പാലക്കാട്: പാലക്കാട് വടക്കഞ്ചേരിയിൽ കെ.എസ്.ഇ.ബി (KSEB) കരാർ ജീവനക്കാരൻ ജോലിക്കിടെ ഇലക്ട്രിക് പോസ്റ്റിൽ നിന്ന് വീണ് മരിച്ചു (Palakkad KSEB worker death). വടക്കഞ്ചേരി കുന്നേങ്കാട് സ്വദേശി ബിജു (37) ആണ് ദാരുണമായി മരണപ്പെട്ടത്. ജോലിക്കിടെ ലൈനിൽ നിന്നും ഷോക്കേറ്റതിനെ തുടർന്ന് ബിജു താഴേക്ക് പതിക്കുകയായിരുന്നു എന്നാണ് പ്രാഥമിക നിഗമനം. ഇന്ന് പകൽ മൂന്ന് മണിയോടെയായിരുന്നു അപകടം നടന്നത്.
വടക്കഞ്ചേരി സെക്ഷന് കീഴിലുള്ള മുടപ്പല്ലൂർ പന്തപ്പറമ്പ് ഇലക്കോട് ഭാഗത്ത് ലോ ടെൻഷൻ (LT) ലൈനിലെ പഴയ ഇലക്ട്രിക് പോസ്റ്റ് മാറ്റി പുതിയത് സ്ഥാപിക്കുന്ന ജോലികളിൽ ഏർപ്പെട്ടിരിക്കുകയായിരുന്നു ബിജു. പോസ്റ്റിന് മുകളിൽ കയറി ജോലി ചെയ്യുന്നതിനിടെ പെട്ടെന്ന് ഇയാൾ താഴേക്ക് വീഴുകയായിരുന്നു. കൂടെയുണ്ടായിരുന്ന മറ്റ് ജീവനക്കാരും നാട്ടുകാരും ചേർന്ന് തൊട്ടുടൻ തന്നെ ബിജുവിനെ ഇരട്ടക്കുളത്തെ സ്വകാര്യ ആശുപത്രിയിൽ എത്തിച്ചെങ്കിലും അപ്പോഴേക്കും ജീവൻ നഷ്ടപ്പെട്ടിരുന്നു.
അപകടം നടന്ന എൽ.ടി ലൈനിന് തൊട്ടുസമീപത്തുകൂടെ 11 കെ.വി (11 KV) ഉയർന്ന പ്രസരണ ശേഷിയുള്ള വൈദ്യുത ലൈൻ കുറുകെ പോകുന്നുണ്ട്. ഇതിൽ നിന്നും ഷോക്കേറ്റതാണോ ബിജു പോസ്റ്റിൽ നിന്നും കൈവിട്ട് താഴെ വീഴാൻ കാരണമായതെന്ന് നാട്ടുകാരും ഒപ്പമുണ്ടായിരുന്ന തൊഴിലാളികളും സംശയം പ്രകടിപ്പിക്കുന്നുണ്ട്. വടക്കഞ്ചേരി പോലീസ് സ്ഥലത്തെത്തി ഇൻക്വസ്റ്റ് നടപടികൾ ആരംഭിച്ചു. ജില്ലാ ആശുപത്രിയിൽ നടത്തുന്ന വിശദമായ പോസ്റ്റ്മോർട്ടത്തിന് ശേഷം മാത്രമേ മരണത്തിന്റെ യഥാർത്ഥ കാരണം കൃത്യമായി സ്ഥിരീകരിക്കാനാകൂ എന്ന് കെ.എസ്.ഇ.ബി അധികൃതരും പോലീസും അറിയിച്ചു.
Story Summary: A 37-year-old KSEB contract worker, Biju, died after falling from an electric pole while working on a low-tension line replacement at Mudappallur near Vadakkencherry, Palakkad. Onlookers suspect he might have suffered an electric shock from a nearby 11 KV line, causing the fatal fall.
