വടക്കേ അമേരിക്കൻ രാജ്യങ്ങളായ യു.എസ്.എ, മെക്സിക്കോ, കാനഡ എന്നിവടങ്ങളിലായി ഈ മാസം ജൂൺ 12 മുതൽ ആരംഭിക്കുന്ന ഫിഫ ലോകകപ്പ് ഫുട്ബോളിന്റെ ആവേശത്തിലേക്ക് ലോകം ഉണരുമ്പോൾ കളിമുറ്റത്ത് ചരിത്ര റെക്കോർഡിനൊരുങ്ങി നാല് ഇതിഹാസ താരങ്ങൾ (FIFA Record Sixth Appearance). ഫുട്ബോൾ ചരിത്രത്തിലാദ്യമായി 48 ടീമുകൾ മാറ്റുരയ്ക്കുന്ന ഈ ലോകകപ്പിൽ തങ്ങളുടെ കരിയറിലെ റെക്കോർഡ് ആറാം പങ്കാളിത്തം കുറിക്കാൻ ഒരുങ്ങുന്നത് പോർച്ചുഗലിന്റെ ക്രിസ്റ്റ്യാനോ റൊണാൾഡോ, അർജന്റീനയുടെ നായകൻ ലയണൽ മെസ്സി, ക്രോയേഷ്യയുടെ മിഡ്ഫീൽഡ് മാന്ത്രികൻ ലൂക്കാ മോഡ്രിച്ച്, മെക്സിക്കോയുടെ വിശ്വസ്തനായ ഗോൾകീപ്പർ ഗില്ലെർമോ ഒച്ചോവ എന്നിവരാണ്. 2006-ൽ ജർമ്മനിയിൽ നടന്ന ലോകകപ്പിൽ ഒരുമിച്ച് അരങ്ങേറ്റം കുറിച്ച ഈ നാല് വെറ്ററൻ താരങ്ങളും തുടർന്നിങ്ങോട്ട് നടന്ന എല്ലാ ലോകകപ്പുകളിലും തങ്ങളുടെ രാജ്യത്തിനായി അണിനിരന്നിരുന്നു.
ഇതുവരെ ലോകകപ്പ് ചരിത്രത്തിൽ അഞ്ചു ലോകകപ്പുകളിൽ പങ്കെടുത്ത താരങ്ങൾ ഒട്ടനവധി ഉണ്ടെങ്കിലും ആറ് ലോകകപ്പുകളിൽ കളിക്കുന്ന ആദ്യ കളിക്കാരെന്ന ചരിത്ര നേട്ടമാണ് ഈ സൂപ്പർ താരങ്ങളെ കാത്തിരിക്കുന്നത്. ഈ നാല് പേരിൽ നിലവിലെ ചാമ്പ്യന്മാരായ അർജന്റീനയുടെ ലയണൽ മെസ്സിക്ക് മാത്രമാണ് കഴിഞ്ഞ ഖത്തർ ലോകകപ്പിലൂടെ കിരീടത്തിൽ മുത്തമിടാൻ സാധിച്ചിട്ടുള്ളത്. ക്രോയേഷ്യൻ താരം ലൂക്കാ മോഡ്രിച്ച് 2018 ലോകകപ്പിൽ ഫൈനൽ വരെ എത്തിയിരുന്നെങ്കിലും ഫ്രാൻസിനോട് പരാജയപ്പെട്ട് റണ്ണേഴ്സ് അപ്പ് ആകാനേ കഴിഞ്ഞുള്ളൂ. പോർച്ചുഗീസ് താരം ക്രിസ്റ്റ്യാനോ റൊണാൾഡോ തന്റെ കന്നി ലോകകപ്പായ 2006-ൽ സെമിഫൈനൽ വരെ എത്തിയിരുന്നെങ്കിലും പിന്നീട് നടന്ന നാല് പതിപ്പുകളിലും പ്രീ-ക്വാർട്ടറിനോ ക്വാർട്ടറിനോ അപ്പുറം കടക്കാൻ പോർച്ചുഗലിനായില്ല. മെക്സിക്കൻ ഗോളി ഒച്ചോവയുടെ കാര്യവും സമാനമാണ്, അദ്ദേഹത്തിന്റെ ടീമിനും പ്രീ-ക്വാർട്ടർ കടമ്പ കടക്കാൻ ഇതുവരെ സാധിച്ചിട്ടില്ല.
ആഗോള കായിക മാമാങ്കത്തിന് ഇനി വെറും 9 ദിവസങ്ങൾ മാത്രം ബാക്കി നിൽക്കെ ജൂൺ 12-ന് മെക്സിക്കോയിലെ വിഖ്യാതമായ എസ്റ്റാഡിയോ അസ്ടെക്ക സ്റ്റേഡിയത്തിൽ നടക്കുന്ന ഉദ്ഘാടന മത്സരത്തിൽ സഹ-ആതിഥേയരായ മെക്സിക്കോ ദക്ഷിണാഫ്രിക്കയെ നേരിടും. വലിപ്പ ചെറുപ്പമില്ലാതെ 48 രാജ്യങ്ങൾ പോരാട്ടത്തിനിറങ്ങുമ്പോൾ കേപ് വെർദെ, കുറകാവോ, ജോർദാൻ, ഉസ്ബെക്കിസ്ഥാൻ തുടങ്ങിയ രാജ്യങ്ങൾ തങ്ങളുടെ ആദ്യ ലോകകപ്പ് കളിക്കാൻ ഒരുങ്ങുകയാണ്. ഇതിനൊപ്പം സ്കോട്ട്ലൻഡ്, തുർക്കി, ചെക്കിയ, ഇറാഖ്, ന്യൂസിലാൻഡ്, നോർവേ തുടങ്ങിയ രാജ്യങ്ങൾ നീണ്ട ഇടവേളയ്ക്ക് ശേഷമാണ് ലോകകപ്പ് യോഗ്യത നേടി വരുന്നത്. ഇന്ത്യയിലെ ഫുട്ബോൾ ആരാധകർക്ക് ഇത്തവണത്തെ ഫിഫ ലോകകപ്പ് മത്സരങ്ങൾ മുഴുവനായും ‘സീ 5’ (Zee 5) ആപ്പിലും വെബ്സൈറ്റിലും യുണൈറ്റ് 8 (Unite8) സ്പോർട്സ് ടെലിവിഷൻ ചാനലുകളിലും തത്സമയം കാണാൻ സാധിക്കും.
Summary: Four football legends—Lionel Messi, Cristiano Ronaldo, Luka Modric, and Guillermo Ochoa—are set to make a historic sixth appearance at the FIFA World Cup 2026. All four veterans made their tournament debuts in Germany 2006, with Messi being the only one to have won the trophy during the 2022 edition in Qatar. The expanded 48-team mega tournament will kick off on June 12 with co-hosts Mexico facing South Africa at the iconic Estadio Azteca.
