കോഴിക്കോട്: കോഴിക്കോട് മെഡിക്കൽ കോളജ് ആശുപത്രിയിൽ വീണ്ടും ഗുരുതരമായ ചികിത്സാപ്പിഴവ് സംഭവിച്ചതായി പരാതി (Kozhikode Medical College). ശസ്ത്രക്രിയ മാറി ചെയ്തതിനെ തുടർന്ന് ചികിത്സയിലായിരുന്ന രോഗി മരണപ്പെട്ടതായാണ് കുടുംബം ആരോപിക്കുന്നത്. കോഴിക്കോട് വാണിമേൽ സ്വദേശി പറമ്പത്ത് റീജിത്ത് (46) ആണ് ഇന്ന് (വ്യാഴം) പുലർച്ചെ മരണമടഞ്ഞത്. സംഭവത്തിൽ പ്രതിഷേധം ശക്തമാക്കിയ ബന്ധുക്കൾ റീജിത്തിന്റെ മൃതദേഹം ഏറ്റുവാങ്ങാൻ ഇതുവരെ തയ്യാറായിട്ടില്ല.
ഇടതുവശത്തെ വൃക്കയിലെ (Kidney) കല്ല് നീക്കം ചെയ്യാനായി പ്രവേശിപ്പിച്ച രോഗിയുടെ വലത് വൃക്കയിലാണ് ഡോക്ടർമാർ ശസ്ത്രക്രിയ നടത്തിയതെന്ന് കുടുംബം വ്യക്തമാക്കുന്നു. 2025 ഓഗസ്റ്റ് ആറിനായിരുന്നു റീജിത്തിന്റെ ആദ്യ ശസ്ത്രക്രിയ നടന്നത്. അന്ന് മാറി ശസ്ത്രക്രിയ ചെയ്തതിന് ശേഷം, ഇക്കഴിഞ്ഞ ഏപ്രിൽ ഒന്നിന് കുടുംബത്തിന്റെ കൃത്യമായ സമ്മതമില്ലാതെ ഡോക്ടർമാർ വീണ്ടും മറ്റൊരു സർജറി നടത്തിയതായും പരാതിയിൽ പറയുന്നു.
ആശുപത്രി അധികൃതരുടെ ഭാഗത്തുനിന്നുണ്ടായ ഗുരുതരമായ അനാസ്ഥയാണ് റീജിത്തിന്റെ മരണത്തിന് കാരണമായതെന്നാണ് ബന്ധുക്കളുടെ ആരോപണം. സംഭവത്തിൽ കുറ്റക്കാരായ മെഡിക്കൽ സംഘത്തിനെതിരെ കർശന നടപടി സ്വീകരിക്കണമെന്നും അന്വേഷണം വേണമെന്നും ആവശ്യപ്പെട്ട് കുടുംബം പോലീസിനെ സമീപിക്കാനൊരുങ്ങുകയാണ്. മെഡിക്കൽ കോളജിൽ സമാനമായ ചികിത്സാപ്പിഴവ് ആരോപണങ്ങൾ മുൻപും ഉയർന്നിട്ടുള്ളതിനാൽ ഈ സംഭവം വലിയ രീതിയിലുള്ള ജനരോഷത്തിന് കാരണമായിട്ടുണ്ട്.
Story Summary: A 46-year-old patient, Reejith from Vanimel, died following an alleged medical negligence at Kozhikode Medical College Hospital. The family accused doctors of performing kidney stone surgery on the right kidney instead of the left, and conducting a second surgery without their consent.
