മുക്കം വ്യക്തമാക്കി.
Summary: Samastha leader Umar Faizi Mukkam strongly criticized Chief Minister V.D. Satheesan over his remarks regarding the Munambam Waqf land dispute, terming them a “political joke.” Speaking after a high-level meeting in Kochi, Umar Faizi asserted that the Munambam land is rightfully Waqf property, officially registered in 2019, and backed by concrete evidence. He stated that the Muslim community does not claim anyone else’s property but insists on protecting Waqf assets. He blamed successive governments and Farook College for the crisis, demanding rehabilitation for the current residents while warning against communally polarizing the issue.
