ചെന്നൈ: തമിഴ്നാട് ബിജെപി മുൻ അധ്യക്ഷൻ കെ. അണ്ണാമലൈ പാർട്ടി വിടുമെന്ന വാർത്തകൾ ശക്തമാകുന്നതിനിടെ, തന്റെ നിർണ്ണായക രാഷ്ട്രീയ തീരുമാനം നാളെ പ്രഖ്യാപിക്കും (Annamalai Quits BJP Announcement). ജൂൺ 5 വെള്ളിയാഴ്ച ഉച്ചയ്ക്ക് 12 മണിക്ക് സോഷ്യൽ മീഡിയ പ്ലാറ്റ്ഫോമുകളിലൂടെ തത്സമയം ജനങ്ങളുമായി സംവദിച്ചായിരിക്കും അദ്ദേഹം നിലപാട് വ്യക്തമാക്കുക. തന്റെ ജന്മദിനത്തിൽ ആശംസകൾ നേർന്നവർക്ക് നന്ദി പറഞ്ഞുകൊണ്ട് പങ്കുവെച്ച കുറിപ്പിൽ ബിജെപിയെക്കുറിച്ചോ പാർട്ടി ദേശീയ നേതൃത്വത്തെക്കുറിച്ചോ പൂർണ്ണമായി മൗനം പാലിച്ചതാണ് അഭ്യൂഹങ്ങൾക്ക് വലിയ രീതിയിൽ ആക്കം കൂട്ടിയത്.
അണ്ണാമലൈ ഇതിനോടകം തന്നെ പാർട്ടി നേതൃത്വത്തിന് രാജിക്കത്ത് സമർപ്പിച്ചതായും തമിഴ്നാട്ടിൽ പുതിയൊരു ജനകീയ പ്രസ്ഥാനമോ പ്രാദേശിക രാഷ്ട്രീയ പാർട്ടിയോ രൂപീകരിക്കാൻ ഒരുങ്ങുകയാണെന്നുമാണ് ദേശീയ മാധ്യമങ്ങൾ റിപ്പോർട്ട് ചെയ്യുന്നത്. കഴിഞ്ഞ ദിവസം ഡൽഹിയിലെത്തിയ അദ്ദേഹം ബിജെപി ദേശീയ അധ്യക്ഷൻ നിതിൻ നബിൻ, കേന്ദ്ര ആഭ്യന്തര മന്ത്രി അമിത് ഷാ എന്നിവരുമായി കൂടിക്കാഴ്ച നടത്തിയിരുന്നു. 2026-ലെ തമിഴ്നാട് നിയമസഭാ തിരഞ്ഞെടുപ്പിലെ സീറ്റ് വിഭജനവുമായി ബന്ധപ്പെട്ടും, പാർട്ടി സംസ്ഥാന അധ്യക്ഷ സ്ഥാനത്തുനിന്ന് മാറ്റിയതിലും അണ്ണാമലൈയ്ക്ക് കടുത്ത അതൃപ്തിയുണ്ടായിരുന്നതായാണ് സൂചന. നാളെ നടക്കാനിരിക്കുന്ന സോഷ്യൽ മീഡിയ ലൈവോടെ തമിഴ്നാട് രാഷ്ട്രീയത്തെ ഉറ്റുനോക്കുന്ന ഈ അനിശ്ചിതത്വങ്ങൾക്ക് വിരാമമാകും.
Summary: Amid intense speculation of exiting the BJP, former Tamil Nadu party chief K. Annamalai is set to announce his final political stance tomorrow, June 5, at 12 PM via a social media live session. Rumors of his resignation intensified after his recent birthday post completely omitted any mention of the BJP or its leadership. Reports suggest that the former IPS officer has already submitted his resignation following disagreements over alliance strategies for the 2026 Tamil Nadu assembly elections and plans to float a new regional movement or political party focused on civic welfare.
