തിരുവനന്തപുരം: തെക്കുപടിഞ്ഞാറൻ കാലവർഷം സജീവമായതോടെ സംസ്ഥാനത്തെ അടുത്ത അഞ്ച് ദിവസത്തെ മഴ പ്രവചനത്തിൽ കേന്ദ്ര കാലാവസ്ഥാ വകുപ്പ് കാര്യമായ മാറ്റങ്ങൾ വരുത്തി (Kerala Rain Updates). ഇന്ന് (ജൂൺ 4) മുതൽ ജൂൺ 8 വരെയുള്ള ദിവസങ്ങളിൽ കേരളത്തിലെ വിവിധ ജില്ലകളിൽ ഒറ്റപ്പെട്ടയിടങ്ങളിൽ അതിശക്തമായ മഴ പെയ്യാൻ സാധ്യതയുണ്ടെന്നാണ് പുതുക്കിയ മുന്നറിയിപ്പ്. ഇതിന്റെ അടിസ്ഥാനത്തിൽ വിവിധ ജില്ലകളിൽ ഓറഞ്ച് (Orange Alert), മഞ്ഞ (Yellow Alert) അലർട്ടുകൾ പ്രഖ്യാപിച്ചിട്ടുണ്ട്.
ഇന്ന് (ജൂൺ 4) തിരുവനന്തപുരം മുതൽ തൃശൂർ വരെയുള്ള തെക്കൻ-മധ്യ കേരളത്തിലെ എട്ട് ജില്ലകളിൽ ഓറഞ്ച് അലർട്ടാണ്. നാളെയോടെ (ജൂൺ 5) കനത്ത മഴ മധ്യ കേരളത്തിലേക്കും വടക്കൻ ജില്ലകളിലേക്കും വ്യാപിക്കും. നാളെ എറണാകുളം മുതൽ കാസർകോട് വരെയുള്ള എട്ട് ജില്ലകളിലാണ് അതിശക്തമായ മഴ മുന്നറിയിപ്പായ ഓറഞ്ച് അലർട്ട് നൽകിയിട്ടുള്ളത്.
അടുത്ത 5 ദിവസത്തേക്കുള്ള പുതുക്കിയ മഴ സാധ്യത പട്ടിക താഴെ നൽകുന്നു:
ഓറഞ്ച് അലർട്ട് (Very Heavy Rainfall)
24 മണിക്കൂറിൽ 115.6 മില്ലിമീറ്റർ മുതൽ 204.4 മില്ലിമീറ്റർ വരെ ലഭിക്കുന്ന അതിശക്തമായ മഴയാണ് ഈ ജില്ലകളിൽ പ്രവചിച്ചിരിക്കുന്നത്.
-
04/06/2026 (ഇന്ന്): തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം, തൃശൂർ
-
05/06/2026 (നാളെ): എറണാകുളം, തൃശൂർ, പാലക്കാട്, മലപ്പുറം, കോഴിക്കോട്, വയനാട്, കണ്ണൂർ, കാസർഗോഡ്
-
06/06/2026: പത്തനംതിട്ട, കോട്ടയം, ഇടുക്കി, എറണാകുളം, തൃശ്ശൂർ, പാലക്കാട്, മലപ്പുറം, കോഴിക്കോട്, വയനാട്, കണ്ണൂർ, കാസർഗോഡ്
-
07/06/2026: തൃശ്ശൂർ, പാലക്കാട്, മലപ്പുറം, കോഴിക്കോട്, വയനാട്, കണ്ണൂർ, കാസർഗോഡ്
-
08/06/2026: കോഴിക്കോട്, വയനാട്, കണ്ണൂർ, കാസർഗോഡ്
മഞ്ഞ അലർട്ട് (Isolated Heavy Rainfall)
24 മണിക്കൂറിൽ 64.5 മില്ലിമീറ്റർ മുതൽ 115.5 മില്ലിമീറ്റർ വരെ ലഭിക്കുന്ന ശക്തമായ ഇടിമിന്നലോടു കൂടിയ മഴയാണ് ഈ ജില്ലകളിൽ പ്രതീക്ഷിക്കുന്നത്.
-
04/06/2026 (ഇന്ന്): പാലക്കാട്, മലപ്പുറം, കോഴിക്കോട്, വയനാട്, കണ്ണൂർ, കാസർഗോഡ്
-
05/06/2026 (നാളെ): തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി
-
06/06/2026: തിരുവനന്തപുരം, കൊല്ലം, ആലപ്പുഴ
-
07/06/2026: തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം
-
08/06/2026: പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം, തൃശ്ശൂർ, പാലക്കാട്, മലപ്പുറം
വടക്കൻ ജില്ലകളിൽ വരും ദിവസങ്ങളിൽ മഴ അതീവ തീവ്രമാകാൻ സാധ്യതയുള്ളതിനാൽ മലയോര മേഖലകളിലും തീരദേശങ്ങളിലും വസിക്കുന്നവർ പ്രത്യേക ജാഗ്രത പുലർത്തണമെന്ന് സംസ്ഥാന ദുരന്തനിവാരണ അതോറിറ്റി നിർദ്ദേശിച്ചു. താഴ്ന്ന പ്രദേശങ്ങളിൽ വെള്ളപ്പൊക്കത്തിനും മലയോരങ്ങളിൽ ഉരുൾപൊട്ടലിനും സാധ്യതയുള്ളതിനാൽ അടിയന്തിര സാഹചര്യങ്ങളെ നേരിടാൻ റവന്യൂ-തദ്ദേശ വകുപ്പുകൾക്ക് ജാഗ്രതാ നിർദ്ദേശം നൽകിയിട്ടുണ്ട്.
Story Summary: The IMD has updated its 5-day rainfall forecast for Kerala as the southwest monsoon intensifies. An orange alert has been issued for 8 southern and central districts today, which will shift toward central and northern Kerala from tomorrow. Heavy to very heavy rainfall, ranging up to 204.4 mm, along with thunderstorms, is expected across the state until June 8.
